E ui o lea ua maitauina le faaitiitia o le tau o le suauu ma le kesi i le maketi i Singapore, peitai na taua e le Ofisa o lo o gafa ma le faasoasoaina o le suauu i le atunuu, faatoa molimauina e le teritori tulaga faaitiitia i le tau o le suauu ma le kesi i se taimi o le masina nei po o le masina fou fo’i o Tesema.

I se pepa o faamatalaga na tuuina mai e le Ofisa o le OPM (Office of Petroleum Management) i le aso Faraile na te’a nei, o lo o taua ai le tau o le suauu o lo o faatauina i le teritori amata atu i le aso 16 Novema, 2013, se’i vagana ai se vaega laititi o lo o faaitiitia ai le tau o le suauu (Ultra Lou Sulfur Diesel) lea e faaaoga i afi eletise a le Puleaga o le Eletise ma le Suavai (ASPA) i Satala, atoa ai ma le suauu o lo o faaaoga i nisi o pasi aoga.

Na taua e le sooupu o le OPM ia Sione Kava e faapea, e le o i ai se suiga tele i le tau o le kesi, ae o le tau o lo o faatau ai le kesi i le maketi i fale suauu i Singapore, lea o lo o faatau mai e Amerika Samoa ma isi atunuu o le pasefika a latou suauu, ua amata ona faaitiitia o latou tau.

“O le mea moni lava ia, ua amata ona faaitiitia le tau o le suauu, ae faatoa tatou molimauina lea suiga i se taimi o lenei masina,” o le saunoaga lea a Kava i se talanoaga ma le Samoa News i luga o le telefoni.

E oo foi i le karasini ua aga’i atu fo’i ina faaitiitia lona tau, ona o le tulaga moomia o lea ituaiga oloa, e ui o lo o vaaia le telegese o le faatauina o lea oloa, o le isi lena mafuaaga o le laititi o le pau i lona tau.

Na taua e Kava e faapea, i le ripoti a le Failautusi o le Pacific Community o lo o faatulagaina tau o Suauu o lo o taua ai, o le faaitiitia o le manaomia o le kiso (diesel) ua mafua ai ona faaitiitia lona tau.

Talu mai le aso Faraile na te’a nei, e $4.08 le tau o le kalone kesi sa faatauina ai, tusa lea e 47sene o lo o sili atu ai mai le tau ua faatulagaina nei, ae o le tau o le kalone o le kiso e $4.42, tusa lea e 46 o lo o maualuga ai nai lo le tau ua faatulagaina.

I tau fou e pei ona faatulaga mai, ua vaaia ai le sii o le tau o le kesi (gasoline) i le 1.2 sene i le kalone, ma le suauu mo vaalele (jet fuel) e 2 sene lea ua siitia ai le tau o le kalone.

O le siitaga pito maualuga e pei ona taua e Kava, o le tau o le kiso (diesel) lea e faaaoga mo masini auala, vaa fagota ma afi eletise, lea e 5 sene ua sii ai mai le tau o lo o i ai.

Na taua e Kava e faapea, o lo o taumafai malosi pea le afioga i le kovana sili ia Lolo Moliga ina ia faia auala uma e mautinoa ai e faaitiitia le tau o le suauu i lalo o le vaavaaiga a le malo, e ui e le mafai e le alii kovana ona faatonutonu le tau o lo o faatau ai le suauu ma le kesi i Pamu Kesi.

Fai mai Kava, pe a faatusatusa le tau o le suauu ma le kesi i le malo tele ma Pasefika, e pito taugofia ai lava le tau i Amerika Samoa nei i le Pasefika atoa, ae a oo atu loa i le tau o lo o faatauina ai nei oloa i Pamu Kesi, o le tau lena o lo o pulea mai e Pamu Kesi.

faaliliu Ausage Fausia