Ua fautuaina e le Faatonusili o le Matagaluega o Tagata Faigaluega a le malo ia faatonusili ma faauluuluga o matagaluega ma ofisa tumaoti a le malo, o le solitulafono le faa faigaluega i le malo, e aunoa ma le uia o auala e tatau ai ona faa faigaluega lea tagata, e pei ona taua i le tusi tulafono.

“Afai o i ai se tagata sa e faa faigaluegaina i totonu o lau matagaluega ua savali i le tausaga o galue pea e le o totogiina, ona e le’i uia auala e tusa ai o le tulafono, ou te fautuaina oe ina ia faafoi lena tagata i lona aiga,” o le feau tuu sa’o lea na tuuina atu e Sonny L. Thompson i luma o le kapeneta ananafi, ina ua saunoa e faamanino atili le mataupu e faatatau i tagata ua faa faigaluega ae le’i uia ala o le tulafono e tatau ai ona galulue i latou nei.

O le saunoaga lea a Thompson e lagolago ai lana tusi lea na tuuina atu i le aso 13 Novema, 2013 i faatonusili, e faatatau i tagata faigaluega o lo o fesuia’i tulaga e ave i ai, po o le faa faigaluega foi i auala e le tusa ma le tulafono.

Saunoa Thompson e faapea, e na o le tasi lava le ofisa o le malo e i ai le malosi na te faa faigaluegaina ai ni tagata faigaluega fou, ua na o le Matagaluega o Tagata Faigaluega a le malo o lo o galue ai o ia ma lana aufaigaluega.

Sa ia taua e faapea, i le nofoaiga ua mavae atu, sa latou faatinoina le auala lenei e faa faigaluega ai tagata i le malo, ae o se auala e le tusa ma le tulafono.

“O le faataga o tagata e galulue mo le malo pe galulue fua fo’i (volunteer) e aunoa ma le uia o ala e pei ona faataga atu e le matagaluega o tagata faigaluega a le malo, e le gata ua le amanaiaina ai le faatonuga a le kovana e faatatau i le faaitiitia lea o tupe faaalu a le malo, atoa ai ma lana saunoga sa tuuina atu i le fono a le kapeneta ia Aperila, e na o le tasi le matagaluega a le malo e mafai ona ia faa faigaluegaina tagata faigaluega i le malo, ae ua atagia mai ai foi le le usitaia o tatou tulafono lotoifale ma faiga faavae, i le faa faigaluegaina lea o tagata mo le malo,” o se vaega lea o le tusi a Thompson.

O le vaiaso na tea nei e pei ona saunoa Thompson, na asia ai e sui o le Matagaluega o Leipa a le fetarale  (USDOL) le latou ofisa mo le faatalatalanoaina o le mataupu e tusa ai ma le le tausisia lea e le malo o tulafono ma ta’iala o le malo tele.

Na taua e Thompson e faapea, afai e suesue e le feterale le latou ofisa e faatatau i mataupu nei, lona uiga e le o se mataupu e faigofie i le latou maitauina mai, ona o faafitauli e tele ua tutupu ia Amerika Samoa e faatatau i totogi ma ovataimi o tagata faigaluega.

“O la’u fautuaga lea mo outou uma lava, afai o i ai ni tagata o faigaluega fua i totonu o lau matagaluega e le’i pasia atu e le matou ofisa, poo nisi foi ua silia ma le tausaga o galulue i lau matagaluega e aunoa ma le maua o ni totogi, faafoi i latou nai i le fale, ae sei galulue atu le malo i auala e totogi ai i latou nei, pe faagaioi foi pepa mo le faa faigaluegaina o i latou i auala e tusa ai ma le tulafono, ona o lea ua manuia ai le malo i la latou tautua mo taimi tele sa galulue ai i le malo,” o le isi lea saunoaga a Thompson i le kapeneta.

I le Ulutala 7.0206 (e) o le Tulafono Toe Teuteu a Amerika Samoa, o lo o manino mai ai le tulaga lea, “e le mafai e se tagata faigaluega a le malo ona faataga se tagata faigaluega e galue i le malo, sei vagana ua faataga mai e le faatonusili o le matagaluega o tagata faigaluega a le malo, poo se tasi foi o lona ofisa ua tuu atu i ai le malosi na te faatinoina ai lea tiute.”

Ae i le Tulafono 4.0301 (6) o lo o manino mai ai le tulaga lenei, “o le aso e aloaia ai ona galue se tagata mo le malo, atoa ai ma isi faamaumauga uma e faatatau ia te ia, e tatau ona faatulaga uma e le matagaluega o tagata faigaluega a le malo, sei vagana ai le tagata ua faamavae, o le matafaioi lena a le tagata faigaluega, o lona faailoa o le aso o le a faamavae mai ai i le galuega a le malo.”

Na fautuaina e Thompson ia faatonusili e ala i lana tusi, ina ia latou galulue faatasi i le tausia lea ma le usitaia o tulafono a le malo, ona manuia lea o le tautua a le malo mo ana tagata faigaluega.

Na lagolagoina e le alii kovana ia Lolo Moliga le saunoaga a Thompson, ma ia toe fautuaina ai sui o le kapeneta ina ia nofouta i tulaga e pei ona fautuaina ai i latou i tulaga e faatatau i lenei mataupu, ona o le isi lea faafitauli sa maitauina o lo o tupu i nisi o ofisa o le malo.

Na taua e Lolo e faapea, afai e le naunau taitai o le malo e talitonuina i latou e le atunuu ma faafofoga mai le atunuu i tulaga o lo o latou taumafai e faatulaga, o i latou e tatau ona amata atu ai faataitaiga lelei.