Ads by Google Ads by Google

ATA MANUMALO TUSIGA ATA KALAPU A LE LIONA

O le tusiga ata fa’apitoa a le Kalapu a le Liona i Pago Pago, sa latou fa’atautaia mo le Kalapu a le Liona i le Lalolagi, fa’aautu i le “Our World, Our Future” ae auga i le Nofo Filemu o atunu’u uma o le lalolagi o lea ua ma’ea.

 

Ma ua auina atu i fafo nei fo’i ata manumalo e tolu, ina ia tauva ai i le tauvaga a le Liona i le Lalolagi, pe mata e manumalo mai ai. O aiaiga tamau a lenei tauvaga, e na’o le fanau e amata mai i le 11 tausaga se’ia o’o i le 13 tausaga e tauva ai.

 

E tusia lau ata, ae le mafai ona e tusia ni upu pe o ni igoa o mea ua e tusia i lau ata, e ao lava ina tu’u patino i le o maimoaina lau ata, e na te fa’amatalaina lau ata e tusa ai o se autu ua e faaalia i ou mafaufauga fa’atino i lau ata ua valia.

 

Ua fa’apena fo’i ona tausisia le tele o le ata i lona lautele ma lona umi, afai ae itiiti lau ata, e matua le taulia lava, ae afai ae tele teisi, e mafai ona toe tipi ane la’ititi ina ia fetaui. O lea le isi mea sa matua iloga ona tele na’ua ata sa le ausia le tele o le pepa e tusia ai le ata, ua itiiti nai lo le tapula’a ma ua le aoga atoa le galuega fa’atino a le fanau.

 

O le isi mea, e matua le fa’atagaina ona e tusia se ata fa’akerisiano, e fa’aali ai lou lagona, ua tamau mai e leai ni satauro, agaga pa’ia, po’o se ata o Iesu i lau ata tusia, aua e le o tasi lava se auga o talitonuga i le lalolagi atoa. O le isi lea vala o le tausinioga, sa maumau ai nisi galuega fa’atino matagofie na maimoaina e le au fa’amasino e to’afa sa latou filia ata o le a manumalo.

 

O le taimi atofa mo le fa’amoemoe, ua maua uma lava e nisi o a’oga sa fa’ao’o mai latou galuega, ma ua mae’a fa’amasinoina nei. Sa vaevaeina fo’i a’oga na tauva i le itu i sisifo, le itu i sasa’e ma le ogatotonu o le motu o Tutuila.

 

Peita’i, e le’i aofia le Manu’atele, aua e talu lava ona faia lenei tauvaga i tausaga ta’itasi, e le’i tauva mai lava ni a’oga i le Manu’atele, atonu o le 2014, ua tauva mai i latou, ma atoa ai le fa o itumalo e fa’amasinoina ai lea fa’amoemoe.

 

O i latou ua manumalo i nei itumalo e tolu ua aofia ai:

 

Itumalo i sisifo ua manumalo ai le ata sa tusia ma vali e le tama’ita’i o Maria Tiaseuga mai le a’oga a Kanana Fou Elementary i le vasega 6, e 11tausaga o lona soifua, ma o lana ata, ua iloga ai lona fo’i mafaufauga e tusa o le auga o le tauvaga, “Ola filemu i le tatou lalolagi i le lumana’i.”

 

O le itumalo Tutotonu na manumalo ai le ata tusia a le tama’ita’i o Diedra Tyrell e 11 ona tausaga mai le a’oga a SPICC i Fatumatufi ma o lo’o i ai o ia i le vasega 6.

 

O le ata lona tolu ua manumalo mai le Itumalo i Sasa’e ua manuia ai le taumafaiga a le tama’ita’i o Lydia Anoa’i mai le a’oga a Mt. Alava i Vatia. E 12 tausaga le matua o lenei tama’ita’i talavou, ma ua i ai fo’i o ia i le vasega 6.

 

Ua tula’i mai, afai ae toe aumaia fo’i aiaiga mo le isi tusiga ata a le Liona i le Lalolagi mo le tausaga fou, e mafai uma e nei sui ua manumalo i lenei tausaga ona toe tauva. Aua o lo’o i ai lava i latou i le matutua fa’atulaga mo le tauvaga i tausaga ta’itasi.

 

Na tu’ua e nei ata e tolu lo tatou nei motu i le aso Faraile, fa’amoemoe o le a logo mai Niu Sila se i’uga o lea tauvaga pe mata e toe manumalo ai se tasi o nei sui ua auina atu. O le a faia lava se fa’atasiga e taua’aoina ai fa’ailoga tupe mo nei sui i se taimi mulimuli mai e fa’ailoa mai lava e le Kalapu a le Liona i Pago Pago po’o le a le ituaiga o fa’atasiga e taua’ao aloaia ai nei fa’ailoga i sui tauva ma o latou matua.

 

O le fa’ailoga tupe e ta’i $100 i le ata manumalo, ae o lo’o i ai isi ata na filifilia lava ina ia taualoa pea se galuega lelei ona faia, ae ua le togisilia. E tolu fo’i nei ata ma ua fa’ailoa mai e maua e nei sui o se fa’ailoga tupe $25.

 

O ata nei e aofia ai: Dieter I’aulualo mai Afonotele Elementary, ua 13 ona tausaga; Finagalo Puni, 13 tausaga mai Afonotele Elementary ma Samarian Tau, 13 tausaga mai le a’oga Kanana Fou.

 

tBelow: Te winners are Maria Tiaseuga, a 6th grade student from Kanana Fou, Dierdre Tyrell, a 6th grader from S.P.I.C.C. and Lydia Anoa’i a 7th grader at Mt. Alava Elementary. Their winning posters have earned them cash prizes from the local Lions and their posters have also been sent to the regional contest in New Zealand, where they will be judged in the contest’s next level. Samoa News congratulates our young artists, who drew their pictures with this year’s theme in mind—“Our World, Our Future.”