NOFOVAAVAAIA LE ALI’I TALEPE FALE

O le alii 19 tausaga le matua lea na ia talepeina le fale a lona aunty ae gaoi ni meatotino sa i totonu, ua nofovaavaaia mo le 5 tausaga i lalo o poloaiga a le faamasinoga.

O nisi o poloaiga ua tuuina atu i le alii o Kerry Naolavoa e aofia ai lona totogiina o le salatupe e $200, atoa ai ma le $250 e totogi ai meatotino sa ia gaoiina.

Na faatoese le ua molia e tusa ai o lana solitulafono sa faia, ma ia talosagaina ai se isi avanoa mo ia sei toe fo’i atu ai i lona aiga e tausi ona matua ma lona atalii. Na faatoese foi le ua molia i lona aunty ma lona tausoga na aafia i lana solitulafono, ina ia faamagalo o ia.

Na taua e Naolavoa e faapea, ua avea masina na loka ai o ia i le falepuipui ua ia iloa ai, e leai se fautuaga lelei e maua e le tagata mai le toese, ae na o le maimau ai o aso o le olaga.

Na talosga lana loia fautua ia Karen Shelly i le faamasinoga ina ia nofovaavaaia le ua molia, ina ia maua ai le avanoa e toe fo’i atu ai i lona aiga e tausi lona atalii e 2 tausaga le matua, ma saili sana galuega e fesoasoani ai i le atina’eina o lona aiga.

Na taua e le alii faamasino sili ia Michael Kruse e faapea, o Naolavoa ua tausala e le faamasinoga maualuga i moliaga o le talepe fale i le tulaga lua ma le gaoi, ona o le faalavelave lea na ia talepeina ai le fale a lona aunty ae gaoi meatotino sa i totonu.

O nisi o mea totino na gaoi e le ua molia e aofia ai se iPod Touch, o ni mitiafu ma se tupe e $30.

E 20 masina na manatu le faamasinoga e loka sa’o ai le ua molia, peita’i o le a faamalumalu lona tuliina o lea faasalaga, ae ua lava masina e 6 e loka mo’i ai o ia i le toese, a maea, ona tatala lea o ia i tua e alu e saili sana galuega tumau e faigaluega ai ma totogi tupe ua poloaina ai o ia e le faamasinoga.

Na faailoa e Kruse ia Naolavoa e faapea, afai e maea aso e 60 e le maua lava sana galuega, ona faila atu loa lea e le Ofisa Nofovaavaaia sa latou talosaga e toe faafoi ai o ia i totonu o le toese mo le tuli faamaeaina o lana faasalaga faafalepuipui e 20 masina.

Ao nofovaavaaia ai o ia mo le 5 tausaga, ua faasa ona ia toe tagofia le ava malosi poo fualaau faasaina, aua nei ona toe soli se tulafono, ma aua foi nei toe tu i le fale a lona aunty sa ia talepeina.

TETE’E TALOFA FAIMOA TUUAIGA A LE MALO

O le aso 9 Ianuari 2014 lea ua faatulaga e faia ai le ulua’i iloiloga o le mataupu a le susuga Talofa Faimoa, ina ua ia teena i le taeao ananafi moliaga faasaga ia te ia i luma o le faamasinoga maualuga.

O Faimoa o lo o tuuaia faatasi e le malo ma le susuga ia Fatutoa Levi i le moliaga mamafa o le faafoolima i le tulaga lua, atoa ai ma le moliaga mama o le faatupu vevesi i nofoaga faitele, ona o le faalavelave lea na manua’a ai se alii i le aso 26 Oketopa, 2013, lea na faaoolima ai i laua e toalua i le taimi o se taaloga lakapi, e pei ona taua i faamaumauga a le faamasinoga.

O se vevesi na tulai mai i le taaloga a le au lakapi taitoa 7 a Fagatogo Blues ma le au a Mapusaga, i le taimi o le taamilosaga taitoa 7 a le Mosooi i le masina na te’a nei, na tulai mai ai loa le faalavelave ina ua faaoolima sui e toalua ua molia mai le au a Fagatogo i le alii na manu’a mai le au a Mapusaga.

Na taua e le loia a le malo ia Tony Graf i luma o le faamasinoga faaitumalo i le aso Faraile na tea nei - ae le’i o’o atu lenei mataupu i le fa’amasinoga maualuga - e faapea, o le matuia o le gaioiga sa faia e le ua molia na mafua ai ona manu’a tigaina le alii na aafia, ma i’u ina gau ai lona auvae.

O lo o tumau pea poloaiga a le faamasinoga o lo o tatala ai Faimoa ma Levi i tua e faatali ai taimi ma aso lea ua faatulaga e toe tutulai ai i luma o le faamasinoga.

TOKEI SIUA

Na talia e le faamasinoga maualuga i le vaiaso na tea nei se talosaga na faaulu e le loia a Tokei Siua, ina ia tolopo le ulua’i iloiloga a le ua molia na faatulaga i le aso Faraile na te’a nei, se’i laua iloillo muamua le faaiuga o suega o lo o auina atu i fafo e tusa ai o lenei mataupu.

I le talia ai e le faamasinoga o le talosaga a le tamaitai loia ia Sharron Racourt, ua faatulaga ai loa le isi iloiloga mo lenei mataupu i le aso 17 Tesema, 2013.

O Siua o lo o tuuaia i le moliaga mamafa e tasi o lona umia faasolitulafono lea o vaega o le pauta faasaina o le aisa, ma le faamoemoe e tulei pe faatau atu i isi tagata.

O lo o taofia pea Siua i le toese i Tafuna ina ua le mafai ona ia totogiina le $30,000, e faatali ai le aso lea ua faamoemoe e toe tulai ai i luma o le faamasinoga.