Ads by Google Ads by Google

TALA MAi SAMOA

FAAALIGA O OLOA A SAMOA I NIU SILA

 

O le faaiuga o le vaiaso nei o lo o faagasolo ai le faaaliga o oloa ma fefaatauaiga a le atunuu i Aukilani i NiuSila ma o lo o taitaia le au malaga a Samoa e le alii sui palemia, le tofa Fonotoe Nuafesili Pierre Lauofo, o ia foi o le minisita o Pisinisi, Alamanuia ma Leipa.

 

O lea faaaliga o lo o faaauau mai se tasi foi o faaaliga faapea sa faia i le tausaga na tea nei i Aukilani lava, ma le faamoemoe o le malo ina ia faatosina mai kamupani tetele o lo o i Aotearoa, aemaise o le faatauina atu o oloa gaosi i Samoa ma le faaleleia o le atinae tau turisi.

 

E silia i le 20 kamupani ma pisinisi o lo o auai atu i lea faaaliga o lo o faalauiloa ai oloa eseese e aofia ai le ava malosi po o le pia a le kamupani o le Samoa Beverage Company a Ah Liki, le Taula ma le Sama, o le pia fou a le kamupani o le Vailima, le Vailima Pure, o le koko, sukalati, kofe, honey, peepee ma isi oloa o lo o gaosia i totonu o le atunuu.

 

SIITIA FESOASOANI MALO MO PISINISI TUMAOTI

 

Ua siitia nei le fesoasoani tupe a le malo ua tauaaoina atu i lenei tausaga mo le au faipisinisi ma faalapotopotoga tumaoti i le atunuu. E $50,000 ua siitia ai lea fesoasoani i le $150,000 ua i ai nei, mai le $100,000 sa i ai i le tausaga ua tuanai.

 

O le aofaiga fou ua i ai nei na faaiugafonoina e le Kapeneta ma auina ane ai i le Tala o le Tupe a le malo. Na molimauina le agaga faafetai a faauluulugaa le au faipisinisi ma faalapotopotoga tumaoti ina ua tauaao atu lea fesoasoani a le malo i se sauniga faapitoa na saunoa aloaia ai le alii sui palemia, le susuga Fonotoe Nuafesili Pierre Lauofo, ma ia faailoa le taua o le sao o le au faipisinisi ma faalapotopotoga tumaoti i le atinaeina o le tamaoaiga o le atunuu.

 

Na ia faaalia, o le seleni ua faamatuu atu e agai tonu lea i le faaleleia atili o tomai ma le silafia o tagata faigaluega, faapea le faaleleia o mea e faatino ai galuega.

 

FALEPUIPUI I LE FAAOOLIMA MATAGA

 

Ua lapataia malosi e Faamasino Vui Clarence Nelson o le Faamasinoga Maualuga i latou o lo o faatinoina pea uiga mataga ma sauaga faafeusuaiga i tamaitai aemaise o teineiti laiti, o le a le tuu avanoa lava le Faamasinoga ia i latou.

 

O lea lapataiga na fofogaina e Faamasino Vui i le lauina o le faasalaga o se tama e 74 tausaga le matua, na faamaonia e le Faamasinoga ona moliaga o le faaoolima mataga i se teineititi o lona lava aiga. Ua faasalaina nei lea tama i le 18 masina i le falepuipui. Na saunoa FaamasinoVui, ua le silasila lava le Faamasinoga i se isi itu tusa lava po o le matua o le ua molia, ae o se tulaga na faaalia e le alii faamasino, ua maitauina le faatupulaia o ia ituaiga solitulafono o uiga mataga e le tatau ona tulai mai, ma o lo o taulamua ai le itupa o alii aemaise o tama matutua.

 

E le o mafai ona faailoa faalauaitele le igoa ma le nuu o lea tama e pei ona faatonuina e le Faamasinoga ina ia puipuia ai le teineititi o lo o aafia.

 

LUA TAUSAGA I LE TOESE I LE FAAOOLIMA MATAGA

 

E lua ma le afa tausaga ua faasalaina ai nei i le falepuipui se tama e 46 tausaga le matua o Joe Taupi mai Fagamalo ina ua ia ioeina ma faamaonia foi e le Faamasinoga lana solitulafono o le faaoolima mataga. Na faaalia i faamaumauga a le Faamasinoga e faapea, e faalua ona taumafai lea alii e faatosina le tama teine a lona tuafafine la te faiaiga.

 

O le tulai faalua mai o lea solitulafono na logoina ai loa e le tamaitai na aafia lona aiga lea sa nofo ai ma faigaluega, i Vaivase-uta. O lea tamaitai e 25 tausaga le matua. E lei talia e le Faamasinoga le talosaga a le loia o lo o tulai mo le ua molia ina ia tuuina atu se faasalaga mama, ona o le faasua’ava o le ua molia na mafua ai ona ia faia lea solitulafono.

 

TAOFIA E LEOLEO SEVE TONY HILL

 

Ua taofia nei i lalo o le vaavaaiga a leoleo le alii sa avea muamua ma komesina o le Pulega o Tinei Mu, o Seve Tony Hill. O le faaiuga lea a le Faamasinoga na faailoa e le tamaitai faamasino o Mata Tuatagaloa, e tusa ai ma le tolaulauina o iloiloga o lenei mataupu.

 

Na faailoa e Faamasino Tuatagaloa, ua faamalieina uma manaoga o le tulafono e tusa ai ma moliaga o lo o molia ai le ua molia i le maea ai o iloiloga o mau a i latou uma na molimau.

 

Ua tolopo nei lea mataupu i le aso Faraile o le vaiaso a sau lea o le a lauina ai le faaiuga a le Faamasinoga, ao le taimi nei e taofia o ia i lalo o le vaavaaiga a leoleo. Na faaalia, ua faaleaogaina le moliaga e tasi o le faaoolima ona o le talitonuga a le Faamasinoga, o lo o aofia lea moliaga i isi moliaga faasaga ia Seve.

 

Saunia: Lilomaiava Andrew Fa’asau, Naenae Productions