Ads by Google Ads by Google

TALA MAi SAMOA

AVE E LE TOOMAGA LE TEINEITITI SA SAUAINA

 

Ua tuuina atu nei i lalo o le vaavaaiga a le Toomaga mo e Puapuagatia le teineititi e 18 tausaga lea sa sauaina e se alii e 26 tausaga ma faia i ai ni uiga mataga faafeusuaiga.

 

E pei ona lipotia muamua i a tatou tala, o lenei teineititi na ave e le ua tuuaia, o Sueni Galumalemana o Mulivai, Safata ma Maagao, i se nofoaga tuufua ma faapea ona ia pueina ai ata o lea teineititi ‘ao ia faaoolima ia te ia ma faia ai e le ua molia ni faiga mataga faafeusuaiga. Na pue uma e lea alii ia gaioiga ma sa ia tuuina i luga o le upega tafailagi o le YouTube lea na maua ai e tagata o le aiga o lea teineititi ma faapea loa ona latou logoina leoleo.

 

O le aso 4 o Novema na tulai ai lea alii i luma o le Faamasinoga Maualuga ma o lo o tatala nei o ia i tua e faatali ai lona faamasinoga. Na faaalia e le peresetene o le Toomaga mo e Puapuagatia, le susuga Lina Chang, o lo o vaavaaia ma le totoa lea teineititi mo le 24 itula ina nei taumafai e pule i lona ola. Na faaalia le le fiafia o Faamasino Vui Clarence Nelson i nei ituaiga solitulafono faasaga i teineiti laiti na ia taua ua “sasao faaafi” i lenei vaitau.

 

FAATE’A E SE AFIOAGA SE TEINEITITI E 13 TAUSAGA

 

E 13 tausaga o se teineititi mai le afioaga o Eva ua tuuina atu foi i lalo o le vaavaaiga a le Toomaga mo e Puapuagatia ina ua faate’a e le fono a tamalii ma failauga o Eva, i tuuaiga i lona taumafai e faalata ni taulelea talavou o le nuu e faia ni uiga mataga faafeusuaiga.

 

Ua molia nei ni alii talavou se toalua i lo la faia o ni sauaga faafeusuaiga i lea teineititi. Na faauluina ia moliaga ina ua maea ona suesueina e leoleo se fono a matai o le afioaga o Eva, lea sa tasi ai finagalo o tamalii ma failauga o le afioaga ina ia faate’a lea teineititi. Na faaalia, na aami e le fono ia alii talavou e toalua ma sa eseese a la faamatalaga sa faia.

 

Peitai e lei tuuina se avanoa i le teineititi na aafia e faia ai sana faamatalaga. Ua tuuina atu nei lea mataupu i leoleo mo a latou suesuega ma o le a faauluina i le Faamasinoga i se taimi o le faaiuga o le tausaga nei.

 

MAUA LE PAGOTA O LO MASALOMIA I SOLITULAFONO

 

Ua maua e leoleo le pagota na sola ese mai le toese i Tafaigata lea o lo o masalomia i le faalavelave na tatui ai e se tagata se alii faipisinisi i se tamai agaese i Palisi, i le po o le aso Tofi o le vaiaso na tea nei.

 

Na faaalia e le sooupu a leoleo, le susuga Fauono Talalelei Tapu e faapea, o lo o faagasolo nei suesuega e faamaonia ai lea tulaga. E pei ona lipotia foi i a tatou tala, na tuliloa e lea tama faipisinisi se tagata sa ulufale faamalosi i lona fale ma taumafai e gaoi ana mea totino, ma na maua e lea tama faipisinisi le gaoi ina ua oo atu a la tuliga i se pa uaea sa si’o ai le fanua.

 

Peitai sa faateia le tama ina ua osofaia o ia e lea tagata i se tamai agaese. Na lipotia mai le auina atu o lea tama faipisinisi i le falemai ma manua i lona papatua ma lona manava ina ua osofaia e lea tagata.

 

Na faaalia e Fauono, sa mafai ona latou maua le pagota o Baker Pesaleli Faaleleiga, ina ua logoina i latou e se tasi o aiga mai Faleatiu ma o le aoauli o le aso Gafua na sei mavae atu nei, na vaaia ai leoleo e silia ma le to’a 15 o latou osofaia se nofoaga i Savalalo lea na maua ai lea pagota. E le o le taimi muamua lea ua sola ese ai lea pagota mai le toese i Tafaigata.

 

 TAUTUA SAMOA: LE FAAALOALO LE PALEMIA I LE NCC

 

Ua faitioina e le vaega faaupufai o le Tautua Samoa le alii palemia, le susuga Tuilaepa Lupesoliai Sailele Malielegaoi, ona o lana tali i se talosaga a le Fono a Ekalesia Soofaatasi (NCC), ina ia taofia galuega faakonekarate a kamupani mai Saina o lo o faatinoina i aso Sa. Na faaalia e le Tautua Samoa, o le faatinoina o galuega mo le fausia o auala ma fale i aso Sa na amata ina ua taunuu mai kamupani mai Saina i Samoa.

 

Na saunoa le taitai o le Tautua Samoa, le afioga Palusalue Faapo II, ua leva ona fautuaina e le latou vaega faaupufai le malo ina  ia taofia le toe faatinoina o ia galuega i aso Sa, ma ua tuuina atu foi lea fautuaga i le alii palemia e le Fono a Ekalesia Soofaatasi. Peitai na tali le alii palemia, afai e taofia le faatinoina o ia galuega, ua tatau foi la ona taofia isi tautua e pei o tautua faasoifua maloloina, o tautua e maua ai le suavai taumafa, ma tautua tau femalagaiga. Na faaalia e Palusalue, e foliga mai e le mamafa i le alii palemia lea mataupu.

 

“Ou te le iloa po o le fia malie o le alii palemia ua ala ai ona ia faia ia ituaiga lafoga,” o le faagaulemalie lea a Palusalue. “Ae e tatau ona ia manatua, oa ia o le taitai o le atunuu lenei ma o se mataupu ma’ale’ale le mataupu lenei aua o Samoa e faavae i le Atua ma talitonuga faakerisiano.” Na ia faaalia le le fiafia o le latou vaega faaupufai ona e foliga mai e le mamafa i le alii palemia le fautuaga a le Fono a Ekalesia Soofaatasi, o auauna a le Atua.

 

Lilomaiava Andrew Fa’asau, Naenae Productions