LAGOMAU LE TAMAITITI NA MALIU I LE PASI

O le afiafi o le aso Lua na sei mavae atu nei na lagomau ai se tamaititi e 12 tausaga le matua na maliu ina ua aafia se vaega o lona ulu i le keli o se loli sa fepasia’i ma le pasi sa malaga ai o ia ma lona tina, i le taeao o le aso lava lea.

O le ua maliu o Anthony Seumalo Samoana mai Lalomauga, sa sii i lona tina ma moe ae faatautau i fafo lona ulu i le faamalamalama o le pasi ao malaga mai i Apia. O se nofoaga e le mamao mai le auala laupapa i Solosolo na tupu ai le faalavelave ina ua fepasia’i le pasi ma se loli tiliva sa agai atu i le isi ituala, ma o le latalata tele o le loli i le pasi, na lavea ai le ulu o lea tamaititi i le keli o le loli.

E tupu lenei faalavelave o lo o sii o ia i vae o lona tina ma sa meia lea tina i le faalavelave ua tupu i si ona alo. O le ua maliu sa aoga i le vasega 7 i le Aoga a le Ekalesia Aso Fitu i Lalovaea. Sa faapea ona suesueina e leoleo ia le ave taavale o le pasi ma le loli i le mafuaga o lea faalavelave.

PU’E SE ATA O FAIA UIGA MATAGA I SE TEINEITITI

E 26 tausaga o se alii o lo o tuuaia i lona faia o ni uiga mataga faafeusuaiga i se teineititi laititi ae pu’e i se mea pueata, ona tuu lea o lea ata i luga o le initaneti, ua faataga e nofo i lona aiga seia toe valaauina e tulai i luma o le Faamasinoga. O le vaiaso nei na tulai ai Sueni Galumalemana o Mulivai, Safata i luma o le Faamasinoga Maualuga ma sa teena e ia ona moliaga o le faia o uiga mataga faafeusuaiga i se teineititi laititi.

O ia moliaga e mafua mai i se ata video na ia pueina o lo o faaalia ai lona sauaina o lea teineititi ma ia faamatauina ai o ia e faatino ni uiga faafeusuaiga. O lea ata video na ia tuuina (upload) i luga o le nofoaga tau fesootaiga i le upega tafailagi o le YouTube, lea e mafai ona maimoa ai so o se tasi. Na maimoa ai tagata o le aiga o lea teineititi i Niu Sila i lea ata video, ma sa latou logoina leoleo i Samoa e uiga i lenei ata. Na tulai Galumalemana i luma o Faamasino Lesatele Rapi Vaai i le amataga o le vaiaso nei ma ia teena ai moliaga faasaga ia te ia.

Ua faatonuina o ia e nofo ai i lona aiga i Maagao seia toe samania o ia e tulai i luma o le Faamasinoga ia Mati 10, 2014.  O lo o faasaina foi ona oo o ia i lona aiga i Mulivai, Safata.

TAPA E LE FOFOGA FETALAI SE MANATU FAALETULAFONO

Ua tapa e le Fofoga Fetalai o le Palemene, le afioga Laauliolemalietoa Leuatea Polataivao Fosi, le manatu faaletulafono o le Loia Sili i aia tatau faatemokarasi o le atunuu lautele i faamatalaga o so o se lipoti po o se tusitusiga e faataatia i le laulauafono a le Palemene. Na faalia lea tulaga e le Fofoga Fetalai i se feiloaiga ma le au tusitala i le aso Lua o le vaiaso nei, na taloina e faamalamalama ai sana faasilasilaga na faia i le faaiuga o le vaiaso na tea nei, lea na ia lapataia ai le au tusitala ma le au faasalalau ina ia aua le toe lipotiina se faamatalaga e faatatau i se mataupu e lei lauliliuina e le Palemene.

O lea lapataiga na mafua ina ua lolomiina e le nusipepa o le Samoa Observer se tala e faatatau i le lipoti a le Pule ma Suetusi Sili a le malo e faatatau i le pa’u o tupe maua a le Ofisa o Fanua a le malo. Na faaalia e La’auli, o lea mataupu e lei soalaupuleina pe palotaina foi i taualumaga a le Palemene, ao lea ua lomia ma faia i ai manatu o le lautele. O lo o finau le fofoga fetalai, e le tatau ona lipotia e le au tusitala ma le au faasalalau so o se mataupu o lo faataatia ese e le Palemene ma e lei soalaupuleina ma palotaina.

Fai mai a ia, o lona tiute i lona tofi fofoga fetalai le puipuia o aia tatau o le Palemene e soalaupule ai so o se mataupu ae lei faatagaina le atunuu lautele e faaalia o latou manatu. E ui i lapataiga na faalauaitele e le fofoga fetalai i le faaiuga o le vaiaso na tea nei, na lomia lava e le Observer le lipoti atoa a le Pule ma Suetusi Sili.

SUAVAI FAI VAVEGA, NA O LE $2 I LE LITA

Ua amata faatauina nei e se tasi o ekalesia laiti i totonu o le atunuu le suavai taumafa ua latou faaigoaina o le “suavai fai vavega” mo le $2 i le lita. O le aso Toonai na tea nei na tatala aloaia ai lea tautua tau suavai fou a le Ekalesia a le Atua i Samoa i Vailoa, e faamanuiaina ai lona taunuu mai i Samoa.

O lea suavai fai vavega na aumai i Samoa e le tina o Lemoe Futi, o se tina e 49 tausaga e toalima ona alo, ma e alala o ia i Niu Sila. Na faamaonia e lea tina e faapea, o lea suavai fai vavega o le suavai taumafa masani lava lea e maua mai le paipa. Peitai, e muamua tuu lea suavai paipa i totonu o se masini faapitoa e fufulu faafitu ai. Na faaalia e Lemoe i le mamalu o le au valaaulia e faapea, o le mafuaga ua ia talitonu ai i lea suavai fai vavega, ona o ia sa matua mafatia i le nunu ma sa tau le mafai ona ia savali ona o le tiga o lona tino. Peitai o le tausaga e 2011 na ia malaga ai i se faigamalaga a le kamupani sa faigaluega ai i le atunuu o Filipaina.

O le lua o aso talu ona taunuu i Filipaina, sa ave ai o ia e nisi o tagata sa latou mafuta i lo latou aiga. Sa maitauina e ia tagata o ia milimili ona vae sa aafia i le nunu ma sa avatu e ia tagata se ipu vai na te inuina. Sa ia fai i ai e le inu o ia i ni vai mai le paipa, ae sa fai atu ia tagata, e tago e inu e malosi ai lona ma’i. Na faaalia e le tina o Lemoe e faapea, e tolu ana ipu vai sa inu, ma e ala ifo o ia i le aso na sosoo ai, ua te’a le tiga o lona tino ma ua te’a foi le nunu. Fai mai a ia, atonu o le mafuaga lea na taitai ai o ia e le Atua i lea malaga i Filipaina, ma o lea ua ia manao ai e tufa atu lea suavai fai vavega i so o se tasi o lo o moomia se fesoasoani.

Saunia: Lilomaiava Andrew Fa’asau, Naenae Productions