Ads by Google Ads by Google

Molia Stepfather fai uiga mataga lana fanau fai e to’alua

O le vaiaso nei na taofia ai e leoleo i le toese i Tafuna se tama e lata i le 60 tausaga le matua, ona o tuuaiga i lona faia lea o uiga mataga i le fanau tama’ita’i a le fafine o lo o la nonofo, amata mai i se taimi o le tausaga e 2011, 2012 atoa ai ma se taimi o le tausaga lenei 2013.

 

O lenei mataupu na tofu atu i le Ofisa o Leoleo, ina ua logo e se tagata faigaluega a le Ofisa o Tautua ma Auaunaga Lautele (DHSS) le ofisa o leoleo mo se fesoasoani, ma tofia ai loa le tamaitai leoleo ia M. Alofaituli na te suesueina lenei mataupu.

 

E tusa ai ma faamaumauga a le faamasinoga o lo o taua ai e faapea, o tama’ita’i laiti e to’alua o lo o aafia i lenei mataupu, o le fanau lea a le fafine o lo o nonofo ma le ua molia, ma e aafia i laua i gaioiga a le ua molia ua 10 tausaga o le isi ae 8 tausaga o le isi.

 

Na taua e le tamaitai e 10 tausaga i leoleo e faapea, o le faalavelave muamua na tulai mai i le 2011 a’o i ai o ia i le Vasega 4, ina ua tuua mai lana aoga ma alu atu ai i totonu o lona potu e sui ona lavalava, ae faafuase’i ai loa ona alu atu le ua molia i totonu o lona potu ma una’i o ia i luga o le moega, ae tago tago atu i ona itutinosa faapea ai ma lona faia o isi uiga mataga ia te ia.

 

Ina ua maea ona faia e le ua molia uiga mataga i le tamaitai na aafia, sa ta’u e le tamaitai na aafia i lona tina le mea sa tupu, ma e e atu ai le fafine i le ua molia e taofi lana mea o lo o fai, po o lona viliina o leoleo.

 

Na taua e le tamaitai na aafia i leoleo e faapea, o le faalavelave lona lua na tula’i mai i le 2012 ina ua 11 tausaga ona tausaga, i le taimi o le summer i se tasi o aso Sa, ina ua alu atu le ua molia i totonu o lona potu ma amata ona tago tago atu i ona itutino, sosoo ai ma le kisi atu ia te ia, ae sa taumafai e tetee ma fai i ai - soia.

 

Ina ua maea lea gaioiga a le ua molia e pei ona taua i faamaumauga a le faamasinoga, sa ta’u e le tamaitai na aafia i lona tina le mea sa tupu, ona e e lea o le fafine i le ua molia ma fai i ai e taofi lana mea o lo o fai po o lona viliina leole.

 

O le isi faalavelave e pei ona toe manatua e le tamaitai na aafia, na tulai mai i se taimi o le tausaga 2012 ina ua faatoa tuua mai lana aoga i le isi aso, a’o le taimi lea o lo o pisi ai lona tina i le kukaina o le meaai o le afiafi, a’o nofonofo na o ia i le potu malolo, na alu atu ai foi le ua molia ma tago tago atu i lona fatafata ma kisi atu ia te ia, ae sa ia tu i luga ma una’i ese o ia mai le pa’i atu ia te ia, ae na fai atu le ua molia ia te ia, “afai ete mana’o e tu’u la’u amio o lo o fai, o le a ou taofia.”

 

Na logo e le tamaitai na aafia i lona tina gaioiga a le ua molia sa fai atu ia te ia, ona e e lea i ai o lona tina ma fai i ai e taofi lana mea o lo o fai po o lona viliina o leoleo.

 

O le faalavelave lona fa na tula’i mai i le aso Faraile na sosoo ma le Lotu a Tamaiti na te’a atu nei, ina ua tuua mai le aoga a le tamaitai na aafia ma nofonofo ai na o ia i le potu malolo, ao pisi lona tina i le kukaina o le meaai mo le afiafi, ae alu atu foi le ua molia ma tagotago atu i lona fatafata, ma kisi atu ia te ia, peitai sa ia una’i ese ona lima.

 

Na taua e le tamaitai na aafia i leoleo e faapea, ina ua faia se talanoaga a le latou aiga i le afiafi e faatatau i amioga a le ua molia o lo o faia ia te ia, sa teva le ua molia i fafo ma le fale, mulimuli ane na toe fo’i atu ma faatoese i lona tina.

 

Na taua e le tamaitai e 8 tausaga i leoleo e faapea, o le tausaga e 2012 na faia ai e le ua molia ni uiga mataga ia te ia a’o 7 ona tausaga, ina ua kisi atu ia te ia. Ina ua maea ona faia e le ua molia le gaioiga i le tamaitai e 8 tausaga, sa tago loa le tamaitai lea ma faamatala i lona uso matua le mea sa tupu.

 

Ina ua fesiligia e leoleo le ua molia, sa ia ioeina ai lona tagotago i le fatafata o le tamaitai matua atoa ai ma lona kisi ia i laua uma e toalua i le tele o taimi.

 

E $50,000 le tupe lea ua faatulaga e le faamasinoga e totogi ona faatoa mafai lea ona tatala le ua molia i tua mai le toese.