Ads by Google Ads by Google

Molia i Uosigitone se fafine mai Samoa i le fasioti tagata

O se tama’ita’i e lei leva ona malaga mai i Samoa ma faamautu i le laumua i Uosigitone ona o le fia auai i ni aoaoga e avea ai o ia ma Tauposa, ua molia i Amerika i le solitulafono mamafa o le fasioti tagata i le tulaga muamua, ona o le fa’alavelave lea na maliu ai lana pepe faatoa fanau e suafa ia Josepn, e pei ona taua mai i ni ripoti mai vaega faasalalau i le laumua.

 

I ni faamatalaga mai le Fa’amasinoga Faaitumalo i le laumua i D.C.  o lo o taua ai e faapea,  o le tama’ita’i ia Sosefina Amoa, 26 tausaga le matua, na tuuaia i le aso Lulu o le vaiaso na te’a nei i le solitulafono mamafa o le fasioti tagata i le tulaga muamua, ma faatulaga ai loa le $200,000 e totogi ona faatoa mafai lea ona tatala o ia i tua, e faatalitali ai taualumaga o lana mataupu lea o lo o iloilo e le faamasino ia Karen Howze.

 

I se pepa o faamatalaga na tuuina mai e le Ofisa o Leoleo i Metropolitan i Uosigitone, sa taua ai le faanatinati atu o se fafine ma se pepe faatoa fanau i le falema’i i le i le lua vaiaso ua fano, e lei umi ona taunuu le pepe i le falema’i ae faalauiloa mai loa e foma’i le uma o lona ola.

 

Na taua e Amoa i leoleo ina ua fesiligia o ia e faapea, ina ua fanau lana pepe i le aso 10 Oketopa, 2013, sa ia tuu se ie i lona isu ma le gutu e taofi ai lona leo ina ua amata ona tagi, ona o lona fefe ne’i iloa e Tauposa.

 

I se ripoti mai le Washington Post, sa taua ai e Amoa le fanau o lana pepe i se potu i totonu o le nofoaga autu a le Roman Catholic i Matu i Sasa’e o Uosigitone.

 

O le aso na sosoo ai na auina atu ai loa e se Tauposa mai le vaega o le ‘Little Sisters of the Poor’ le pepe i le falema’i i le aso 11 Oketopa, ma faailoa mai ai loa o le pepe ua maliu.

 

E tusa ai o se faamatalaga a Amoa na fai i leoleo, sa ia taua ai lona mafaufau muamua e lafoa’i lana pepe i le lapisi, mulimuli ane toe sui lona mafaufau, ona ia afifi lea o le tino o le pepe i se ie ae tuu i totonu o se ato.

 

I se ripoti na faasalalauina e le ala ata o le NBC4-TV, sa latou taua ai le amata aoaoina lea o Amoa i aoaoga ina ia avea ai o ia ma Tauposa mo le vaega a le ‘Little Sisters of the Poor’.

 

Na taua foi i lea ripoti e faapea, e laititi se vaega o le toto sa maua e leoleo i totonu o le potu, ma e ono masalomia sa fufulu e Amoa le potu i le taimi na mae’a ai ona fanau i lana pepe.

 

Na taua foi i se ripoti e faapea, e tusa ai o se faamatalaga sa tuuina atu e Amoa i leoleo, o le masina o Fepuari na gata ai ona toe alu lona palapala tau tama’ita’i (tulou), na te le’i faailoaina fo’i i Tauposa o le vaega a le ‘Little Sisters’ lona auai ai i tulaga tau feusuaiga i se taimi ua mavae.

 

E le’i finagalo le vaega o le ‘Little Sisters of the Poor’ e tuuina mai sa latou fa’amatalaga e uiga i lenei mataupu, ona o lea ua i aao o le tulafono, sei vagana ai lo latou faapea mai, o lo o latou tatalo mo Amoa ma le pepe na aafia i lenei mataupu.

 

fa’aliliu: Ausage Fausia