Ua faafetaia e ni isi o le aufai pisinisi pasi i le atunuu le agaga atoa o taumafaiga a le vaega o le Ofisa o Leoleo o lo o gafa ma le puipuiga o le saogalemu (DPS Office of Highway Safetry), i le naunau lea e saili auala e faatumauina ai pisinisi o pasi la’u pasese i le atunuu, ina ia mafai ai pea ona fesoasoani nei pisinisi i le tausiga o aiga ma le atina’e o fanau i totonu o aiga i le atunuu.

Na taua e se tasi o alii faipisinisi pasi ia Fuata’i Amituana’i e faapea, talu ai e eseese fausaga o pasi i Amerika Samoa ma Amerika, e tatau ai i le Ofisa o Leoleo ona vaavaai i ni auala e faatumauina ai pea pisinisi pasi a tagata o le atunuu, ona o le isi lea auala o lo o maua ai tupe e tausi ai aiga ma tautua nuu ma ekalesia.

O le fonotaga a le Ofisa o Leoleo ma le aufaipisinisi pasi ma taavale la’u uta sa faia i le potu fono i le maketi fou i Fagatogo i le aso Faraile na te’a nei, sa toe faamamafa ai e sui o le Ofisa o Leoleo tulafono e faatatau i fusipa’u mo ave pasi, faitoto’a e faaaoga i taimi o faalavelave faafuase’i, fausaga o pasi, atoa ai ma isi mea e manaomia e le ave taavale na te faafoeina le pasi po o le loli la’u uta mamafa.

Na taua e le tina ia Akenese Togi o Leone e faapea, talu ai o pasi i Amerika Samoa o lo o fausia lava e tagata Samoa, e tatau foi la ona i ai se tulafono e fetaui ma le ituaiga fausaga o pasi ua i ai nei, nai lo le faaaoga o tulafono mai le malo tele o lo o faatatau i pasi o lo o fausia i fausaga faaonapo nei.

“O tatou pasi iinei o lo o fausia i laupapa, afai la e tele atu pasi e le ausia le tulaga o le tulafono mo le saogalemu, lona uiga e tatau ona i ai se isi tulafono e fau faapitoa ina ia talafeagai ma le fausaga o pasi ua i ai nei i Samoa,” o le saunoaga lea a Togi.

Na faafetaia e Togi fuafuaga alualu mamao a le Ofisa o Leoleo, e pei ona latou taumafai ai ina ia saili se auala e mafai ai pea ona faaauau pisinisi pasi a ni isi o le atunuu, a ia faavae i luga o le tulaga saogalemu.

Na taua e le susuga a Fred Scanlan o lo o faauluulu i ai le Ofisa o le Highway Safety a le Ofisa o Leoleo, e le tete’e le Ofisa i pisinisi pasi ae o le latou tiute ia mautinoa le saogalemu o tagata uma.

“E le tete’e le Ofisa i a outou pisinisi, pau le tulaga matou te naunau i ai, ia fau se tulafono ina ia mautinoa e malu puipuia ai tagata uma o le atunuu e faaaogaina le tautua a pasi,” o le saunoaga lea a Scanlan.

Na taua foi e Scanlan e faapea, o le tulafono o lo o i ai i le taimi nei, e ono faaee atu ai le avega mamafa i le malo pe afai ae tulai mai se faalavelave i se pasi ae maliliu ai ni tagata, aua e i ai le avanoa e su ai e aiga o tagata o le a maliliu le malo ona o le faatamala e faamalosia tulafono i le saogalemu i luga o pasi.

O le tulafono i le tatau lea ona fai le fusi pa’u a le ave pasi, o se tulafono ua leva ona i ai e pei ona saunoa Scanlan, ae o le faafitauli o lo o tulai mai, o fausaga o pasi o lo o i ai i le atunuu e le mafai ona faapipii ai se fusi pa’u mo le ave pasi, ona o le laupapa lea e fausia ai pasi iinei, ae o le u’amea o lo o fausia ai pasi i Amerika.

Saunoa Scanlan, o isi ia auala o lo o vaavaai i ai le latou ofisa, ina ia mautinoa e galulue faatasi i latou ma le au faipisinisi i auala e fausia ai se suiga i le tulafono ina ia talafeagai ma le fausaga o pasi ua i ai.

I le faaiuga o le fonotaga i le vaiaso na tea nei, na taoto ai loa ma le fautuaga i le aufaipisinisi pasi ma taavale la’u uta mamafa, i le tatau lea ona tofia se Komisi latou te vaavaai i auala e faaleleia atili ai le tulafono mo le saogalemu o pasi ma taavale la’u uta i le atunuu.