Ads by Google Ads by Google

Toso teineititi 7 tausaga i le ma’umaga ae fai i ai uiga mataga

O le alii e 49 tausaga le matua lea na tu’uaia e le malo i lona toso o se teineititi e 7 tausaga le matua i se ma’umaga ae fai i ai uiga mataga e pei o le tagofia o ona itutinosa, ua ia ta’utino i le fa’amasinoga maualuga e fa’amaonia tu’uaiga a le malo fa’asaga ia te ia.

 

O le moliaga mamafa lea ua ta’usala ai e le fa’amasinoga maualuga le ali’i o Fiapita Fa’alogo i lona faia o uiga mataga i se teineititi e laititi i lalo o le tulafono, e mafai ona faasala ai o ia i le toese i Tafuna mo le olaga atoa, pe faa faasala fo’i i se faasalaga faafalepuipui e i le va o le 10 e o atu i le 30 tausaga le umi.

 

I le tali ioe ai o Fa’alogo i le moliaga e pei ona ta’usala ai o ia i lalo o se maliliega na latou sainia ma le malo ma ua talia fo’i e le fa’amasinoga, sa ia ta’utino ai e faapea, i se taimi o le aso 20 Ianuari, 2013 i Amerika Samoa, sa ia uu ai le lima o se teineititi e 7 tausaga le matua, ona ia toso lea aga’i i se ma’umaga ma le faamoemoe na te faia i ai ni amioga mataga ina ia faamalie ai ona lagona tu’inanau.

 

Na ta’utino Fa’alogo e faapea, o lana gaioiga sa faia i lea aso i lea teineitiiti sa le tusa ai ma ala o le tulafono.

 

E tusa ai ma faamaumauga a le faamasinoga o lo o taua ai, o le mataupu lenei na tofu atu i le Ofisa o Leoleo i Leone ina ua faila e le grandmother a le teineititi na aafia sana tagi faasaga ia Fa’alogo, ona o uiga mataga sa ia faia i lana granddaughter. E tuaoi le fale o Fa’alogo ma le fale o le teineititi na aafia i lenei mataupu.

 

O le fa’alavelave na tula’i mai ina ua alu atu le teineititi e faaaoga le latou fale taele (tulou), ae faafuase’i ona alu atu le ua molia ma uu lona lima ae toso aga’i i le ma’umaga.

 

E ui sa musu le teineititi e ala i lona taumafai e toso ese lona lima, ae sa faaauau pea ona toso e le ua molia le lima o le teineititi aga’i i le ma’umaga, ma ia faia ai loa uiga mataga e pei o lona sogi atu i le teineititi ma tagofia ona itutinosa, ae na taofi faafuasei e le ua molia ana gaioiga sa faia ina ua ia faalogo atu ua tau valaau atu solo le tuagane o le teineititi na aafia i le igoa o lona tuafafine.

 

Na tuua e Fa’alogo le teineititi na a’afia i le ma’umaga ae alu i le atoa ina ua alu atu le tuagane o le teineititi e su’e lona tuafafine, ma logoina ai loa e le aiga le Ofisa o Leoleo mo se fesoasoani.

 

Ina ua pu’e faapagota e leoleo le ua molia ma auina atu i le ofisa mo suesuega, sa faalogoina le malosi o le manogi ‘ava malosi sa alu atu i lona tino.

 

Ua sauni loia e finau i le faamasinoga mo se faasalaga mama mo le ua molia, peitai ua malamalama Fa’alogo, tusa lava pe finau loia i le faamasinoga mo se faasalaga mama mo ia, e pule le faamasinoga pe talia pe teena lea talosaga.

 

Ua malamalama fo’i Fa’alogo, e le mafai ona toe suia lana tali ioe ua tuu atu i le fa’amasinoga, pe afai e tuu mai se faasalaga a le faamasinoga ae le tusa ai ma lona mana’o.

 

O lo o taofia pea Fa’alogo i le toese e aunoa ma se tupe ua faatulaga e tatala ai o ia, e fa’atali ai le aso 15 Novema lea ua faatulaga e lau ai lona fa’asalaga.

 

O le alii loia fautua ia Joel Shriver o lo o tula’i mo le ua molia i lenei mataupu, ae o le tamaitai loia ia Julie Pasquale o lo o tula’i mo le itu a le malo.

 

O le afioga i le faamasino sili ia Michael Kruse sa iloiloina lenei mataupu, i le lagolagosua a afioga i alii faamasino lagolago ia Logoai Siaki ma Fa’amausili Pomele.