Ads by Google Ads by Google

Lotu Tamaiti Mativa

ma le le Tagolima

 

Na fa’amatala e ni isi o matua le Lotu a Tamaiti o lenei tausaga, “o se Lotu Tamaiti e tumu i le mativa ma le le tagolima o aiga,” ona o le tele o tulaga fa’aletonu i le itu tau tupe ua fetaia’i ma le to’atele o aiga i totonu o le atunu’u i le taimi nei.

 

E lagona eseese le to’atele o matua na fesiligia e le Samoa News i lenei vaiaso e fa’atatau i tapenaga a aiga ao alo atu le fanau mo le Lotu a Tamaiti i le aso Sa nei.

 

O ni isi o matua sa latou faailoa lo latou sauni e fai le mea sili mo nai fanau i lo latou aso fiafia i lenei tausaga, ae o isi matua sa latou taua le faigata ona faatino o manaoga mo nai fanau, ona o le tulaga utiuti o le itu tau tupe i totonu o aiga.

 

Na taua e ni isi o matua e faapea, e le avea le faaletonu o le tamaoaiga i totonu o le aiga ma itu e taofia ai le faia o le mea sili mo fanau, ae o ni isi o matua sa latou taua e faapea, o aso faapenei e iloa ai le matua sa tapena mai i le tele o aso, e ala i le faaputu o tupe e faatau ai lavalava ma mea uma e manaomia e le fanau mo lo latou aso fiafia.

 

O se tasi o tina matua sa galue i le Ofisa o Tagata Matutua ae ua fa’amalolo, sa ia taua ma lona fa’anoanoa tele tulaga pagatia ua feagai ma lona aiga i le taimi nei, ina ua le toe maua se tupe sa masani ona maua mai lana galuega e faatino ai manaoga eseese i totonu o le aiga.

 

“O le faanoanoaga sili ia te a’u i le aso Sa o lo o lumana’i nei, o le a leai se ofu fou ou te fa’atauina mo Jay ma Nesi e fai ai a la tauloto o le lotu a tamaiti,” o le molimau lea a le tina o Afatia Gago, e fa’atatau i le fanau e to’alua a lana tama teine o lo o latou nonofo faatasi.

 

E pei ona masani ai i le tele o tausaga ua mavae pe a latalata i le fa’amanatuina o le Lotu a Tamaiti, e vaaia le pisi o tagata faatau i le taulaga i le vaiaso atoa, aemaise lava le aso Faraile ma le aso To’ona’i lea e sosoo ma le aso Sa o le Lotu a Tamaiti, peita’i e le fa’apena ananafi ma lenei vaiaso atoa, ina ua vaaia le gaogao o totonu o faleoloa.

 

Na taua e se alii faipisinisi mai Asia e i ai sana faleoloa i Fagatogo e faapea, ua tele le suiga o faatauga i aso o le Lotu a Tamaiti i tausaga nei ma le tele o tausaga ua mavae.

 

“O tausaga ua mavae e pisi solo matua e faatau lavalava, seevae ma so o se teuga mo fanau, ae o tausaga nei ua tau leai ni matua e faatau, ai ona o le faaletonu o le tamaoaiga o le atunuu,” o le tala lea a le alii faipisinisi.

 

Ae i le isi itu o le tupe siliva, na taua ai e le susuga a Fred Lafitaga lo la fiafia ma si ona faletua, ina ua fetaui le maua mai o le la faamanuiaga mai le Food Stamp ma le vaiaso o le Lotu a Tamaiti i lenei vaiaso.

 

“Ua tele le fesoasoani a le Food Stamp i lo ma aiga, pau le mea e manaomia o nai ofu ma seevae mo le fanau, a o lea ua lava ma totoe le Food Stamp e tapena ai le to’ona’i o le Lotu a Tamaiti,” o le tala fiafia lea a le susuga ia Fred.

 

Ae ui i tulaga faaletonu i le itu tau tupe e pei ona taua e ni isi o matua, ae na taua e le afioga i le kovana sili ia Lolo Matalasi Moliga i lana feau faapitoa mo le Lotu a Tamaiti i lenei tausaga, “o fanau latou te faatumu loto o tagata ma le aiga i le fiafia ma le alofa.”

 

Na taua e Lolo e faapea, o le Lotu a Tamaiti i lenei tausaga, e le gata o le a aloaia ai e matua a latou fanau, ae momoli ai fo’i le faafetai i le Atua mo le fiafia ua ia foa’i i le atunuu atoa.”

 

I le maua po o le le maua o se ofu fou mo le aso Sa, e le o avea lea ma itu na taofia ai fanau mai le faamalolosi e o i aoga pese ma tala i afiafi o aso taitasi o lenei vaiaso, mo le tapenaina o a latou polokalame mo le aso Sa.

 

O ni isi o Ekalesia o lo o faatulaga tala faatino i aiga ae o isi Ekalesia o lo o faatino e le fanau pese ma tala o le aso Sa.

 

Tusa lava po o le a le auala e faatino ai pese ma tala o le aso o le fanau, o le agaga autu ia manuia lo latou aso fiafia i lenei tausaga. Ia manuia tele le Aso Sa o tamaiti.