TOGIOLA: O LE MALO E TEMOKALASI AE AMIO FAAKOMENISI
 

O le taumafai o le Matagaluega o Tupulaga Talavou & Tina e faaaoga faamalosi fale o lo o i luga o le fanua a le malo i Tafuna, lea ua lisi atu i le Iuni Lakapi a Amerika Samoa (ASRU), e faatino ai ni isi o a latou polokalame e aunoa ma le fesiligia o le Iuni i so latou finagalo, na taua ai e le Ta’ita’ifono a le Iuni Lakapi ia Togiola Tulafono lona fa’anoanoa tele i le ali’i kovana pe afai e taunuu ona latou faia lea fuafuaga e aunoa ma le fesiligia o se finagalo o le Iuni.

“E lagona lo’u faanoanoa i le alii kovana pe afai e o o sona fingalo i le tulaga lea, o le taumafai e faaaoga faamalosi fale ua maea ona i lalo o le lisi a le Iuni ma le malo e fai ai polokalame a le malo, e aunoa ma le fesiligia o se finagalo o le Iuni,” o le saunoaga lea a Togiola ina ua fesiligia e le Samoa News i le aso Lua o le vaiaso nei.

O le fanua e pei ona fesiligia i lenei mataupu, o le nofoaga tuai lea sa i ai le Ofisa tuai o Fitafita Tuai a le malo i Tafuna, lea ua lisi atu e le malo o Amerika Samoa i le Iuni Lakapi latou te faaaogaina mo le umi e 9 tausaga, 11 masina ma 30 aso.

Na taua e se sui o le Iuni Lakapi i le Samoa News e faapea, na faateia latou ina ua aga’i atu i le aso Gafua na te’a nei mo le latou fonotaga, ae taunuu atu o lo o galulue mai ai ni tagata faigaluega a le malo mo le faaleleia o ni isi vaega o fale sa faaleagaina.

Na faamaonia mai e le Fa’atonusili o le Matagaluega o Tupulaga Talavou & Tina ia Pa’u Fuiavailiili Roy Taito Ausage i le Samoa News i le aso Lulu na te’a nei, o le latou matagaluega lea sa galulue ai i le aso lea ma le faamoemoe, o le a avea le nofoaga lea ma nofoaga autu e faia ai a’oa’oga a le matagaluega ma tupulaga talavou faapea ai tina.

E le o tete’e le Iuni i se fuafuaga faapea a le malo e fia faaaoga ai le fanua ma le fale, pau le finagalo o le Ta’ita’ifono, afai e manaomia e le malo le fanua ma le fale, e tatau ona feso’ota’i muamua atu ae le o le fai i auala faamalosi.

“E faigofie lava le mataupu pe afai o le finagalo lea o le malo, fesootai mai ona matou feutana’i lea, ae le o le fai faapenei o matou, e le o matou o ni tagata faasamasamanoa, aua o faiga nei, e foliga mai o tatou o le faigamalo Faatemokarasi ae amio Faakomenisi,” o le saunoaga fa’ai’u lea a Togiola.

Ae na saunoa Pa’u e faapea, ua maea ona la feutana’i ma Togiola e faatatau i lenei mataupu, ma ua sauni fo’i le Matagaluega e tuuina atu sana ata faataoto (proposal) e fa’atatau i le fa’aaogaina o le fale.

Na faamanino atili e Pa’u e faapea, o le agaga o le matagaluega e pei ona tuuina atu i le alii kovana, e aoga tele le nofoaga lea e avea ma nofoaga autu e faatino ai a’oa’oga ma tupulaga talavou aemaise ai tina ma tama’ita’i, e le gata e lelei lona tulaga ae mafai fo’i ona faaaoga i le po.