Ads by Google Ads by Google

FAGOGO: POLOGA I LE ALOFA

[E toe faatalofa atu i le mamalu o le au faitau i lenei taeao, malo le soifua maua malo foi le onosa’i, ae alo mai loa o le toe sosooina lenei o le tatou tala faasolo lea na gata mai i le vaiaso na te’a nei i le taimi lea na tali atu ai Lisati i le fafine o Agalosa e fai ia Lasela e tele i’a o le sami.]

 

E alu fua lava le fafine o Agalosa i le fale ae pei lava e i ai se mea e faalavelave i lona mafaufau, o lona alofa lea i si ona tei o Lasela, ona e atagia mai i le tali a Lisati ua le toe i ai se isi avanoa o Lasela i le mafaufau o le tamaititi aoga mai Niu Sila. “Mea fo’i lea e maua i le kaa o legei keige o Lasela, lea la ua koe fo’i mai Lisaki ae misi aku ai ma loga avanoa oga o le fia osooso fua i lea koeaiga leoleopo le gifoa lakou ia o Meki,” o le tomumu lea a le fafine o Agalosa a’o savali ma lana faatau o pauna siusiu pipi e 4 ma le pepa falaoa mata e fai ai le kaleve o le afiafi. O le naunau o le fafine ina ia toe maua lava se avvanoa o Lasela i le mafaufau o Lisati, na mafua ai ona ia viliina Lasela ma pepelo i ai, o lea sa la talanoa ma Lisati ananei i le faleoloa o Pusa, ma o lo o mana’o la te talanoa ae le’i toe fo’i i lana aoga i Niu Sila.

 

“E mo’i lau kala siaula Agalosa,?” o le oso mai lea a Lasela ina ua vili i ai Agalosa, “Ioe, o laga kala lega ia a’u suga, ma lana faaupuga lua ke fekaugi gagei i luma o le fale o Meko i le kaimi o le Bingo a fafige o le Aualuma,” o le toe tali atu lea a Agalosa i le mau fesili a Lasela na saputu ane e faatatau ia Lisati. Na tapuni lemu e Agalosa lana telefoni feavea’i o le ‘Go Mobile’ sa faatau e lona to’alua e fai ma meaalofa mo lona aso fanau, ae ua savali atu nei i le umukuka e faati’eti’e le meaai mo le afiafi, ae o Lasela i le taimi lea, ua le iloga se mea e pisi solo ai ona lima i le tapenaina o lana ato atoa ai ma le tau fafauina o se pepelo tele lava i lana fasi toeaina le nifoa o Meki lea o le a manava atu, e fai i ai la te o e momoli o ia i lona tina ua maua tala o lo o ma’i.

 

“Kalosia ao maua pea so’u avagoa i le mafaufau o Saki, aua ou ke iloga ailoga ua faalogo la’u pele i gei mau kala ua sasalalau solo i le guu e faakakau ia maua ma Meki,” o mafaufauga faivavale ia o Lasela na saputu ane i lona mafaufau a’o pisi e tapena lana ato lavalava. E le’i teena e Meki le fanogta a lana manamea e fia alu e asi si ona tina o lo o ma’i, ae na talia e le toeaina ma lona talitonuga, e lelei foi le alu o Lasela e asi ona matua ma nofo ai mo sina vaiaso ona toe alu atu lea. Na ona taunuu lava o le taavale i luma o le faleoloa, tuu loa e Meki le $100 i le lima o Lasela ma le faaupuga, e faatau ai se meaai mo si ona tina. Na ona u mai lava o le keli o le pikiapu malepe a si toeaina leoleopo, faasasa’o loa ma Lasela i le pito nuu lea o lo o fai ai le Bingo i le fale o Meko, ma le faamoemoe o le a ia vaaia ai lana manamea o Lisati e tusa ai o le la tuugatala ma Agalosa.