Ads by Google Ads by Google

Toe filifilia Fata avea ma faiaoga au ta’ito’a 7

Ua toe filifilia nei e le Iuni Lakapi a Amerika Samoa (ASRU) le susuga ia Setefano Fata e avea ma faiaoga o le au taitoa 7 a le Talavalu, lea ua sauni e tausinio i le taamilosaga taitoa 7 a le Oceania e faia i Fiti i le vaiaso fou, Oketopa 3-4, 2013.

 

O isi tofiga o le au e aofia ai Tommy Elisara lea ua tofia e fai ma faiaoga lagolago, o ia fo’i lea o le Taitai malaga, ma le susuga ia Wayne Wilson ua tofia e avea ma foma’i mo tama taaalo pe a o o ina manunu’a i le taimi o le taamilosaga.

 

I le faalauiloa mai ai o le lisi o le au filifilia a le atunuu ua filifilia mo le taamilosaga, ua tuu faatasi mai ai ma fanaunauga o le Iuni ma le atunuu atoa, o le a finau le au ua filifilia nei mo le sailia o sona tulaga e auai atu ai i taamilosaga taitoa 7 a le IRB o lo o faagasolo i tausaga taitasi, le ‘HSBC Sevens World Series’ mo Ueligitone ma Hong Kong ia Fepuari ma Mati 2014.

 

O le itula e 4:00 i le afiafi o le aso Gafua o le vaiaso fou lea ua faamoemoe e tuuva’a ese atu ai le au taitoa 7 a le atunuu mo Samoa i le vaalele a le Inter Island, ma le faamoemoe o le taeao e sosoo ai e malaga atu ai loa i Fiti mo le faamoemoe.

 

O le itula e 12:00 i le aso Gafua o le vaiaso fou ua faatulaga e faia ai se fonotaga a le Iuni Lakapi ma kalapu uma i le atunuu, i le Clubhouse i Tafuna, po o le nofoaga autu a le Iuni lakapi i le nofoaga tuai o le VA, ma ua faamoemoe o le avanoa fo’i lea e faamavae atu ai le Iuni i le au fili a le atunuu a’o le’i tu’uvaa ese atu mo Fiti.

 

O le tausaga e 2011 na faatoa ofi atu ai le au taitoa 7 a le Talavalu i le taamilosaga lenei a le Oceania sa faia i Apia, ma maua ai le tulaga ono ina ua faiaina i le au mai le Atu Kuki i se taaloga finau, ae siamupini ai Samoa i le Ipu autu i lea taamilosaga.

 

I le tausaga na te’a nei 2012 i le taamilosaga sa faia i Sini i Ausetalia, na toe maua ai foi e le Talavalu le tulaga ono ina ua faiaina i le au a Papua Niu Kini, ae siamupini ai le au a Ausetalia ina ua faiaina ai Samoa i se taaloga finau.

 

O le tausaga nei, ua faalauiloa e le au a Fiti lo latou finau e se’i le Ipu o le siamupini, e ui e le o faatamala i ai le au a Ausetalia ma Samoa.

 

O le lisi la lenei o le au: David Laban; Nard Umayam Jr; Pentateuch Soosoo Vaki; Iulai Pouvalu; Feite Okesene; Ross Tele’a Poyer; Joseph Ray Poyer; Aiotaota Vailolo; Taeao Paaga; Iakopo Atonio; Maugalei Veavea ma Alesanalesili Kaisala Suiaunoa. FAIAOGA: Setefano Fata; Faiaoga Lagolago/Taitai Malaga - Tommy Elisara: Physio - Wayne Wilson.