MOLIMAU LE TEINEITITI 5 TAUSAGA

E lima tausaga o se teineititi sa molimau i le faamasinoga o se alii e 27 tausaga o lo o tuuaia i lona faia o ni faaoogalima mataga i lea alualutoto ma nisi teineiti se toalua e 6 ma le 8 tausaga le matutua. Na tulai lea teineititi i luma o le afioga Faamasino Pierre Slicer ma sa tau le mafai ona tautala o ia i le mea na tupu.

Na fesiligia o ia e le loia a le malo, le susuga Leinafo Taimalelagi pen a fai e le ua molia se mea leaga ia te ia, ma sa lue lona ulu ma tali ane ioe. Sa fai i ai le tamaitai loia e faasino vaega o lona tino na tago i ai le ua molia, ma sa ia tago i lona fatafata ma lona manava. O le alii e 27 tausaga ua molia i lea solitulafono matuia sa nonofo faapouliuli ma le tina o le teineititi e 5 tausaga faapea le isi teineititi e 6 tausaga.

TETEE LE PULE O LE FALE INISINIA

Ua faaalia e le pule o le fale inisinia lea na maliu ai se alii talavou i le vaiaso na te’a nei ina ua pa’u ai i luga se pasi sa galu ai i lalo, ua atoa nei le lima tausaga o tapunia lana fale inisinia i le atunuu lautele ma e le faigaluega ai foi le ua maliu.

Na faamalamalama e le susuga Thomas Ah Yen, na tapuni lana fale inisinia i le 2008 ona o le le totogia o pili a tagata, toe le faamaoni lana aufaigaluega. Na ia faaalia, na o ana taxi lava o lo o fai i lana fale inisinia faapea taavale a ana uo. Fai mai a ia, e tupu le faalavelave o malaga o ia i Niu Sila ma ua tei i le faalogo mai i le mea na tupu. Na ia faamanino mai e faapea, o le taulealea ua maliu e le faigaluega i lana fale inisinia. Na ia faaalia, o le ua maliu o le uo a lona atalii ma e masani ona alu atu ma tietie uila ma lona atalii.

Na saunoa Ah Yen ma faaali lona le fiafia i sui o le Ofisa o Taui o Faalavelave Faafuasei (ACC) sa oo atu ma tuuaia o ia i le faafaigaluegaina o le ua maliu. Sa ia faamalamalamaina i ai le tulaga ua i ai nei lona fale inisinia.

LAPATAIA E LE PALEMIA LE AU TAU APU

Ua lapataia e le alii palemia, le susuga Tuilaepa Lupesoliai Sailele Malielegaoi, I latou ua faamanuiaina i avanoa e galulue ai i galuega faavaitaimi i Niu Sila ma Ausetalia, ina ia alo ese mai le faia o amioga mataga ao i ai i latou i ia atunuu.

Na saunoa Tuilaepa, so o se tasi e toe maua o faia ni amioga mataga ma tauvalea ai le atunuu, o le a faasala le nuu e sau ai ma le toe aofia ai nisi mai ia afioaga ia i latou e filifilia i ia avanoa faigaluega faavaitaimi mo le lua i le fa tausaga. Na faaalia e le alii palemia, o se vaega taua tele lenei o ia galuega ma ua uma lelei ona ia lapataia sa o muamua i ia avanoa faigaluega.

Peitai na ia taua, o nisi sa ia lapataia, sa latou faaalia amioga mataga ma le le taupulea i nofoaga sa galulue ai i fafo e pei o le faaleaga o mea totino a kamupani sa galulue ai, faasua’ava ma amio le pulea, gaoi, toso teine, ae o nisi ua sosola ma nonofo faasolitulafono ai i ia atunuu.

FAAUUINA LEOLEO FOU E TO’A 49

E to’a 49 leoleo fou ua sauni atu nei e tautuaina le atunuu ina ua maea a latou aoaoga faapitoa sa feagai ai mo le 16 vaiaso ua tuanai aua le faamalosia o le tulafono faapea le puipuia o le atunuu lautele.

O le aso Faraile na sei mavae atu nei sa faatauto ai i latou i se sauniga faapitoa na faia i le maota o Tooa Salamasina, sa auai matua ma aiga faapea sui o le malo. I lana saunoaga autu, na faamamafa e le afioga i le sui palemia, le afioga Fonotoe Nuafesili Pierre Lauofo le taua o le faamaoni, loto toa ma le malamalama i le tulafono. Sa ia fautuaina foi le vasega o leoleo fou ua faauuina ina ia mata’alia ma faaaloalo i taimi uma. Na ia fautuaina foi i latou ina ia aua lava nei latou faiaina i le mau faaosoosoga o le a latou feagai ai i le faatinoga o o latou tiute.

Saunia: Lilomaiava Andrew Fa’asau, Naenae Productions