PASIA FONO PAKETI A LE MALO MO LE TAUSAGA TUPE FOU 2014

O ananafi na pasia ai e le Fono Faitulafono le pili mo le Paketi a le malo mo le Tausaga Tupe fou 2014, faatasi ai ma suiga e pei ona pasia e maota e lua.

O suiga ua pasia e le Fono i le paketi fuafuaina a le malo e $456,304,500, e aofia ai aveese mai o le $900,000 mai tupe sa fuafuaina i lalo o Polokalame faapitoa, atoa ai ma le aveese mai o le $85,000 mai le paketi a le Ofisa o le Kovana Sili, ae faaopoopo atu i le latou paketi, ona suia ai loa lea o le paketi a le fono mai le $6,700,000 i le $7,685,000.

Na fulisia le maota maualuga e pasia le pili o le paketi a le maota o sui i le palota e 14-0, ae fulisia fo’i le maota o sui e pasia le pili o le paketi a le maota maualuga i le palota e 17-0, ma ua fautuaina e le peresetene o le Senate ia Gaoteote Palaie Tofau le maota maualuga ina ia tuuina atu loa le pili o le paketi a le maota o sui ua pasia i le ofisa o le kovana sili mo le sainiaina ma aloaia loa lenei tulafono.

O le aso Gafua o le vaiaso fou, Setema 30 2013 ua faamoemoe e mae’a ai le tausaga tupe tuai lenei, ae amata ai loa le tausaga tupe fou i le aso e sosoo ai, Oketopa 1, 2013.

TULAFONO TOE TATALA AI LE LESITALAINA O SUAFA MATAI

Ua i luma o le maota o sui se pili mo se tulafono e faaulutalaina, “o se tulafono e toe tatalaina ai le faamauina o suafa matai, ma ia Ianuari 1, 2014 e oo atu ia Iuni 30, 2014.”

I se vaega o lenei tulafono o lo o taua ai e faapea, so o se matai i Amerika Samoa e le’i lesitalaina talu mai le taimi na faamuta ai le toe lesitalaina o suafa matai ia Ianuari 1, 1969, ua poloaina i lalo o le tulafono lenei ina ia lesitala uma suafa matai i le Ofisa Lesitala o le Teritori, amata atu i le aso 1 Ianuari, 2014 e oo atu i le aso 30 Iuni, 2014.

Afai e mavae le taimi e pei ona taua i le tulafono e le i lesitalaina se suafa matai, ona leai lea o se suafa matai e toe lesitalaina.

O suafa matai uma na lesitalaina a o le’i o o i le aso 1 Ianuari, 1969 e le manaomia ona toe lesitalaina.

O le afioga i le Loia Sili a le malo ia Afoa Suesue M. Lutu na molimau e faatatau i lenei tulafono taufaaofi, ina ua valaauina e le Komiti o Mataupu Tau Samoa a le maota o sui se iloiloga e faatatau i lenei mataupu.

Na taua e le loia sili e faapea, o ni isi nei o mataupu e tatau i le fono ona avatu i luma o le atunuu e faaali ai ni o latou finagalo, aua o mataupu faa Faavae nei e tatau ona malamalama i ai tagata uma o le atunuu.

Ina ua fesiligia e sui o le maota le loia sili i isi mataupu o lo o tulai mai i le atunuu i le taimi nei, i le toalua o tagata e umia le suafa matai e tasi, na saunoa ai Afoa e faapea, e le o ai se tulafono e taofiofi ai aiga mai le faia o latou suafa matai i tulaga faaleaganuu, aua afai loa ae faatulafono le aganuu, lona uiga ua le talafeagai ma le Faavae.

“E le faatulafonoina le aganuu, aua o le mea lea na ola mai ai Samoa, pau le tulaga e tatau ona manino, e faamalumalu le tulafono i le aganuu,” o le saunoaga lea a Afoa.

Ua sauni le komiti e tuu atu le tulafono i luma o le maota mo le faia i ai o se latou faaiuga.

PASIA FONO TOFIGA A LE KOVANA MO MR. SOLIP HONG

Ua aloaia nei le avea o le su suga ia Solip Hong e avea ma totino o le Komiti Faafoe o le Faalapotopotoga o le Eletise ma le Suavai (ASPA), ina ua faamaonia e le Fono tofiga a le kovana faasaga ia te ia.

E 16-2 le palota na pasia ai e le maota o sui i le aso Gafua na te’a nei tofiga a le kovana sili, mo le susuga Solip Hong, ae 14-0 le palota na pasia ai o ia e le senate i le taeao ananafi.

A’o le’i faia faaiuga a maota e lua e faamaonia a le suafa o Mr. Hong, na faatautaia ni iloiloga a komiti o le ASPA/TEO a le maota e lua e fesiligia ai agavaa mo le molimau, ma o ia iloiloga e le i umi lava ona amata ae aloaia loa e faipule ma senatoa le mau e faaagafua ai le molimau ae alo loa le maota mo lana faaiuga.

O le toatele o faipule na maua avanoa latou te fesiligia ai le molimau, sa latou taua le faafetaia o le kovana i le sa’o o lana tofiga, ona o se tasi lenei o tama fanau a le atunuu ua talafeagai lona agavaa i le faatinoina o le galuega.

Na fautuaina e le komiti le susuga Mr. Hong ina ia galulue faatasi ma le pulega a le ASPA e saili auala e fesoasoani ai i le faaitiitia o le tau o le eletise mo le atunuu.

O le itula e 8:30 i le taeao ananafi na faatautaia ai se iloiloga a le maota maualuga e fesiligia ai agavaa o le susuga Hong, lea fo’i e le’i tele ni fesili a sui o le komiti ae aloaia loa le mau ina ia faaagafua le molimau ae alo le maota i lana faaiuga, ina ua faamalieina le komiti i agavaa ma le tomai o lo o i ai i lenei alo o le atunuu.

PASIA ETENAUGA AVEA MA TOTINO KOMITI FAAFOE LBJ

O le vaiaso na te’a nei na aloaia ai le atoa o le to’alima totino o le Komiti Faafoe a le falema’i o le LBJ, ina ua fa’amaonia e le Senate tofiga a le kovana sili mo le faletua ia Etenauga Lutu e avea ma totino o le komiti.

A’o le’i faia le faaiuga a le Senate e faamaonia ai tofiga a le kovana sili, sa faatautaia se iloilo puupuu e le Komiti o le Falema’i/Soifua Maloloina e fesiligia ai agava’a ma tomai mo le molimau, i lalo o le taitaiga a le afioga i le alii senatoa ia Galea’i M. Tuufuli o le taitai komiti.

O le toatele o senatoa na maua avanoa e saunoa ai i le taimi o le iloiloga, sa latou taua ai lo latou faafetaia o le kovana sili, ona o le sa’o o lana tofiga ia Etenauga, aua o ia o se tagata ua talafeagai ma le galuega.

Na taua e le alii kovana ia Lolo Matalasi Moliga i sana tusi i taitai o le fono e faapea, ua ia tofiga Etenauga e avea ma totino o le komiti faafoe a le falema’i, ina ua ia iloa o lo o ia te ia le agavaa e faatino ai le galuega. Na taua foi e Lolo lona tofia o Etenauga e sui tulaga ia Leiataua Leauga Turner na teena e le Senate i le masina na te’a nei.

E tele tausaga o galuega Etenauga i le falema’i, ma i’u ina tofia ai o ia e avea ma Faatonu o Teine Tausima’i mo le tele o tausaga, a’o le’i malolo litaea i le tausaga e 2006, peitai na toe valaau e galue ona o le manaoga e le o lava foma’i mo le falema’i i Fagaalu.