Ads by Google Ads by Google

Tala otooto o Fa’amasinoga

NOFO VAAVAAIA SE TINA NA IA SASA FA’AMO’AMO’A LANA TAMA 4 TAUSAGA

 

Ua faatonuina e le Faamasinoga Maualuga le nofo vaavaaia o se tina, in a ua sasaina sana tama teine e na o le fa tausaga ina au masa'a ai se ipu vai.

 

O le a le mafai e le Samoa News ona faalauiloa le suafa o lenei tina, ona o puipuiga lava i le alualu toto na aafia i lenei mataupu.

 

O le faalavelave lenei na tulai mai ina ua maua e ni isi le teineititi na aafia o lo o savali i le auala ma lona tino o lo o unaoa uma, ma auina atu ai loa e ni isi le teineititi i lona tina matua, o le tina lea o le tama o le teineititi na aafia, ma logoina ai loa e le tina mataupu le mataupu i leoleo.

 

Na ulua’i molia e le malo le tina na aafia i le moliaga mamafa o le faaoolima i le tulaga lua atoa ai ma le moliaga mama e tasi o lona faia o ni gaioiga e ono lamatia ai le saogalemu o fanau laiti, ae i lalo o se maliliega na latou sainia ma le malo ma talia e le faamasinoga maualuga i le aso 16 Aokuso, 2013, na tali ioe ai le ua molia i le moliaga mama o le faaoolima i le tulaga tolu na toe suia e le malo, atoa ai ma le moliaga lona lua o lona faiga o gaioiga e ono lamatia ai le saogalemu o lana tama.

 

E tolu masina talu ona loka le tina i le toese i Tafuna ae tatalaina loa i tua i le masina o Aokuso na te’a nei, e faatali ai le lauina o lana faasalaga i le taeao ananafi.

 

Na faatoese ma loimata le tina i luma o le faamasinoga e tusa ai o lana solitulafono sa faia, ma ia talosagaina ai se isi avanoa mo ia, se’i mafuta ai pea ma lona toalua ma le la fanau o lo o i ai nei.

 

Na taua e le tina e faapea, ua aoga masina e tolu na loka ai o ia i le toese ua toe aoaoina ai se lesona taua i lona mafaufau, ma avea ai o se auala e toe fuata’i ai lona olaga i le lumana’i.

 

Sa ia faatoese fo’i i lona to’alua e tusa ai o le faalavelave na aafia ai le la tama, ina ia faatoese o ia e tusa ai ma lona sese.

 

Na taua e le alii loia ia Michael White na tula’i mo le tina na molia e faapea, o le televave tele o le ita a le ua molia ina ua masaa le ipuvai i lana tama na mafua ai loa ona ia sasa ia te ia i ona lima ma mafua ai ona manu’a tigaina le tino atoa o lana tama.

 

Fai mai White, e tatau ona i ai ni polokalame a aoga ai le ua molia ina ia aoaoina ai lona mafaufau i le gaioiga e tatau ona fai pe afai ua lagona lona ita, e ala i le faanofovaavaaia o ia ae aua nei toe tuuina atu i ai se faasalaga faafalepuipui.

 

Na molimau le toalua o le ua molia i luma o le faamasinoga ma ia talosagaina ai se isi avanoa mo lona toalua. Sa ia taua, ua aoga le faalavelave na tulai mai ua taula’i ai o la mafaufau i le tausiaina o le la fanau.  Ae na taua e le loia a le malo ia Tony Graf e faapea, e fai lava si matuia o le gaioiga sa faia e lenei tina, e ala i lona sasa faamo’amo’a o le tino o lana tama a’o ita, ma i’u ina leaga uma ai lona tino i manu’a ma unaoa.

 

E ui i le tulaga matuia o manu’a na aafia ai lenei alualu toto, ae na lagolagoina e le itu a le  malo le faafinauga a le itu tetee ina ia faanofovaavaaia le ua molia, ma tuu atu i ai ni polokalame e aoaoina ai lona mafaufau mai le ita.  E 2 tausaga na manatu le faamasinoga e loka ai le ua molia, peitai ua faamalumalu lona tuliina o lea faasalaga, ae o le a nofovaavaaia o ia mo le lua tausaga i lalo o tuutuuga a le faamasinoga.

 

O ni isi o ia tuutuuga e aofia ai le aua nei ona toe soli se tulafono, auai i ni aoaoga e fesoasoani ai i le tulaga o le ita, ma aua nei ona toe faia ni gaioiga e sauaina ai lana fanau.

 

Ua poloaina fo’i e le faamasinoga le tuu pea o le teineititi na aafia e tausi e lona grandmother i le taimi nei, se’i vagana ua toe sui e le faamasinoga lana faaiuga e toe tuu atu ai le teineititi e tausi e ona matua, ma o lo o mafai fo’i ona alu i ai lona tina e asi i taimi e tuua ai le aoga.

 

TETE’E UALESI PAPALII TUUAIGA A LE MALO

 

Ua teena e le alii o Ualesi Papalii le moliaga mamafa e tasi o le ave taavale a’o se’i lona laisene ua tuuaia ai o ia e le malo, ina ua tofu atu i luma o le faamasinoga maualuga lana mataupu i le aso Faraile na tea nei.

 

I lona teena ai o le moliaga mamafa e tasi ua molia ai o ia e le malo, ua faatulaga ai loa lana ulua’i iloiloga e faia lea i le masina fou, lea o le a iloilo ai pe faatulaga se aso e faia ai lana faamasinoga autu, po o le tuuina atu foi o se latou maliliega ma le malo i luma o le faamasinoga.

 

O Papalii na loka e leoleo i le lua vaiaso talu ai, ona ua maua o lo o ia faafoeina se taavale ae o lo o se’i lona laisene mo le 6 masina, ina ua ta’usala o ia i le solitulafono mama o le ave taavale ‘ona.

 

Ua poloaina Papalii e le faamasinoga e aua nei ona toe aveina se taavale pe toe tagofia le ava malosi, a’o faatalitali ai le taunuuga o lana mataupu.

 

FAATIGA UPUTONU

 

Toe tasi lava le avanoa lea ua tuu atu e le faamasinoga i le alii o Faatiga Uputonu, afai loa ae toe molia o ia i se isi solitulafono ae faamaonia e le faamasinoga, e le gata o le a ia tuliina se faasalaga faa falepuipui i le toese, ae o le a toe poloaina foi o ia e toe fo’i i le atunuu na malaga mai ai.

 

O Uputonu ua faalua ona ta’usala e le faamasinoga i moliaga eseese. O le 2010 na ta’usala ai o ia i le moliaga o le faatupu vevesi i nofoaga faitele ma le taua’i ma’a. O ia moliaga na afua mai i se vevesi na tula’i mai i Tafuna, lea na ia faatupuina ai se vevesi i luma o se faleoloa ina ua ‘ona, atoa ai ma lona tauai o ni ma’a ma manunu’a ai ni tagata se to’alua e le i auai i le vevesi na tulai mai.

 

O le vaiaso na te’a nei na faasala ai o ia e le faamasinoga faaitumalo ina ua tausala o ia i le solitulafono o le tu fua i le fanua o le isi tagata atoa ai ma le faatupu vevesi i nofoaga faitele.

 

Na talia e le faamasinoga le talosaga a Uputonu mo se isi avanoa mo ia, faatasi ai ma le tuutuuga mulimuli mo ia, afai ae toe molia mai o ia i se isi solitulafono i le lumana’i, o le a le toe i ai se isi avanoa mo ia, ae o le a loka loa o ia i le toese e aofia ai ma se faaiuga ina ia faafo’i o ia i lona atunuu na sau ai.