E lata i le tasi le miliona lea ua faaopoopo e le Fono Faitulafono i lana paketi fuafuaina mo le Tausaga Tupe fou 2014, i le mae’a ai lea o iloiloga sa faia e le Komiti Soofaatasi a maota e lua mo le umi e tolu vaiaso.

O le $985,000 lea ua faaopoopo e le Fono i lana paketi, na maua ina ua faaitiitia e le Fono tupe sa faatulaga i lalo o Poloka Faapitoa e faatupe ai ni isi o atina’e a le malo i le aofaiga e $900,000, ma le $85,000 ua aveese mai i le paketi fuafuaina a le Ofisa o le Kovana Sili.

Mo se fa’ata’ita’iga i suiga ua faia e le fono i le paketi a le malo, o tupe e ta’i $500,000 sa fa’atulaga e faatino ai galuega ma atina’e e pei o le Fa’amama ma tu’u ai i lalo le Faletalimalo tuai; Fono Fa’alea’oa’oga Ofisa o Aoga, atoa ai ma le Atina’eina o le Paka o le Si’ugaula, ua aveese mai ai e le Fono le ta’i $200,000 mai vaega tupe nei.

O isi suiga e aofia ai tulaga nei, o le $335,000 lea sa fuafua e Faaleleia ai tulaga o Taaloga, ua aveese e le Fono le $100,000 mai le vaega tupe lea; o le miliona sa fa’atulaga e faatupa ai Galuega Atina’e mo le Ofisa o le Tupe, ua aveese mai ai le is $100,000; o le $150,000 sa fuafua e faatau mai ai masini Komipiuta mo le Ofisa o Femalagaaiga, ua aveese mai ai le $50,000; ma le $200,000 sa fuafua e faatupe ai savaliga a sui tauva mo le palota, ua aveese mai ai le $50,000, ona maua ai lea o le aofaiga e $900,000.

E $6.700,000 le paketi fuafuaina e le Fono sa tuuina mai i le taimi muamua, faaopoopo ai loa i ai ma le $985,000 ona siitia lea i le $7,685,000, ae faaitiitia ai le paketi a le Ofisa o le Kovana Sili i le $4,998,500 mai le $5,083,500 sa fuafuaina.

O le talitonuga o le komiti soofaatasi o le paketi a le fono ina ua talanoaina suiga nei, e le tatau ona toe aapa le fono e sui le paketi a le malo, ona o lo latou talitonuga, o le paketi lava ua tuuina mai e le kovana ma le faigamalo, o le paketi lava foi lea ua uma ona latou malilie i ai, sei vagana ai suiga laiti a le fono e tatau ona tuu ai i totonu.

O suiga a le fono mo lana paketi na faia ina ua talosagaina e le alii peresetene ia Gaoteote Palaie Tofau le komiti soofaatasi a le fono, e manaomia se faaopoopoga i le paketi a le fono ona o le tele o manaoga tautupe e le o i ai ma se tupe e faatupe ai.

Mo se faataitaiga o le saunoaga a Gaoteote i manaoga e le o mafai ona faatino e le fono ona e le o lava se tupe, e le o i ai se tupe e totogi ai le pili eletise a le fono, e le o i ai se tupe e faatau ai mea e faatino ai galuega (supply), e le o i ai se tupe e faatupe ai totogiina o malaga mo faipule ma senatoa e tatau ona o ai i fonotaga i fafo, atoa ai ma se faaopoopoga i totogi o senatoa ma faipule.

A’o lei tuuina mai le paketi a le malo i luma o le fono faitulafono, sa fautuaina e le kovana sili ia Lolo Matalasi Moliga faatonusili o matagaluega ma ofisa a le malo, ina ia aua nei misi se isi i taimi o iloiloga a le fono i le paketi.

Sa fautuaina foi e Lolo ana faatonusili, o le paketi lava ua latou tuuina atu i  luma o le fono, o le paketi lava lena e alu ai ofisa uma a le malo, ae le manaomia le toe o atu o faatonusili i luma o le fono ma toe talosaga i ai mo se isi faaopoopoga i a latou paketi, aua afai e tupu lea tulaga, lona uiga ua atagia mai ai e le o tasi le loto a le faigamalo i le faatinoina o ana galuega faatino.

O le tele o faatonusili sa fesiligia e le komiti soofaatasi a le fono i a latou paketi, po o i ai se isi vaega o lo o manaomia i le paketi, sa latou taua ai lava le tulaga lelei o a latou paketi ua i ai.

Sei vagana ai le faatonusili o galuega a le malo ia Faleosina Voight, sa ia talosaga i le komiti ina ia toe faaopoopo se isi vaega tupe e faatupe ma faaleleia atili ai auala i totonu o le atunuu, pe afai ua tele faasea a le fono ma le atunuu i tulaga faaletonu o auala o lo o i ai.

E ui sa finagalo ni isi o le komiti soofaatasi e faaopoopo ni isi vaega o le paketi a le malo, ae sa finagalo le fono e ala i le fautuaga a le afioga i le taitai komiti ia Laolagi Fonoti Savali Vaeao, e le tatau ona toe faia se suiga i paketi a ofisa ma matagaluega a le malo, aua o numera ua aumai i le fono, o numera ia ua maea ona malilie i ai le kovana ma le kapeneta, ae afai foi e finagalo le kovana e faaopoopo ni isi vaega tupe i matagaluega ma ofisa o le malo, e mafai lava ona toe tuu atu i le fono se pili mo se paketi faaopoopo, ma ua sauni foi le fono e tali mai i ai i lea manaoga.

O le vaiaso fou lea ua faamoemoe e tatau ona pasia ai pili a maota uma e lua mo le paketi, ma tuuina atu ai loa le paketi i le kovana mo le sainia, a’o le’i amataina le tausaga tupe fou 2014 i le aso 1 Oketopa, 2014.