Ads by Google Ads by Google

Tala otooto mai le Fono Faitulafono

TEENA FAIPULE TOFIGA A LE KOVANA MO MICHAEL SALA

 

E ui ua teena e le maota o sui tofiga a le kovana sili mo le susuga a Michael Sala e avea ma totino o le Komiti Faafoe a le Ofisa o Femalagaaiga a le malo i le palota e 10-4 i le aso Tofi na te’a nei, peitai o lo o maua pea le avanoa o Sala e avea ai o ia ma totino o lea komiti, ina ua pasia e le maota o sui le talosaga ina ia toe tuuina atu le suafa o Sala e toe iloilo e le maota i se taimi o i luma.

 

A’o le’i teena e faipule tofiga a le kovana mo Sala, na muamua faataunuu se iloiloga na taitaia e le tamaitai faipule ia Vui Florence Vaili Saulo ma le komiti o Tulafono a le maota, e iloiloina ai agavaa o le molimau.

 

E 11 palota na manaomia e Sala e faamaonia ai tofiga a le kovana mo ia, peitai e na o le 10 palota ioe na ia maua.

 

TOFIA LOLO MR. SOLIP HONG AVEA MA TOTINO KOMITI FAAFOE ASPA

 

O le vaiaso na te’a nei na taunuu ai i le Fono tofiga a le kovana sili ia Lolo Matalasi Moliga, mo le susuga Mr. Solip Hong e avea ma totino o le Komiti Faafoe o le Faalapotopotoga o le Eletise ma le Suavai (ASPA), e sui tulaga i lana ulua’i tofiga mo le susuga Vaa Sokelati ua teena e le fono.

 

I se vaega o le tusi a Lolo i ta’ita’i o le fono i le vaiaso na te’a nei, sa ia taua ai lona talitonuina o Mr. Hong e avea ma totino o le Komiti Faafoe a le ASPA, ona o le tomai ma le agavaa i tulaga tau eletise o lo o ia te ia.

 

Na taua e Lolo e faapea, o lona tofiaina o Hong i lenei tofiga, ua atagia mai ai lona naunau e atina’e tupulaga talavou a le atunuu ia maua le tomai e avea ai ma ta’ita’i, ma faaaoga le tomai o lo o ia i latou e faatino ai galuega i le malo.

 

O Hong e pei ona taua e Lolo na faauu mai i le Iuvesite o San Francisco ma lana faailoga o le BA i mataupu tau Pisinisi ma Pulega i le 2005, ma o lenei tomai maualuga ma le agavaa ua ia maua ua agavaa ai ona ia tauaveina lenei tofiga ma maua se totogi lelei.

 

Na taua atili e Lolo e faapea, sa fesoasoani le Iunivesite o San Francisco e faatupe le aoga a Hong, mulimuli ane toe totogi e lenei alii le tupe sa totogi atoa ai lana aoga, ma o le taimi nei o lo o avea o ia ma Pulesili i tulaga atu Faagaioiga i le faleoloa o le KS Mart, ma o lo o ia te ia le agavaa i tulaga tau pisinisi na te tauaveina ai lenei tulaga.

 

Na faaiu le tusi a Lolo i taitai a le fono i lona talosagaina lea o i latou ina ia pasia le susuga Hong e avea ma totino o le Komiti Faafoe a le ASPA, lea fo’i o le a galue ai mo le fa tausaga.

 

TALI LE KOVANA I LE TALOSAGA A FAGATOGO

 

Mai le tele o tausaga o taoto le talosaga a le afioaga o Fagatogo mo se vaega tupe e fausia ai se Malae Taalo mo tupulaga a le afioaga, o le tausaga nei lea ua talia ai e kovana Lolo Matalasi Moliga lea talosaga e ala i lona fa’aavanoaina o se vaega tupe e $100,000 mai lalo o le vaega tupe o Polokalame Fa’apitoa mo le Tausaga Tupe 2014, e fa’atupe ai lenei galuega taua.

 

I se tusi na tuuina atu e le afioga i le faipule ia Maugaoali’i Leapai Tusipa Anoa’i i le alii kovana, o lo o ia faafetaia ai lona tumau i ana folafolaga sa faia, i le tuuina atu lea o lana fesoasoani e faatino ai le galuega mo Fagatogo.

 

Na taua e Maugaoalii e faapea, sa ia talosagaina isi nofoaiga ua mavae atu mo se vaega tupe e faatino ai lenei galuega, peitai o se fiafiaga ia te ia o le faipule o Fagatogo ina ua talia e Lolo le talosaga mo se tupe, ma ua ia manatu o le a aoga lenei galuega mo tupulaga o le afioaga faapea ai le atunuu atoa.

 

O lenei malae taalo o lo o faamoemoe e fausia i le vaega tonu o lo o i ai le Faleva’a o le Iseulaolemoana, ma ua faamoemoe o le a aofia atu ai ma le Maketi Fou i Fagatogo i galuega mo le fausiaina o lenei malae taalo.

 

FESOASOANI LE MALO I LE AUFAI FAATOAGA

 

E $150,000 se vaega tupe ua fa’aagaga e le Matagaluega o Fa’atoaga a le malo mo le tausaga tupe fou 2014, e fesoasoani ai i le aufai faatoaga i le fa’atauina o mea faalelei eleele e faaleleia ai a latou fa’atoaga.

 

O lea fesoasoani na fa’amanino e le fa’atonusili o le Matagaluega o Fa’atoaga ia Lealao M. Purcell, ina ua fesiligia e le Komiti Soofaatasi a le Fono le Paketi a lana matagaluega i le vaiaso na te’a nei.

 

I le fa’atupeina ai o lea fesoasoani i lalo o le vaega tupe o Polokalame Fa’apitoa, o le isi afa o le oloa e totogi e le tagata fai faatoaga ae o le isi afa e totogi e le malo.

 

Na taua e se sui o le aufai faatoaga i le Samoa News lona fa’afetaia o le ali’i fa’atonu ia Lealao, ina ua a’e se manatu e toe fa’aauau le fesoasoani tupe a le malo mo le aufai faatoaga sa faia i tausaga ua mavae.

 

O le to’atele o senatoa ma faipule na maua avanoa e saunoa ai i le iloiloga, sa na o le agaga faafetai na tuuina atu i le ali’i fa’atonu, ona o le tele o atina’e ua ia fa’atula’i talu ona filifilia o ia i le galuega, e pei o le unaia o fai faatoaga e toto le talo, fualaauaina aemaise ai le tufatufaina atu o le koko Samoa i afioaga i tua.

 

FA’AFETAI FAIPULE TUALAUTA I ATINA’E O AOGA MA AUALA

 

O ni tusi na tuuina atu e faipule e toalua o le itumalo o Tualauta i le kovana ma le matagaluega o galuega a le malo, o lo o la faafetaia ai galuega lelei ua faia mo le toe faaleleia o aoga aemaise ai o auala i totonu o le itumalo.

 

Na taua e le tamaitai faipule ia Vui Florence Vaili Saulo lona lagolagoina o le polokalame a le kovana e faamama ai aoga i le atunuu, ona o le suiga ua vaaia i aoga uma i totonu o le itumalo.

 

I sana tusi sa tuuina atu i le afioga i le kovana sili ia Lolo Matalasi Moliga, na taua ai e Vui le matagofie o lenei polokalame, ua mafai ai ona faaleleia le tulaga o le soifua maloloina o fanau aoga faapea ai ma le teu faamatagofieina o fale aoga o lo o aoaoina ai latou.

 

E le gata na aofia i lana tusi le agaga faafetai ona o suiga ua i ai aoga i le itumalo, ae sa ia tuuina atu ai fo’i ma le lisi o mea faigaluega uma ua maea ona faatau e amata ai galuega mo le faaleleia o le auala i Kokoland ma Faleniu.

 

I le tusi a le afioga i le faipule ia  Larry Sanitoa sa tuuina atu i le faatonusili o galuega a le malo ia Faleosina Voight ma le konekarate fai auala o le McConnell Dowell, sa ia faafetaia ai i latou mo galuega i le fonofonoina lea o vaega faaletonu o le auala.

 

Na taua e Sanitoa e faapea, e ui o ni gaioiga e le tumau ae ua mafai ai ona fesoasoani i le atunuu i le tele o vaega faaletonu o auala, ma ia taua ai le toatele o tagata o le itumalo ua valaau faafetai atu ona o gaioiga ua mafai ai ona foia ia faafitauli i auala.

 

Na faaiu le tusi faafetai ia Sanitoa ia Faleosina i galuega ua mafai ai ona foia le faafitauli i le vai sa to’a i tala atu o le Cost-U-Less, ma ia talosagaina ai loa le tamaitai faatonu ina ia toe silasila i lana talosaga ua maea ona tuuina atu ina ia aofia ai i galuega faaleleia o lo o faagasolo i le taimi nei le isi vaega o le auala i Vaitogi o lo o faaletonu.