[Sosoo ane loa lau faitau i le tatou tala faasolo mo lenei vaiaso, lea na gata mai i le vaiaso na tea nei i le taimi lea na faateia ai Kati ina ua tatala atu le lisi loli a le Ami ae vaaia ai tino o tagata maliliu e silia i le to’a 20, ae o lo o aofia ai ma matua o lana uo tama’ita’i sa pulea le fale kofe na mu ua maliu.]

Na umi se taimi o tu Kati ma faatau pupula i tua o le keli o le isi loli lea o lo o pito mai i tua, ona o le ofo o lona loto i le vaaiga lea ua ia vaai atu i ai. Na faasolo le vaai a Kati i tino o tagata maliliu ma ia iloa ai, o ni isi o manu’a e foliga mai sa faaaoga se fana ae o isi manu’a e foliga mai o le naifi na faaaoga. O le matuia o le vaaiga na iloa e Kati ma ana leoleo i totonu o loli ia e lua na faia ai loa le faatonuga ina ia loka uma faitoto’a o loli ina ia aua ne’i vaavaai i ai tagata o aiga o i latou ua maliliu sei vagana ua maea suesuega o lo o faagasolo.

E le’i umi lava ona salalau le tala i isi lala o le ofisa o leoleo i totonu o le aai e faatatau i le faalavelave lenei ae tau fai lolofi uma atu loa taavale a leoleo i le nofoaga o lo o i ai loli e lua a le Ami, ma ua faia foi le fautuaga a Kati i le kovana o le aai lea o Italia ina ia taofia loa le nofoaga autu o nofoa afi i totonu o le aai, ona o lo o i ai se faalavelave matuia o lo o tulai mai i le vaega tonu o lo o i ai le fetaulaiga o auala, ina ne’i aafia ai le saogalemu o tagata feoa’i, ma sa talia e le kovana le fautuaga ma poloaina ai loa leoleo ina ia poloka le auala ma faatonu kamupani nofoa afi ina ia faaaoga le isi auala o lo o aga’i atu i le taulaga tele, ae taofi le toe faaaogaina o le auala lea ona o lo o suesue se faalavelave e faatau i tagata o lo o maliliu i totonu o loli a le Ami.

A’o faagasolo suesuega a Kati ma isi leoleo nana e faatatau i le faalavelave lenei, sa latou maua ai i totonu o loli ni isi o pepa o lo o tusia ai isi faamaumauga e faatatau i nisi o sui o le Ami a le malo, aemaise ai o ID o isi Lutena o le Ami. O le isi ato pa’u uliuli sa maua i le pito i luma o le loi o lo o i ai se vaega tupe e silia ma le 10 miliona, ae o isi ato sipi lanu uli e fa sa taatitia i tua o le nofoa o le ave loli o lo o i ai pepa iila ua uma ona utu faatutumu i pauta, ma e foliga mai i suesuega o pauta oona o le aisa sa maua i totonu. E lei atoa se itula talu ona faagasolo suesuega ae mafai loa e Kati ona tuu faatasia ni isi o faamaumauga e ono mafai ona fesoasoani i le tau sailia o i latou o lo o i tua o lenei mataupu. O ID na maua e Kati i totonu o le isi loli, o ID o alii ta’ita’i au e to’alua o lo o faauluulu i ai le taitaiina o le Ami a le malo i le taimi lea, ma ua faigata nei ona talitonuina e Kati lana vaega tulaga ua latou maua, ona o sui pito sili nei ona faatuatuaina o le Ami ae afai o lo o i ai se la sootaga ma faalavelave e pei ona maliliu ai tagata nei, e foliga mai ua le toe i ai lava se isi tagata e talitonua i le vaega a le Ami i totonu o le malo atoa.