“E sili le malosi o le Alofa nai lo le Oti!” O upu autu o le lauga a le afioga Moseniolo Viane Etuale ina ua tula’i mo se Upu e tomatau ai ma fa’amafanafana i le tama, le fanau, le aiga ae maise o uo ma e masani sa auai, i le toe sauniga o le tina, le uso ma le to’alua pele o Pu’emalo Koreti Ekeroma Aiono - Apa i le aso ananafi, i lana Ekalesia Katoliko Roma i Leone.

O le toe tapa a Iopu i lona Atua i taimi o luluti tiga o lona fa’atafa gasegase, sa avea ma tusi faitau o le Feagaiga tuai, “E ta fia tusia se tusi! E tusia ai i peni u’amea i papa ma’a ua sausauina.. Aua ua ou iloa, e i ai le aso e tula’i ai lo’u Fa’aola i luga o lenei eleele!”

“Peita’i, ua le toe taua tupe, po’o sailiga malo, ae ua taua lava le Alofa. O le alofa lena e taumafai ai so’o se fanau e toe tausi’i se matalalaga fita ina ia fa’ailo aiga i so’o se fa’alavelave! E tusa po’o le a mamao, ae ia va’aia foliga fiafia ma le  tausa’afia, ua sili lea i auro ma le ‘oa e taulima atu. O le agaga e faia ai se mea, e sili ona taua nai lo mea uma, aua o le agaga lea e tautala mai ai le alofa!”

Na fa’amatala lana afioga, e tusa o le toe taimi na o’o atu ai sana fa’asao mo Pu’emalo, ina ua le mafai ona auai mai i le latou fa’atasiga mulimuli ma lenei itu o le aiga i le fale’aiga o le Tradewinds ina ua mae’a le fa’apa’iaga o Epikopo Peter Brown.

I le molimau fo’i a le tama o le aiga, Taliva’a Aramoa Apa, sa ia fa’ailoa ai, “E tatau lava ona ta’ai se atigipusa e fesoasoani i le tausiga o nai o’u matua i Samoa. E le misia fo’i se ma’ua fesoasoani ma le malaga atu i fa’alavelave e fai o lo’u fo’i itu.”

E ui ina tele tausaga o le mafutaga, ae sa le manatu o le tausaga ma se aso lenei o le motusia ai lea mafutaga mafana i le alofa ma le fa’amaoni.”

O Pu’emalo Apa sa amatalia ana a’oga i le St Theresa School i Leone lava, ona si’itia lea o a’oga maualuga i Bell High School Kalefonia, ma fa’ai’uina ai i le tausaga e 1970. Na amata faigaluega mai i le Malo o Amerika Samoa i le Matagaluega o A’oga i le tausaga e 1973 ma fa’ato’a litaea lava i le tausaga 2010 ae ua avea ma Personnel Administrator.

Na fa’aipoipo o ia ma le tama o le aiga, Taliva’a Lamauta Aramoa Apa mai Moata’a Samoa ia Me 15, 1982, ma sa faia lava le la’ua aso fiafia i le Malumalu o le Koluse Pa’ia i Leone lea fo’i ua toe faia ai lona toe sauniga i le aso ananafi.

E to’a ono o la’ua alo, ae ua maua fo’i ma fanau a fanau e to’alua. E to’atolu ona uso, Monica Caronia Ekeroma Yandall, Theresa Tulili Ekeroma Samuelu ma Selesitina Ekeroma[maliu]. E to’alua ona tuagane: Lemalu Fa’alafua Ekeroma ma Seven Konelio Ekeroma.

O Pu’emalo Ekeroma Aiono - Apa o se alo e fa’asino ia John Aiono Siaosilima Ekeroma - Vaimoso ma Fasito’outa Samoa ma le faletua o Vitolina Tuiteleleapaga Ioane  - Leone.