I totonu o le nuu o Puleia i le motu tele i Salafai, o loo tafe ai se vaitafe e agai i le sami, ma o luga tonu o le sami lenei o loo tafe i ai le vaitafe, e i ai le afu e taua o le Mu Pagoa, ma o le afu lea e pau agai i le sami pe a tafe.

O le i’a la lenei o le igaga, e nofo tonu lava i le vaipapa i le mea e pau agai atu ia i le vaitafe lenei, ma o le pogai lea e mafua ai ona a’e i luga le igaga, pe agai i uta ina ua a’e mai le sami, ma o le taimmi lava foi lea e fagota ai e tagata o le nuu le i’a, pe a oo ina a’e i uta i le vaitafe lea e tafe mai i le sami, ma o le mau a tagata o le nuu o Puleia, i le taimi e faatoa a’e mai ai le i’a e laititi lava lona tino, peitai e agai ina lapo’a a’o aga’i i uta, ma o le ala lena e tilitili ai e tagata o le nuu le i’a ina fagotaina i le taimi e aga’i ai i uta aua o le taimi lelei lea o lona tino.

Ae i ai le isi igaga e taua o le ‘anamagi’, o le ituaiga igaga lea pe a oo ina lapo’a atu lona tino, ae maise lava pe a foi mai i uta i atumauga, ma e mafai foi ona fagota e tagata o le nuu le ituaiga igaga lea, ae o le faafitauli e tulai mai, e le toe fo’i aui’a mai le anamagi pe a foi mai i atumauga, ma o le pogai lea e faigata ai i tagata ona iloa tonu le i’a pe a oo ina toe foi mai. Ae o le isi vaaiga e masani ai ona iloa gofie e tagata o le igaga lea ua toe foi mai, ona e mulimuli mai ai ma isi i’a i tua, o i’a la ia e masani ona fiafia tautai e fagota aua e lalata mai ai ma i’a nei i uta pe a oo ina mulimuli mai i le igaga.

E i ai foi la le isi ituaiga i’a e masani ona maua ai i le vaitau lea o le igaga, o le pusi e taua o le ‘mago’, o le pusi lea e maua pe a oo ina masa le tai, ma e masani ona maua i luga o le oneone, ma o le mea la e masani ona fai e tagata o le nuu, o le asu i luga o le pa’u matu o le oneone, ona alu atu ai foi lea ma le ‘mago’. O ituaiga pusi sami laiti nei, e fiafia tele e tatanu i le oneone a latou si’usi’u, ma o i latou tonu ia e fiafia e ai le i’a o le igaga pe a oo ina a’e mai, ae a maea foi le tai i’a, ona mou atu foi lea o le pusi lenei e le toe vaaia, faatoa toe vaaia foi i le isi tai i’a poo le isi tausaga e toe a’e mai ai le igaga. Fai mai a oo i le taimi e a’e mai ai i uta le igaga, ona faatutu lea e tama’i pusi nei o latou si’usi’u ae tapu’e ai le igaga, ma e faaigoa e tagata o le nuu pusi nei o fili o le igaga, aua e fiafia tele i latou e ai i le tino o le igaga.

O le toai taunuu o le igaga o totonu o le nuu, e faia ai le mea e taua o le ‘tapuaiga’, aua o le taimi lea e o mai faatasi ai tamalii ma failauga o le nuu, faapea ai le aumaga mo le tapuaiga, latou te faatali faapitoa le toai taunuu mai i le igaga i uta, ma o le a matua tausisia tu ma aga e masani ai i le taimi e faatali ai le taunuu mai o le igaga, aua o le a i ai le Aiga Tautai poo le tautai ulu lea e faasino ia Ili ma Tagoai, ma o le a tatau foi i lea aso ona i ai se mea e taua o le ‘Tu’, poo se taumafa lea ua maea ona faavela i se suavai e pei o se puaa poo se isi lava foi taumafa taua e saunia mo lea aso. Ma, e i ai foi tulafono o le aso, afai se suavai ae tutu le suavai, e na o le faatasi lava ona tutu le afi mo le faapusaina o le suava, ma, a solo maa o le suavai e le mafai ona toe fetui i luga o le umu, o valusaga, pa’u fa’i poo pa’u taamu, o le a fu’e uma i totonu o se ato e tuu faatasi uma ai. O le a faaauau atu i le vaiaso fou tulaga o le faataliina o le igaga ae maise ai o tu ma aganuu a Samoa e tatau ona faatinoina ai i lea aso. Soifua.