Ads by Google Ads by Google

Finagalo Soliai e tuu faatasi Matagaluega laiti a le malo

Ua talosagaina e le alii senatoa ia Soliai Tuipine Fuimaono ta’ita’i o maota e lua, tauala atu i le Komiti Soofaatasi o le Paketi a le Fono Faitulafono, ina ia ave se fautuaga i le Kovana Sili mo se auala e tu’ufaatasi ai ni isi o Matagaluega laiti a le malo, e le gata e faalaititi ai le aofa’i o ofisa a le malo ae faa faigofie ai fo’i galuega a le Fono i le taimi e iloilo ai le paketi i le lumana’i.

 

O lea saunoaga a Soliai na faia lea ina ua talanoaina e le Komiti Soofaatasi le paketi a le Ofisa o Tupulaga ma Tina i le taeao ananafi.

 

E le’i auai atu le susuga Pa’u Roy Ausage lea ua toe tofia e le tofa Lolo Matalasi Moliga e avea ma Faatonusili le tumau o le matagaluega o Tupulaga ma Tina, e molimau mo le paketi a lona ofisa ina ua talanoaina ananafi, ma tofia ai loa e le komiti le Faatonusili o le Ofisa o le Paketi a le malo ia Catherine Aigamauga-Saelua e molimau mo le latou paketi.

 

Na taua e Soliai e faapea, o le faafitauli lea ua ia maitauina mai le tele o tausaga, e uma loa le palota ona tufatufa loa lea e le kovana lana vaega e fai ma taitai o ofisa eseese a le malo, ma te’i ai lava ua avea ofisa nei ma matagaluega aloaia a le malo, ae le’i tuuina mai i luma o le Fono Faitulafono e faamaonia atu ai le avea o ia ofisa ma matagaluega a le malo.

 

“O le agaga atoa o lo o ia te a’u, e tatau ona tatou faia se auala e faalaititi ai le malo mai le tele o matagaluega e i ai ae o le tele o isi matagaluega ua na o ni matagaluega laiti,” o le saunoaga lea a le alii senatoa.

 

O le finagalo fo’i lea na fa’atula’i e ni isi o sui o le komiti soofaatasi ina ua talanoaina paketi a ni isi o ofisa laiti a le malo i le vaiaso na te’a nei.

 

Na taua e ni sui o le komiti e faapea, o le tuu faatasi o ofisa ma matagaluega laiti nei a le malo i lalo o se ofisa e tasi, e le gata e faasao ai tupe ae o le a faaitiitia ai foi ma le aofai o tagata e umia tulaga faatonusili.

 

Na taua e Soliai e faapea, o ni isi o ofisa laiti nei e le atoa se ta’ito’a 5 o tagata faigaluega, ma o se vaega tele o le paketi e alu i le totogi o le tagata o lo o fai ma ta’ita’i ae laititi lava se vaega tupe e alu i le faatinoina o le tautua a le ofisa mo le atunuu.

 

Saunoa le taitaifono o le komiti soofaatasi ia Laolagi Fonoti Savali Vaeao, o se fautuaga taua lea ua saunoa i ai le alii senatoa, ae o le a lalafo i ai le komiti i le faaiuga o le latou iloiloga mo le paketi, lea ua faamoemoe e faamutaina i le aso Lulu o le vaiaso nei.

 

E faalua ona faatali le komiti soofaatasi mo le o o atu o le susuga Pa’u e molimau mo le paketi a lona ofisa, peita’i e lei o o atu lava.

 

Saunoa le peresetene o le senate ia Gaoteote Palaie Tofau e faapea, e le tatau ona fesiligia fua e le komiti soofaatasi le faletua ia Catherine mo le paketi a le Ofisa o Tupulaga ma Tina, leaga e le o Catherine lea o le a faatinoina le galuega a le ofisa, ae lelei ona faatali le mataupu lea se’i lalafo i ai le komiti i le faaiuga o lana galuega.

 

Na fesili le alii senatoa ia Galea’i Tuufuli ia Catherine po o ai le tagata lea e taua i le paketi o le ‘Sports Commisioner’ ma lona totogi e $45,000, na tali Catherine, o le susuga ia Ethan Lake lea ua fuafua e galue i le tulaga lea.

 

Na fautuaina e Galea’i le komiti soofaatasi, afai ua i ai se avanoa fou faapea i totonu o le matagaluega, e tatau ona faasalalau e tusa ai ma tulaga masani o avanoa faigaluega, ina ia maua ai le avanoa o fanau a le atunuu e tusi talosaga atu ai i le avanoa.

 

I le paketi fuafuaina a le matagaluega o tupulaga ma tina mo le tausaga tupe fou, ua siitia i le $640,000 mai le $340,000 e pei ona i ai i le tausaga tupe lenei.