Ads by Google Ads by Google

TALA MAi SAMOA

LUA TAUSAGA I LE TOESE I LE TAU’AI MAA

 

E ta’ilua tausaga i le falepuipui ua Faasalaina ai e le tamaitai faamasino o ida Malosi ni alii e toatolu mai le afioaga o Matautu-uta o Burt Keli, Kosena Malu ma Ta’au Tapeni, ina ua faamaonia o latou moliaga o le tau’ai maa, faatupu vevesi, faao’o manu’a ma le umia o auupega.

 

E toatasi le isi alii na molia faatasi ma i latou ia o lo o tetee i ona moliaga. O ia moliaga e mafua mai i se fe’eseeseaiga na tulai mai i le po tonu ao feagai le atunuu ma le faamanatuina o le tutoatasi i le tausaga nei, lea sa latou faaoolima ai i se alii mai Matautu-tai. O lea faalavelave na tulai mai ao tafafao ia alii i le falekalapu o le Club X i Matautu-tai.

 

Na saunoa le tamaitai Faamasino, o le faasalaga ua faasalaina ai i latou ua faia ina ia momoli ai se feau i tupulaga ona o le faatupulaia o vevesi e aofia ai le tau’ai maa. Ua tolopo nei le valaauina o mau i le faamasinoga o le alii o Ta’alaTapeni lea o lo o tetee i ona moliaga i le aso 4 o Oketopa.

 

AMATA SUESUEGA I TUUAIGA FAASAGA I LE KOMESINA MA LE PULE O LE TOESE

 

O le vaiaso nei e amata ai galuega a le komisi suesue faapitoa ua tofia e le Kapeneta, e iloilo ma mataitu le mataupu o lo o tuuaia ai le komesina o leoleo, le afioga Lilomaiava Fou Taioalo atoa ma se tasi o komesina lagolago o lo pulea le toese i Tafaigata, le afioga Sala Seaga Uili Lafaele.

 

O suesuega o le a gafa ma le komisi suesue ua filifilia e aofia ai le faatalatalanoaina o nisi o pagota o lo o tuli o latou faasalaga i le toese i Tafaigata, e uiga i tuuaiga mamafa o lo o tuuaia ai nei le alii komesina ma le pule o le falepuipui, o le faia lea o ni auala pi’opi’o. O ia faatalatalanoaga o pagota e le o faatagaina ai le au tusitala po o se isi o le atunuu lautele seia vagana ai sui o le komisi. O tuuaiga faasaga i le komesina ma le pule o le falepuipui sa tusia i se tusi na tuuina atu e se tamaitai sa avea ma leoleo a ua faamalolo mai lana galuega sa galue ai i le toese i Tafaigata.

 

Sa auina atu kopi o lea tusi i le alii palemia, o sui o le kapeneta atoa ai ma nisi o nusipepa ma ofisa faasalalau i totonu o le atunuu. Na taua i lea tusi tuuaiga i faiga pi’opi’o e le gata i totonu o le ofisa o leoleo ae faapea foi i le pulega o le falepuipui. E pei ona lipotia muamua i a tatou tala, e fa masina ua faamalolo le tumau ai le alii komesina ma le pule o le falepuipui ao talia se faaiuga o nei suesuega, ae maua lava o la totogi.

 

TEENA TALOSAGA A LEVAOPOLO E FAAUI I TUA MOLIAGA

 

Ua teena e le faamasino o le Faamasinoga Maualuga, le afioga Alo Vaepule Vaemoa Vaai le talosaga a le alii faipule o le vaega faaupufai o le Tautua Samoa, le tofa Levaopolo Talatonu, ina ia faaui uma i tua moliaga faasaga ia te ia na faaulu e le Ofisa o Tiute ma le Matagaluega o Leoleo.

 

Na finau le susuga Levaopolo lea o lo o tulai mo ia lava, ua umi na’ua o toso lenei mataupu ma ua tele foi sona aafiaga i ona tiute tauave faalemalo. Na saunoa faamalamalama le afioga Faamasino Alo Vaepule Vaemoa Vaai i le alii faipule, e teena lana talosaga ona o lo laua va nonofo ai aua e i ai lo la piitaga faaleaiga. Peitai e mafia ona ia toe talosagaina le Faamasinoga i luma o se isi faamasino. Ua toe tuuina atu nei lea mataupu i luma o le afioga i le tamaitai faamasino ia Mata Tuatagaloa e valaauina ai ma ua amata mai i le aso 18 e oo atu i le aso 22 o Novema.

 

Ua poloaina foi e le faamasino le toe iloiloina faatasi o lenei mataupu o lo molia faatasi mai ai le tofa Levaopolo Talatonu, o lana kamupani o le island Freight ma le tamaitai faipisinisi o Christine Ainuu, e tusa ai ma le pusa oloa na faaulufaleina mai i le atunuu i ni pepa taufaasese. O ia moliaga e aofia ai le aveina i tua o lea pusa oloa e aunoa ma le totogiina atu o ni lafoga ma tiute. E ese moliaga a le Matagaluega o Leoleo ua faaulu faasaga ia i laua ua molia, ese foi moliaga ua faaulu e le Ofisa o Tiute.

 

TO’AFA ALIILEOLEO UA AUINA ATU I SUDAN I SAUTE

 

E to’afa ni malu o le malo Samoa ua auina atu nei mo le tausiga o le filemu i totonu o le atunuu o Sudan i Saute i le konetineta o Aferika, i lalo o le polokalama mo le tausia o le filemu a Malo Aufaatasi. O le Malaga aupito i lata mai lenei o nisi o leoleo mai Samoa ua auina atu i atunuu i fafo mo le tausiga o le filemu i atunuu o lo o tulai mai ai vevesiga i itu eseese o le lalolagi, talu mai le tele o tausaga.

 

O malu o le malo e to’afa ua Malaga atu o alii uma e aofia ai le alii Satini o Lefaoseu Sani Afu, o le alii ta’ailua, le susuga Vaonuu Aiaraisa Nafo’i, John Devan Fanuaalii, ma le alii o ioane Tava’i. E 12 masina ua faamoemoe e Tautua ai ia malu o le malo i totonu o le atunuu o Sudan i Saute.

 

Saunia: Lilomaiava Andrew Fa’asau, Naenae Productions