Ads by Google Ads by Google

Gasegase nisi o le aufaigaluega a le Kolisi ona o uaea eletise tuai

O se iloiloga sa faia i luma o le Komiti o Aoga a le maota o sui i le vaiaso na te’a nei, na manino ai afioga i faipule i le mafuaaga na mama’i ai ni tagata faigaluega se to’alima a le Kolisi Tu’ufa’atasi, e foliga mai na latou manavaina ea o uaea o lo o ta’i solo i totonu o se vaega o le faleaoga ua leaga, faapea ai ma vaega o le fa’alo o le fale ua le toe saogalemu i le nonofo ai o ni tagata.

 

E i ai le talitonu o fa’aletonu i uaea nei na tula’i mai i le taimi na amata ai ona galulue kamuta a le Kolisi Tu’ufa’atasi e amata ona toe fa’afou le fale.

 

O ni isi ia o molimau na tuuina atu i luma o le komiti ina ua talanoaina e le komiti a le maota lenei mataupu, ona o le fia malamalama i le fa’afitauli o lo o tula’i mai i se tasi o fale tuai i le Kolisi Tu’ufa’atasi.

 

O le fale e pei ona tula’i mai ai le fa’afitauli sa avea ma Faletusi tuai a le Kolisi, a’o lea ua fa’aaoga e fa’amautu ai le polokalame o le Student Supports Services, o se vaega a le Kolisi e fesoasoani ai i le fa’aleleia atili o aoaoga mo le fanau e vaivai i le mataupu o le Gagana Faaperetania.

 

E tusa ai ma se ripoti na tauaao e le taitai komiti o aoga a le maota ia Vaetasi Tuumolimoli Saena Moliga, sa taua ai le auina atu i le falema’i o tagata faigaluega e to’alua o lo o galulue i totonu o le fale e pei ona taua, ina ua tula’i mai ni tulaga fa’aletonu i o latou soifua maloloina, ma mafua ai loa ona faia se su’esu’ega a le Matagaluega o le Soifua Maloloina, Matagaluega o Galuega a le malo ma le EPA i le totonu ma fafo o le fale.

 

Ina ua mae’a le suesuega e pei ona faailoa e le Fa’atonusili o le Soifua Maloloina ia Motusa Tuileama Nua i luma o le komiti, na faia ai loa le faaiuga e tapuni le fale e le toe fa’aaogaina ae se’i fa’agasolo galuega mo le toe fa’afouina.

 

Ina ua fesiligia sui o le kolisi pe na logoina i latou e tagata faigaluega i le taimi na tula’i mai ai le fa’alavelave, na taua e molimau e faapea, e le’i logoina le ofisa e i latou na a’afia e tusa ai o ta’iala ma faiga fa’avae i so o se fa’alavelave e tula’i mai i ni tagata faigaluega, ae atonu na o sa’o lava i latou nei i le falema’i ina ua latou fa’alogoina suiga i o latou soifua maloloina.

 

O se tasi o fa’afitauli e pei ona taua e molimau, e le o i ai se tagata i totonu o le atunuu e i ai sona agava’a faapitoa i le siakiina o ituaiga fa’afitauli fa’apenei.

 

O se tasi o tulaga na fesiligia e le komiti a le maota o sui, o le mafuaaga ua le faia ai se pemita mo le toe fa’afouina o le faleaoga, ae na fa’amanino e le peresetene o le kolisi tu’ufa’atasi ia Dr. Seth Galea’i e faapea, o lo o i ai lava tagata faigaluega a le kolisi latou te fa’atinoina galuega mo le toe fa’afouina o faleaoga, o le mafuaaga lena e le’i talosagaina ai se pemita.

 

Na faamanino e Galea’i e faapea, sei vagana ua tauofo le galuega i se konekarate tua ona fa’atoa mana’omia lea o pemita ma isi tulaga e pei ona finau ai le malo, ae o galuega e fa’atinoina lava e kamuta a le kolisi e le tau manaomia ai tulaga ia.

 

O le fesili po o i ai la ni isi vaega o le faleaoga a le kolisi o lo o tula’i mai ai le fa’aletonu e pei ona maitauina i le fale o lo o fesiligia, na saunoa ai Galea’i e faapea, toe pau lava lea o le fale i totonu o le kolisi e le’i fa’afouina, ma o lea ua maua le avanoa e faafou ai ina ia mautinoa e saogalemu soifua o tagata faigaluega ma fanau aoga.

 

Na fa’afetaia e afioga i faipule sui o le malo i lo latou mataala i le foiaina o fa’afitauli e a’afia ai le soifua maloloina o tagata o le atunuu, ma latou fautuaina ai i latou ina ia fa’aauau pea ona latou galulue fa’atasi mo le siakiina o tulaga faapea e tula’i mai, ina ne’i fa’atamala ae ma’imau ai se soifua o se tagata.