O le tala e uiga i lenei muagagana faafaaleupolu lenei, e mafua mai i le tala e faatau i le tama e igoa ia FULU’ULALEFANUA sa nofo i Fiti. Fai mai le tala, o le tama o Fuluulalefanua ma lona tuafafine o Fulu’ulalimatoto sa nonofo uma i Fiti, ae ina ua alu atu le malaga lea na avatu ai e tagata Fiti le ulugalii e faaola i le afafine o le Tui Fiti, ona sau ai lea o le tama o Fulu’ulalefanua, ae nofo ai na o lona tuafafine o Fulu’ulalimatoto.

Ina ua sauni le tama o le a foi mai i Samoa, ona fai lea o lana mavaega i lona tuafafine e faapea, a oo i taeao uma lava o taeao e ono talu ona ou alu, ona e alu lea e te tu i le sami ma e vaai i galu o le sami. A e vaai atu o loo fatisisina, ona e iloa lea o loo o’u ola pea, ae a e vaai atu ua fatitoto mai galu, ona e iloa lea ua ou oti, ona alu loa lea o le tama i Samoa, ae nofo ai pea lona tuafafine i Fiti ma ua ia faia loa le masani o le ala usu i taeao uma lava e ono talu ona alu ese atu lona tuagane.

Ua oo i le taeao muamua ua vaaia e le teine le galu o loo fati sisina. Ua faapena i le taeao lona lua seia oo loa i le taeao lona ono, ma le vaai atu o le teine, ua fati toto mai galu o le sami, ma o iina lea na mafua ai le muagagana faafaleupolu e faapea, “Ua usu taeao e ono e pei o le fetalaiga ia Fulu’ulalimatoto.”

Fai mai le tala, ua sau le tama o Fulu’ulalefanua ua afe i Saipipi lana folauga, ma ua nonofo ai loa ma le teine e igoa ia Sinavaiana, ona fanau ai lea o le la tama, peitai, na o mai le nuu ma susunu le fale ao i ai le pepe ona e le fiafia fai mai o le tama o le pepe o le Fiti. Ona tagi ai lea o le teine o Sinavaiana ma faapea ana upu, “A ia i se aitu o le atu Samoa o ona iloaina mai lenei puapuaga, sei sau e lavea’i isi au tama.” Peitai fai mai le tala, ua atili ai ona sasao i luga le afi ma ua utu, pe ua malamalama uma atu ai ma le nuu o Lano, ona mafua ai loa lea ona maua le igoa o “Utumalama” lea o loo faaigoa ai le ava i Lano o Utumalama.

Fai ao tagi aue le teine o Sinavaiana, o le taimi lea o loo seu lupe ai aitu o Samoa, o Vave ma Sealiitumatafaga, ona tuu loa lea o le la seuga lupe, ae ua la o mai ai ua susue le pito i luga o le fale ae se’i atu i fafo le tama ma la o loa ma laua. Sa tago le aitu o Vave ua tuu le tama i totonu o lana ato seu ae toe faaauau le seuga, o iina lea e mafua ai le maua ai le upu, “Ua ifo le Naaloa e pei o le seuga nai Amoa.”

O le a toe faaauau atu i le vaiaso fou le iuga o le seuga ae maise ai le tama lea ua faasaoina e aitu Samoa lona ola.