Ads by Google Ads by Google

Tala otooto o fa’amasinoga

MOLIA SE ALII I LE GAOI

 

Ua toe tolopoina le mataupu a le alii o Isara Tonise ina ua na te’ena i luma o le Faamasinoga Fa’aitumalo moliaga mama o le gaoi ina ua tuuaia o ia i lona gaoia o ni apa meaai mai i le faleoloa o le TSM Mart i Tafuna, i le Aso Gafua ua te’a nei.

 

I faamaumauga a le faamasinoga o lo o taua ai e faapea, na ulufale le alii o Tonise i totonu o le faleoloa o le TSM Mart i Tafuna ma ia pikiina ai ni apa meaai se fa, ona ia tuu lea i totonu o se taga pepa ma fa’ata’atia i le isi tulimanu o le faleoloa, ona ia talosaga lea i se tasi o ali’i faigaluega e vaai atu lana fa’atau se’i alu i lana feau ona alu atu lea e piki mai.

 

Pe tusa o le itula e 2:00 i le aoauli o le aso lava lea na toe fo’i atu ai Tonise ma piki mai le fa’atau ma alu ma ia i lona aiga, ae ina ua iloilo e le fa’atauoloa le masini pu’eata na maua ai e na te le’i totogia le fa’atau.

 

E $83.30 le tau atoa o apa meaai e fa na alu ma Tonise i lona aiga, ma ua maea ona toe fa’afo’i atu e leoleo ia apa meaai i le faleoloa, ae o lea ua fa’agasolo taualumaga o le fa’amasinoga a le ua molia e tusa ai o tu’uaiga fa’asaga ia te ia.

 

MOLIA JANET FINAUASO I LE AVE TAAVALE A’O SE’I LONA LAISENE

 

O se tina talavou e 32 tausaga le matua lea na se’i e le fa’amasinoga lona laisene mo le ono masina ina ua fa’amaonia le moliaga o le ave ta’avale ‘ona, ua molia nei e le malo i luma o le faamasinoga i le moliaga mamafa o le ave taavale a’o se’i lona laisene ave ta’avale.

 

O le masina na te’a nei na maua ai e leoleo Janet Finauaso o ia faafoeina se ta’avale i se saoasaoa uiga ese, ae ina ua fesiligia o ia i lona laisene na iloa ai o lo o se’i e le fa’amasinoga lona laisene ave ta’avale.

 

O le vaiaso nei na faatoa faila ai e le malo le moliaga mamafa faasaga ia Finauaso, ma faatulaga ai loa lana ulua’i iloiloga e faia lea i le faaiuga o le masina nei, lea o le a iloa ai pe tuuina atu lana mataupu e faatulaga se faamasinoga autu, pe fai foi sa latou maliliega ma le malo e faamuta ai lana mataupu.

 

O le moliaga o le ave taavale a’o se’i le laisene, afai ae faamaonia e le faamasinoga, e mafai ona faa falepuipui ai se tasi mo le umi e le sili atu i le lima tausaga, ae faamalosia le tuli o aso e 90 i le falepuipui i Tafuna.

 

NOFOVAAVAAIA LE ALII GAOI

 

O le alii e 21 tausaga le matua lea na ta’usala e le faamasinoga faaitumalo i lona ave faagaoi o se telefoni sa i totonu o se pikiapu na paka i luma o se faleoloa i Nuuuli i le masina o Iuni, 2013, ua nofovaavaaia e le faamasinoga mo le 12 masina i lalo o tuutuuga, ua faasa ona toe tu ona vae i tafatafa po o totonu o le faleoloa na tula’i mai ai le faalavelave.

 

Na faatoese le alii o Fetu Lelevaga, 24 tausaga le matua o Tafuna e tusa ai o lana solitulafono sa faia, ma ia talosagaina ai se isi avanoa mo ia se’i faaauau ai lana tausiga i ona matua.

 

Na talia e le faamasinoga le talosaga a le ua molia atoa ai ma faafinauga a loia, ma manatu ai loa o le a nofovaavaaia o ia mo le 12 masina, ae ua lava aso e 3 na taofia ai o ia i le toese ina ua faatoa loka o ia e leoleo e fai ma ona faasalaga i lenei mataupu.

 

I faamaumauga a le faamasinoga o lo o taua ai e faapea, e alu atu Lelevaga i le afiafi lea e toe faatau mai ni isi a latou pia ma ana uo, o lo o paka se pikiapu lanu enaena i luma o le faleoloa, o lo o fai le faatau a le tina na alu atu i le pikiapu ae o lo o matala le faamalama o le isi faitoto’a.

 

Na aapa le ua molia i totonu mo se tupe ae tau ai lona lima i se telefoni ona alu loa lea ma ia, ma ia faaaogaina ai le telefoni gaoi lea e vili ai lana uo teine faapea ai le Supavaisa o lana fale faigaluega.

 

Talu ai na tia’i e le ua molia le telefoni, ua poloaina fo’i o ia na te totogiina le $150 mo le tau o le telefoni na ia gaoiina, ua faasa foi ona ia toe tagofia le ava malosi.