Vaega: 111

Fa’afetaia le alofa ma le agalelei o le Atua Soifua, ina ua alafa’i mai i le manuia le atunu’u i lenei taeao fo’u, e tatau ai ona o tatou si’i le vi’iga ma le fa’afetai ia te Ia ona o lona alofa ma Lona agalelei mo i tatou i taimi uma ma aso uma o lo tatou ola.

O aso uma lava na tu’ua ai e lo’u tama le Ofisa Tutotonu ma tagata faigaluega o lo’o galulu ai, e le misi le vala’au mai a le toeaina o Afa, ona o ia lea ua tu’u i ai Ie va’aiga o le Ofisa lea. Ae o le tele fo’i o taimi, e le talanoa Afa i lo’u tama, ua fa’asau uma ia te a’u telefoni uma ina ia ou iloa ai mea o lo’o tutupu i totonu o le ofisa.

O le telefoni na taunu’u mai i le isi aso, ua fa’apea mai Afa, ua le motusia le o’o ane o Peteru, lo’u tuagane i le Ofisa Tutotonu i aso uma. Na ou fesili nei ia Afa, po’o a ana mea o fai ai, ae sau le tali a Afa, o lo’o su’esu’e uma e Peteru mea uma, ae e leai lava ma se mea e tasi o ona ia fa’ailoa i ai. O le isi tala a Afa ia te a’u, fai mai ua alu atu lo’u tuagane, ua ‘ava’avau i totonu o le ofisa ma fai ana tala e fa’apea, ua leai sona tama, a’o ia lea e tatau ona matala ai mea uma, ma e tatau ona fa’aaloalo uma tagata faigaluega ia te ia.

O le isi tala a Afa na fai i lo’u tuagane, e le mafai ona ia va’ai i mea ia, se’i iloga e malosi lo ma tama ma ia auai uma matou, ona fa’atoa fa’ailoa lea. Ua ou nofo nei ma o’u fa’alogona alofa i lea taimi, “Talofa e, i si o’u tuagane, ua le mautonu lava lona mafaufau, ona fautuaga leaga a lo ma tina ua fafaga ai. O a lava mea uma o lenei olaga, oa o le tamaoaiga ma mea e tele, ae a aunoa le tagata ma le alofa, e leai se aoga o mea uma, e galue fua fo’i.

Na ou toe mafaufau nei e fa’apea, “O le faitoto’a o faigata ma mafatiaga o le soifuaga nei, o tua atu, o lo’o taoto ai i se ta’otoga malu le filemu ma le manuia mai le Atua.”

Ua fa’asolosolo nei o’u mafaufauga i si o’u tina o Makerita ma ina ua tau o’u mafaufauga i lea tulaga, ua le mafai loa ona taofiofi le tafe ifo o o’u loimata. O a lava ona uiga vaivai, ae e le mafai ona ave’esea ai lo’u alofa, o a fo’i ona uiga fa’amaualuga, e le mafai ona galo ia te a’u, ona ua ou ta’uina o lo’u tina.

Na ou fa’apea ifo nei, “O lo’u tama ea ua toe fia tamaititi, a iloa e Makerita, oka, ua pa le lalolagi.” Na ou fa’apea nei, ma’imau e, pe ana fa’apea lo matou aiga, ola fiafia, ola fetufa’ai, ola filemu, se manu e leai lava ni mea e tutupu mai e vaeluaina ai le alofa.

O aso uma lava e usu ai si o’u to’alua o Tino i lo ma ofisa, ona o lo’o i ai fo’i fa’amasinoga e tatau ona ma galulue ai ma o lo’o fa’atalitali fo’i nai tagata. Ae sa fai la ma tonu ma Tino, e sili pe a fa’afaigaluega se isi Loia, la te to’alua, ona ua ou le mafai ona toe alu ‘ese, se i vagana ua malosi lelei si o’u tama, ma ua fa’apea lava ona fai, ua faigofie ai fo’i mea uma.

Na fa’apea ifo o’u mafaufauga, “Amuia Tino, o lo’o i ai se tina e alofa fa’amaoni, e fautua lelei ma na te avatu upu lelei e fafaga ai le la tama. Amuia Tino o lo’o maua pea le mafutaga mafana ma ona matua, o lona tama ma lona tina, a’o a’u, ua ou misia lava le alofa o lo’u tina.

E faia pea