I faamaumauga mai le Kolisi Tuufaatasi sa tuuina atu i luma o le Kapeneta i le vaiaso nei na taua ai e faapea, o le 80% - 90% o fanau aoga na fa’au’u mai i Aoga Maualuluga i le 5 tausaga talu ai na ulufale atu i le Koliti Tu’ufa’atasi, sa latou aveina mataupu amata i mataupu o le Maths, English, Reading ma le Writing.

E ui o mataupu amata (remedial courses) na ulufale atu le to’atele o i latou nei ma aoaoina ai i le Kolisi, o le to’atele lava o i latou e nonofo ai lava i le tausaga atoa po o le lua fo’i i le tau faa pasi ina o le mataupu e tasi, ma o se tulaga e lagona ai le faanoanoa ona o le maualuga o lo o i ai aoaoga a fanau o lo o ulufale atu i le kolisi tuufaatasi.

O se otootoga o le tulaga o lo o i ai aoaoga a fanau i totonu o le Kolisi Tuufaatasi, na mafai ona faasoa atu i le fono a le Kapeneta i le aso Lulu na te’a nei, ma o sui o le kolisi e pei o le tama’ita’i foma’i ia Dr. Rosevone Pato na faalauloaina ni isi o faamaumauga e faatatau i le olaga aoaoina o fanau i totonu o le kolisi.

Na taua e Dr. Pato e faapea, o le toatele lava o fanau aoga e faauu mai i Aoga Maualuluga e ulufale atu i le Kolisi Tuufaatasi, latou te aveina mataupu maualalalo po o mataupu amata i totonu o potu aoga.

Mo se fa’ata’ita’iga o le toa 91% o i latou e ulufale atu latou te aveina le mataupu o le ‘Developing Writing ma le Developing Reading; ma le 98% latou te aveina le mataupu o le ‘Developing Maths’.

Se’i vagana ua pasia e le tamaititi aoga mataupu e pei ona taua, ona faatoa mafai lea ona alu e ave se mataupu o le sailia o lona faailoga tikeri i le tulaga o lo o i ai aoaoga i le kolisi.

O mataupu nei o lo o faatulaga i vasega e taua o le ‘ELI courses’, ma o lo o faatulagaina o mataupu e i lalo mai o le 100 le maualuga i le tulaga faa kolisi ma aoga maualuluga.

I le sailia o le faailoga tikeri e lua tausaga i le kolisi, e tatau ona ulufale loa le tamaititi aoga ma amata loa ona aoaoina o ia i mataupu e sailia ai lona faailoga, peitai o le faafitauli o lo o maitauina, e uma ane lava le lua tausaga o lo o i ai pea le tamaititi i vaega maualalo e le’i taitai o o i le taimi e amata ai ana mataupu i le maualuga o lo o i ai le kolisi.

Na taua e Dr. Pato i luma o le Kapeneta e faapea, o le maualalo o mataupu e ave e fanau aoga o le atili ai foi lea ona le pasi i latou, ma umi ai lava le taimi e nofo ai i le tau faapasiina o le mataupu e tasi.

O le fesili pe ua i ai se gaioiga ua faia e le Kolisi ina ia foia ai le faafitauli lenei, o le tali ioe, o lea ua i ai le isi polokalame fou e taua o le ‘College Accelerated Prepartory Program - CAPP’, ua amata ona faatinoina e le kolisi ina ia fesoasoani ai i le unaia o fanau e aoao ma faa pasi a latou mataupu.

Na taua e Dr. Seth Galea’i le peresetene o le Kolisi Tuufaatasi, talu ona amata mai le polokalame fou lea, ua maitauina se suiga tele i le faaiuga o suega a fanau aoga.

Na taua e ni isi o sui o le kapeneta, o le faafitauli lenei e mafua mai i le auala o lo o aoaoina ai fanau aoga i vasega amata e pei o le ECE, Aoga Tulaga Muamua ma faasolo atu ai i Aoga Maualuluga, peitai na taua e ni isi e faapea, afai e faaletonu le faiaoga i le aoaoina o fanau aoga ona faaletonu foi lea o le taunuuga o aoaoga a fanau aoga.

Na taua e le afioga i le kovana sili ia Lolo Matalasi Moliga i le fonotaga a le kapeneta e faapea, e silia laititi ma le $1 miliona le tupe lea ua faaopoopo e le malo i le Paketi a le Kolisi mo le Tausaga Tupe fou 2014, ona o le faanaunautaiga ina ia faaleleia pea tulaga o aoaoga mo fanau aoga.

“Afai ae mautu le faavae o aoaoga a fanau, o iina tatou te vaaia ai le mautu o le lumana’i o le atunuu, aiga ma le malo, aua o i latou o le a avea ma ta’ita’i i le lumana’i,” o le saunoaga lea a le alii kovana.