Vaega: 108

Taeao manuia i le mamalu o le atunu’u, ua alafa’i mai i fanuga lelei i lenei aso, i le alofa ma le agalelei o le Atua, tatou si’i fa’atasi la’ia o le vi’iga ma le fa’afetai i le Atua, ina ua o tatou aulia mai i le manuia i lenei aso. Ae alo mai loa, o le a toe fa’aauau atu la tatou tala fa’asolo, Alofa, se ia tiga, e pei ona masani ai.

O le fale talimalo lea o lo’o i totonu o pisinisi a lo’u tama o lea ua matou nonofo ai nei. E ui lava ina fa’apea o mea a lo’u tama, ae sa finau lava Tino ma le tama o Ana o Tomasi ina ia totogi a matou pili ma ua fa’apea lava ona fai.

Ua taunu’u mai nei si o’u tuagane la’ititi o Ioane, ma o se feiloa’iga na feiloa’i i loimata maligi. O Ioane, e latalata lava lona loto i lo ma tama, e le pei o Peteru, ae atonu fo’i ua mafua ona fa’apea lo’u tuagane lea, ona ua upu ‘esea e lo matou tina.

Na ou taumafai lava ina ia ou malamalama i lea itu, peita’i, o lo’u le malie tele i lo’u tina o Makerita, o le ala lea ua fa’afaigata ai a’u fa’ai’uga. Ae ina ua ou va’ai ma ou feloa’i atu i si o’u tuagane la’ititi, sa ou lagona ai le filemu o lo’u loto, ona ua ou mautinoa lava, e latalata mai le loto o lo’u tuagane lea ia te a’u.

Na fetaui lava le taunu’u mai o Ioane, ma le malosi o si o ma tama, ma ua feagai tonu lava ma a’u fuafuaga, aua ua ou mana’o nei, e ave lo’u tama i le mea o lo’o matou nonofo ai, ua ou musu e toe tu’u ‘ese atu si o’u tama e nonofo ma Makerita ma Peteru.

O a fo’i mea uma o pisinisi ma kamupani, ua tu’u atoa lo’u fa’atuatuaga ia Afa, ona o ia ua avea nei ma Pule le tumau, se i toe malosi lelei si o’u tama ona toe suia lea.

Ua fai nei la matou tonu ma Ioane ma Tino fa’apea si o’u tina tausi o Ana ma ua matou malilie fa’atasi e ave lo’u tama matou te nonofo mo ni nai masina, ona toe alu ane ai lea e va’ai pisinisi ma kamupani, ua fa’apea lava ona fai.

Na fiu si ali’i o lo’o pule i le fale talimalo e fai mai ia te a’u, i le pili o le fale talimalo, ae na tasi lava la’u tala, e totogi uma a matou pili ona matou o ‘ese ai lea. Na i’u lava ina vala’au ia Afa, ae e le i suia ai lo’u manatu, e totogi uma a matou pili, ma ua malolo se manatu o Afa, ma ua matou o loa ma lo’u tama.

Na fiu lo’u tina o Makerita e tagi ma tauanau mai a’u e tu’u lo’u tama, o le a ia tausia lelei, ae sa le i fo’i ai lo’u loto, ona ua ou iloa lelei lava, e i ai le mea e tupu, afai o lea ua malosi mai si o’u tama, o lona uiga, a fo’i i le fale e nonofo fa’atasi ma Makerita ma Peteru, o lona uiga, ou te fa’alogo mai, ua oti si o’u tama i faiga a le to’alua lea.

O tapenaga uma lava sa fa’atino e si o’u to’alua o Tino, o Afa, fa’apea ma le tama o Ana. Ua au mai le va’alele la’ititi ua matou o ai i le isi itu o Peretania lea o lo’o i ai lo matou fanua, ma o se malaga sa alu ma le malie atoatoa o lo’u loto ma lo’u mafaufau, aemaise ai, o lo’u fiafia ina ua matou o ma si o’u tama.

A’o le i alu la matou malaga sa taumafai malosi Makerita ma Peteru e taofi lo’u tama, peita’i, sa le i taliaina e le falema’i, ona o le fesili muamua lava a le foma’i, po’o fea na i ai i le taimi na tau saili ai se tasi e sainia pepa mo le ta’otoga o lo’u tama. O le isi itu, ua iloa lelei lava e ali’i foma’i le tulaga o lo’o i ai nei lo matou aiga, ona ua uma ona ou fa’ailoa i ai. O le ala lea na sau ai loa le fa’atonuga a le Foma’i, matou te o ma lo’u tama. A’o le i faia ia tulaga, sa muamua lava o ma fetufa’ai ma le ali’i foma’i, ona e mo’omia ni tama’ita’i se to’alua pe to’atolu e va’aia lo’u tama a’o i ai i lo matou aiga. Ua fa’apea lava ona fai, ua matou o uma nei ma tama’ita’i foma’i e to’atolu, o si o’u tuagane o Ioane lea na alu ane mamao lava ona o lona fia va’ai i lo ma tama.

Ua matou taunu’u nei i lo matou fale, o se va’aiga matagofie ua iloa nei e lo’u tama fa’apea si o’u tuagane la’ititi i lea taimi, ua mautu mea uma, e leai se mea e fa’aletonu. Ua i ai tagata faigaluega ma o i latou lava ia o lo’o fa’amoemoeina e i ma’ua ma Tino e fa’agaoioia mea uma.

Ua le mafai ona ou toe tu’ua lo’u tama mo se taimi pu’upu’u, matou te taunu’u atu ua uma ona sauni mea uma, ona ua leva ona poloa’i mai Tino i tagata faigaluega i le mea e tatau ona fai. Na ou iloa lava le fiafia o si o’u tama ae maise ai o si o’u tuagane o Ioane, ina ua molimau i le matagofie o le fanua atoa fa’apea ma fale o lo’o i ai.

“Papa, ia afio maia ma tala mai a’ao i le maota nei.”

E faia pea