LOLO: O FA’ATA’ITA’IGA LELEI E AMATA MAI IA TE OE LE TA’ITA’I

O le aso ananafi na vaaia ai le afioga i le Kovana Sili ia Lolo Matalasi Moliga, le Lutena Kovana ia Lemanu Peleti Mauga, o afioga i Fa’atonusili o Matagaluega ma Ofisa eseese uma o le malo faapea ai le to’atele o tagata faigaluega a le malo, o galulue i le teuteuina ma le toe faafouina o faleaoga a aoga maualuluga i le atunuu.

O ni isi o ta’ita’i o le atunuu na velevao ae o isi na vali fale ma fesoasoani i le faamatagofieina o faleaoga ma lotoa a aoga.

Na taua e Lolo i lana Kapeneta i le aso Lulu na te’a nei, afai e manatu se ta’ita’i e fai e le atunuu ni galuega lelei mo le malo ma le atunuu, e tatau i ta’ita’i o le malo ona fai i latou ma fa’ata’ita’iga i le faia o nei galuega lelei.

“So o se fa’ata’ita’iga lelei lava e faia i totonu o galuega a le malo, a’oa’oga faapea ai nu’u ma aiga, e tatau lava ona amata atu ia te oe le ta’ita’i, o le mea lea ou te talosagaina ai outou uma o Fa’atonusili o Matagaluega ma Ofisa a le malo, ina ia e savali e vaai le faleaoga lena ua filifili lau matagaluega tou te faamamaina, ina ia mautinoa e faatinoina uma galuega e moomia ona faaleleia a’o le’i toe a’e aoga a le fanau i le vaiaso fou,” o le fautuaga lea a le kovana sili i sui o lana kapeneta i le vaiaso nei, e tusa ai ma galuega mo le faamamaina o faleaoga i le atunuu.

O le afioga i le kovana sili ma le lutena kovana ma le la aufaigaluega, o le Ofisa o Tupulaga Talavou, Tina ma Tama’ita’i faatasi ai ma le Ofisa o le Faletupe o Atina’e, na galulue i le faamamaina o le aoga i Fagaitua i le taeao ananafi.

Sa aofia ai fo’i ma le Ofisa o lo o gafa ma le suesueina o faiga faaalatua i totonu o le Ofisa o le Kovana Sili, lea o lo o taitaia e le afioga Save Liuato Tuitele.

E ui i le vevela o le la i le taeao ananafi ae lei solomuli ai le afioga i le kovana sili ma lana aufaigaluega atoa i le faamamaina o le lotoa, faapea ai ma le toe valiina o totonu ma fafo o le faleaoga ma faasolo atu ai i totonu o le fale ‘ai a le aoga.

O isi matagaluega a le malo sa galulue i isi fo’i faleaoga e pei o le aoga maualuga i Tafuna, Leone, Samoana ma le Voch Tech i Nuuuli.

O le amataga o le tausaga nei na faatula’i ai e le kovana ma le lutena kovana se faataitaiga i le kapeneta, ina ia filifili e ofisa ma matagaluega taitasi a le malo po o fea le aoga maualuga latou te tausia, ona o lea i masina taitasi e siaki ma vaai mea o lo o manaomia e lea aoga ma tuu atu i ai la latou fesoasoani i le faamamaina ma le teuteuina o le faleaoga atoa ai ma le lotoa.

I le aso Lulu na te’a nei, na toe polili atu ai e Lolo se feau faamanatu i sui o le kapeneta e faatatau i galuega e tatau ona faia i faleaoga, ina ua maitauina e i ai lava ni isi o faatonusili e le’i o lava e siaki faleaoga o aoga ua latou filifili e tausi ma faamama.

“Ou te iloa e i ai lava ni isi o outou faatonusili e le’i o o lava e asiasi i aoga ua uma ona tofia outou tou te vaaia ma faamama,” o le saunoaga lea a Lolo.

“Afai e te le’i alu lava e vaai lau aoga, ou te fautua atu ua tatau ona e savali e vaai lau aoga, aua le tuu tia’iina le galuega i le sui faatonusili, alu oe le faatonusili e siaki ma vaai i mea o lo o manaomia ona faalelei, ou te iloa e tofu uma lava tatou ma le tele o galuega e tatau ona fai i totonu o ofisa, ae o tatou o ta’ita’i e tatau ona taulamua i so o se mea lelei e fai, ina ia fai ma faata’ita’iga i le atunuu,” o le lu’i lea a le alii kovana i lana kapeneta.

O le faanaunauga o le ali’i kovana, ia maea uma galuega mo le faamamaina o faleaoga a’o le’i o o i le taimi e toe a’e ai aoga a le fanau.