[Sosoo ane loa lau faitau i le tatou tala faasolo mo lenei vaiaso, lea na gata mai i le vaiaso na tea nei i le taimi lea maua ai e Kati ma lana vaega sui e toalua o le vaega faatupu faalavelave na taumafai e ulufale faamalosi i totonu o le falema’i, ma ua taofia nei i laua i lalo o le vaavaaiga a leoleo, e faatali tai suesuega ua faagasolo i le mafuaaga o le la taumafaiga.]

Na ona maua lava i luga o satelite a le vaega faatupu faalavelave o le mea ua tupu i a latou tagata na aga’i atu i le falema’i, tuu atu loa ma le faatonuga i le aufaigaluega ina ia motusia loa fesootaiga uma lava i luga o le vateatea, telefoni ma initaneti ina ne’i faigofie ai ona maua le latou nofoaga e le vaega o leoleo nana a le malo o Italia, peitai e misi uma i isi masini ae o le masini faatonutonu alu mamao lea o lo o ola i totonu o le taavale a Kati, e leai ma se gaioiga o misi ai, o le mafuaaga foi lea na toe savali faanatinati ai Kati i lana taavale ma siaki lana misi, ma ia mauaina ai le nofoaga lea o lo o faatonutonu mai ai fesootaiga na o atu ma le toalua lea ua loka e leoleo, o le nofoaga foi lea ua leva ona ia masalomia o lo o autu i ai fefaatauaiga o le pauta ma isi fualaau faasaina.

Se’i o tatou liliu atu lava i le nofoaga a le vaega faatupu faalavelave ma le tulaga pagatia lea ua o o i ai. Na ona sao mai lava o le tama faamoemoeina a le vaega faatupu faalavelave mai le taimi na pue ai e leoleo, faasasao atu loa i le falema’i ma la fetaui ai ma le isi a latou teine faamoemoeina lea na alu atu ma le faatonuga o le mea e tatau ona fai, peitai o lea ua toe maua faalua e leoleo i le falema’i ma ua auina sa’o atu nei i le falepuipui e taofia ai, ae o le taimi lea i totonu o le nofoaga a le au faatupu faalavelave, ua faatonuina ai ni isi o a latou tama faamoemoeina ina ia agai atu loa i le taulaga ma faia ni osofaiga faasaga i soo se tagata o le atunuu e aofia ai ma leoleo. Ua faatonuina fo’i e le taitai lana vaega faatupu faalavelave ina ia faamamafa osofaiga i nofoaga o lo o i ai fanau e pei o aoga ma nofoaga e toatele i ai tagata faatau e pei o faleoloa tetele i le taulaga.

E afa itula talu ona tuana’i le faalavelave na loka mai ai le alii ma le tamaitai mai le falema’i ae maua mai le tala e i ai se faleaoga i le isi tulimanu o le taulaga ua mu ma ua toatele fanau aoga ma faiaoga ua fasiotia, e o o foi i leoleo lotoa e toalua sa i ai ua maliliu foi. Na ona maua lava e Kati o le uaealesi e faatatau i le faalavelave, oso loa i lana taavale ma faanatinatu atu loa i le nofoaga o lo o i ai le faleaoga lea, pau le itu na mateina e le tama, e tatau ona ui atu i le isi auala ‘alo o lo o fesoota’i ma le auala e aga’i atu i le faleaoga, o iina lea na fetaui ai loa Kati ma se ta’avale lanu uliuli soloatoa o lo o alu atu i le isi itu i se saoasaoa uiga ese, na ona faatafa lava o Kati ae togi ana mailei i luga o le auala, ma see ai pa’u o le ta’avale ae tifa aga’i i le sami.