O le toe taliu mai ai o le afioga i le ali’i Senatoa ia Faumuina Tagisiaali’i mai se fonotaga i mataupu tau a’oa’oga na faatasi atu ai i le aai o St. Louis, Missouri i le masina ua te’a nei, ua ia fautuaina ai loa le Fa’atonusili o Aoga ma le Matagaluega atoa, ina ia lagolagoina le fautuaga lea ua tu’uuina mai mo le fa’aaogaina o le polokalama e taua o le ‘Common Core State Standards’.

O le tele o setete ma teritori a le malo tele ua latou fa’aaogaina lea polokalama ma o lo o tutusa uma ai ituaiga a’oa’oga e faia i aoga a le malo ma aoga tuai.

O sui o le atunuu na malaga i lenei fonotaga sa usuia i le aso 25-27 Iuni 2013, na aofia ai Faumuina ma le ali’i faipule ia Vaetasi Tu’umolimoli Saene Moliga, o i laua ia o lo o avea ma ta’ita’ifono o Komiti o Aoga a le Senate ma le Maota o Sui, o se sui o le Aoga Maualuga a Kanana Fou faapea ai ma le Faiaoga o le Tausaga a Amerika Samoa, Iose Afu Muasau.

“O le mataupu autu na laualuga i ai la matou fonotaga, o le fautuaina lea o setete ma teritori uma o le Iunaite Setete ina ia amata loa ona faaaoga le  ‘Common Core State Standards’, ina ia vave ai ona si’itia le maualuga o aoaoga e tuuina atu i fanau aoga,” o le saunoaga lea a Faumuina.

E silia i le toa 400 sui usufono mai setete ma teritori o le malo tele na auai i lenei fonotaga, ma o i latou nei e aofia ai faipule o setete ma teritori, faatonusili o aoga, atoa ai ma i latou o lo o aofia i le talanoaina o mataupu tau i aoaoga i vaega eseese o le malo tele.

I le tauaaoina ai e afioga i senatoa o se kopi o lenei ripoti mai ia Faumuina i le vaiaso na te’a nei, sa ia taua ai lona matua lagolagoina o le mulimulita’i o Amerika Samoa i lenei polokalama, e le gata e lelei ai aoaoga mo le fanau, ae maua ai fo’i vaega tupe mai le feterale e mafai ai ona agava’a atu ai ma fanau aoga mai aoga tua.

Na toe faatepa e le alii senatoa sui o le senate i le saunoaga a le Faatonusili o Aoga a le malo ia Vaitinasa Dr. Salu Hunkin Finau i le taimi na faamaonia ai tofiga a le kovana faasaga ia te ia, fai mai o le 80% o fanau aoga na faauu mai i aoga maualuluga na su’e i suega ulufale mo le Kolisi Tuufa’atasi i le tausaga aoga i ona tua atu e le’i pasi.

“Afai la o lea ua tatou iloa e to’etele naua fanau aoga e le o lelei faaiuga o a latou suega, ona tatou malamalama lea e i ai le mea o lo o fa’aletonu i le a’oa’oina o fanau aoga,” o le saunoaga lea a Faumuina.

“O ni isi o fanau e aoga e ese lava ituaiga matata e fiafia i ai, o isi e le fiafia i galuega faa ofisa ae fiafia ma atamamai i galuega e pei o le fai eletise, palama, kamuta, inisinia, ma isi lava ituaiga galuega e ese mai i galuega faa ofisa, lona uiga, o vaega uma ia e tatau i le matagaluega ona vaavaai toto’a i ai, ina ia aua ne’i taotaomia lagona naunau o fanau aoga e fia faailoa a latou agava’a, ma e mafai pe afai e faaaogaina e le malo le polokalame fou lea,” o le saunoaga lea a le ali’i senatoa.

Na tu’uina atu foi e Faumuina i Senatoa se kopi o le poloaiga na sainia e Togiola Tulafono i le aso 3 o Oketopa 2012, lea sa ia poloaina ai le tatau i le matagaluega o aoga a le malo ona faaaoga loa le Common Core State Standards mo le manuia o aoaoga a le fanau i le atunuu.

Na taua e Togiola i lana poloaiga e faapea, o le polokalama lenei o le a mafai ai ona siitia tulaga tau aoaoga mo fanau e amata mai i le K5 e o’o atu i le Vasega 12, ma faigofie ai ona maualuga le iloa o fanau aoga a’o le’i ulufale atu i kolisi ma Iunivesite maualuluga.