TU’UAIA SE ALI’I FAI’AIGA MA LONA ‘NIECE’

O le Aso Lua na te’a nei na taofia ai e leoleo i le toese i Tafuna se ali’i mai Pago Pago, ona o tu’uaiga i lona fai’aiga i se teineititi o lona aiga (niece).

O le taeao ananafi na poloaina ai e le ali’i fa’amasino ia John L. Ward II le toe taofia o lenei alii i le toese mo le 48 itula, e fa’atali ai suesuega a le malo o lo o faagasolo e tusa ai o le faalavelave na tula’i mai.

Na taua e le loia a le malo i le Samoa News e faapea, o le faalavelave na tofu atu i le ofisa o leoleo i le amataga o le vaiaso nei, ina ua ‘ona atu le ua molia ma fai uiga mataga i lona niece, ma faafesoota’i ai loa e le tina o le teineititi na aafia ia le ofisa o leoleo.

O lo o faamoemoe le malo e molia lenei alii i tu’uaiga e aofia ai le faiaiga ma se teineititi e laititi i lalo o le tulafono, tagofia o itutinosa o se tama’ita’i e le faaipoipo i ai, atoa ai ma le faiaiga i se tama’ita’i la te aiga.

E le o i ai se vaega tupe ua faatulaga e tatala ai le ua molia i tua, ae ua faamoemoe o le itula e 8:30 i le taeao nei e toe fofogaina ai lana mataupu i luma o le fa’amasinoga faaitumalo.

SAUNI FITIAO E TALI IOE I TUUAIGA A LE MALO

O le vaiaso fou lea ua toe tolopo i ai le fofogaina o le mataupu a le ali’i o James Fitiao i luma o le Fa’amasinoga Maualuga, ma le tuutuuga e oo atu i le aso lea ua sauni le ua molia e tuuina atu lana tali ioe e tusa ai o tu’uaiga faasaga ia te ia, ona o le mataupu lea na la fai’aiga ai ma se teineititi e 14 tausaga le matua na sola ese ma lona aiga i le tausaga na te’a nei.

Ina ua valaauina le mataupu a Fitiao i le taeao ananafi i luma o le ali’i fa’amasino sili lagolago ia Lyle L. Richmond, na talosagaina ai e lana loia fautua ia Michael White le faamasinoga mo se avanoa e toe tolopo ai le fofogaina o lenei mataupu, ona o lea faatoa uma ona saini e le ua molia le latou maliliega ma le malo.

Na talia e le faamasinoga le talosaga ma tolopo ai loa le mataupu a le ua molia e toe fofogaina i le vaiaso fou, ma o lo o taofia pea o ia i le toese i Tafuna ina ua le mafai ona ia totogiina le $60,000 na faatulaga e tatala ai o ia i tua.

O lo o tuuaia e le malo Fitiao i moliaga e lua o le faiaiga ma se teineititi e laititi i lalo o le tulafono: lua moliaga o le tagofia o itutinosa o se teineititi e le faaipoipo i ai: lua moliaga o le faia o amioga faasotoma: ma moliaga e lua o le faaoolima mataga i se teineititi.

TETE’E TAPENI PIO I TUUAIGA A LE MALO

O le aso 28 Aokuso lea ua faatulaga e toe tula’i ai le alii o Tapeni Pio i luma o le faamasinoga maualuga, i le maea ai ona ia teena o tuuaiga a le malo faasaga ia te ia i le taeao ananafi.

E fa moliaga mamafa o lo o tuuaia ai e le malo le ali’i o Pio, e afua mai i le faalavelave lea ua ma’itaga ai se teineititi e 15 tausaga le matua sa la faauo talu mai le masina o Iulai 2012 seia oo mai i le masina o Ianuari 2013.

Na faailoa e le teineititi ua ma’itaga i leoleo e faapea, e faalua ona la momoe ma Pio i le fale a le ua molia i Fagali’i, ae ina ua fesiligia e leoleo le ua molia, sa ia faamaonia ai faamatalaga a le teineititi na aafia sa faia i leoleo.

E $25,000 le tupe lea ua faatulaga e le faamasinoga e totogi ona faatoa mafai lea ona tatala le ua molia i tua, ae a mafai ona tatala o ia i tua, ua faasa e le faamasinoga ona ia toe taumafai e faafesootai le teineititi na aafia i lenei mataupu po o molimau a le malo o lo o taua o latou igoa i faamaumauga a le faamasinoga.

O le afioga i le ali’i faamasino le tumau ia Elvis P. Patea na iloiloina lenei mataupu i le taeao ananafi, lea na sui tulaga i le afioga i le fa’amasino sili ia Michael Kruse sa malaga i le fu’a a Manu’a, faatasi ai ma le lagolagosua a le afioga i le ali’i faamasino lagolago ia Logoai Siaki.