Tala otooto o Fa’amasinoga
MOLIA DICKLAN TE’O I LONA FA’AO’OLIMA I LONA USO
Ua molia nei e le malo le ali’i o Dicklan Te’o i le moliaga mamafa o le faaoolima i le tulaga lua ma le solitulafono mama o le faatupu vevesi i nofoaga faitele, ona o le faalavelave lea na tula’i mai i le po o le aso 20 o Iuni, 2013 i Pago Pago, lea na ia taina ai le ulu o lona uso matua i se samala e pei ona taua i faamaumauga a le faamasinoga.
Ina ua fesiligia e leoleo Dicklan e tusa ai o lenei faalavelave, sa ia faamaonia lona faaaoga o se samala e ta ai le ulu o lona uso ona o se la taugaupu e faatatau i pepa nofomau a le to’alua a lona uso matua lea o lo o sponsor e Dicklan. E tula’i mai lenei faalavelave ae o lo o faia se inugapia a lenei aualii.
O lo o tumau pea poloaiga o lo o tatala ai Te’o i tua i le taimi nei, ma ua faamoemoe o le taeao nei e tula’i ai i luma o le Fa’amasinoga Maualuga mo le faaauauina ai o lana mataupu.
MOLIA MARK MULIPOLA I LE FAAOOLIMA TULAGA MUAMUA
O le ali’i mai Malaeimi lea o lo o tu’uaia i lona faaoolima i lona tama i se agaese i le Aso Sa na te’a nei, ua molia i le moliaga mamafa o le faaoolima i le tulaga muamua lea e mafai ona faasala ai se tasi i le toese mo le olaga atoa, pe faasala foi i le falepuipui i le va o le 10 ma le 30 tausaga.
O tuuaiga faasaga ia Mark Mulipola na afua mai i se faalavelave na tula’i mai i lo latou aiga i Malaeimi.
E $150,000 le tupe lea ua faatulaga e le faamasinoga e totogi ona faatoa mafai lea ona tatala Mulipola i tua mai le toese, ma ua faamoemoe o le Aso Tofi o le aso a taeao e toe tula’i ai o ia i luma o le faamasinoga mo le iloiloina o le aso e faataunuu ai lana ulua’i iloiloga.
Afai ae mafai ona tatala Mulipola i tua mai le toese, ua faasa e le faamasinoga ona toe nofo i le latou aiga i Malaeimi, pe toe taumafai fo’i e faafesootai so o se tasi o lona aiga, a ia saili se isi nofoaga e nofo ai a’o faagasolo ai taualumaga o lona faamasinoga.
Ua faasa foi ona ia toe umia se aupega matautia po o se fana, a ia fesootai ma lana loia i taimi uma ma aua ne’i ona toe solia se tulafono a le malo.
POLOA’IA MOANANU AUA NE’I ONA TOE UMIA SE A’UPEGA MATA’UTIA
Ua poloaina e le ali’i fa’amasino o John L. Ward II ia Fa’asega Moananu o Pago Pago ina ia aua ne’i ona toe umia se a’upega mata’utia po o se fana, a’o fa’agasolo ai taualumaga o lona faamasinoga i le taimi nei, ona o le faalavelave lea o lo o tuuaia ai o ia i lona faaoolima i se tamaititi e ala i lona fa’aaogaina ai o se u’amea.
O ananafi na faila ai e le malo le moliaga o le faaoolima i le tulaga muamua faasaga ia Moananu, ma ua taofia nei o ia i le toese i Tafuna se’i vagana ua totogi le $25,000 ona faatoa mafai lea ona tatala o ia i tua.
O le aso a taeao lea ua faatulaga e toe tula’i ai Moananu i luma o le fa’amasinoga, ma iloa ai pe faataunuu lana ulua’i iloiloga po o le tuu sa’o atu o lana mataupu e fofogaina i luma o le Fa’amasinoga Maualuga.
IOE FELISE TOLEAFOA I TUUAIGA A LE MALO
O ananafi na faamaonia ai e le Faamasinoga Faaitumalo le moliaga o le faatupu vevesi i nofoaga faitele faasaga i le alii o Felise Toleafoa, ma ua sauni Toleafoa na te tuua le teritori ae toe fo’i atu i Samoa mo le tasi tausaga e pei ona aofia ai i le latou maliliega ua sainia ma le malo, ona o tulaga faaletonu i ona pepa nofomau.
O Toleafoa na malaga mai i le pemita e 30 aso, ma ua tolu masina talu ona aumau i totonu o le teritori.
Ua malie Toleafoa, afai o le a ia tuua le teritori i lona loto malie ma toe fo’i atu i Samoa, o le a faamalumalu le tuuina atu o se faasalaga a le faamasinoga faasaga ia te ia mo le tausaga atoa.
O le Aso Tofi o le vaiaso nei lea ua faamoemoe e malaga atu ai Toleafoa i Samoa i le va’a o le Lady Naomi.