TOE TATALA FALE FALAOA TAPUNIA OFISA SOIFUA MALOLOINA

O le vaiaso na te’a nei na toe tatalaina ai fale falaoa a le Amy’s Bakery lea na tapunia e le Matagaluega a le Soifua Maloloina, ina ua faamaonia le usitaia o vaega uma sa faatonuina e toe faaleleia, e pei ona faamaonia e le Faatonusili o le Matagaluega ia Motusa Tuileama Nua.

“Toe tasi le fale falaoa lea e le’i tatalaina, se’i toe faia i ai le isi siaki a le matagaluega ona iloa lea o se tulaga e tatau ona i ai, o le fale falaoa a le Haleck i Pava’ia’i,” o le saunoaga lea a Nua.

“FAAFETAI TAOA MO LE AVANOA”

Ua faaalia e ni isi o le to’a 300 o tagata matutua o lo o i ai o latou igoa i le lisi faatalitali mo ni galuega i le Ofisa o Tagata Matutua (TAOA), lo latou fiafia tele ina ua mafai ona faamalolo tina ma tama matutua ua ausia taimi e tatau ai ona galulue i le polokalama, ae tuu mai le avanoa ia i latou o lo o faatalitali e galulue ai.

“O matou uma lava o tagata matutua sa tautua mo le malo, lea la maea le taimi na latou galulue ai mo le polokalame, ae o lea ua oo mai le faasologa ia i matou nei o lo o faatalitali e aofia ai ma lo’u nei tina matua,” o le talanoa fiafia lea mai lea a Filifiliauro Mulipola i le Samoa News.

Na taua e Filifiliauro e faapea, ua silia ma le tausaga o faatali sona avanoa e galue ai peitai o le faaiuga ua faia e le faatonusili ma le matagaluega e faamalolo i latou ua ausia le ta’i 48 masina e galulue ai ae tuu atu le avanoa i le isi toatele o lo o faatalitali, ua atagia mai ai le manulauti a Lolo ma Lemanu e faamuamua tagata.

O lagona fiafia lava fo’i ia na mafai ona faailoa mai e Amituana’i Laloifi ma Leavasa Logotaeaao i le Samoa News, ina ua fesiligia i laua e faatatau i lenei mataupu.

Na taua e le tama ia Amituana’i ma Leavasa e faapea, pau le laasaga lea ua la faatalitali i ai o le aofia lea o i laua i le toa 60 lea ua sauni le TAOA e faa faigaluega e sui tulaga ai ia i latou o le a faamalolo.

AUFAATASI PISINISI TUMA’OTI E SAPAIA LE MAU A AS I LE LAUMUA

Ua mae’a aufa’atasi nisi o pisinisi tuma’oti i Amerika Samoa ina ia latou sapaia le mau a le Malo o Amerika Samoa lea e fa’aleo i le Laumua i Uosigitone, e aga i le tulaga o le afaina o le tamaoaiga o Amerika Samoa ua mae’a fa’atulaga mai le Laumua i DC.

O lo’o ua lalamua nei le Star Kist, Tri Marine International, Polynesia Line ma le Hamburg Sud e aofia atu ma isi o lo’o ua saofaga mo lea fa’amoemoe, ma e toatele na’ua tagata o le atunu’u o lo’o faigaluega ai.

Ina ua fesiligia le Chamber of Commerce ma lona fa’atautaiga i lea fo’i itu, ae ua fa’ailoa mai, “E matou te le o iloa lea taumafaiga, peita’i, e le o se mea leaga, e so’o se ala lava e taumafai ai le fa’aleleia atili o le tamaoaiga, e le fo’i le Chamber, e ao ina sapaia. Fa’afetaia fo’i le tofa mamao, peita’i, o lo’o taumafai fo’i le matou itu e sailia nisi ala e mafai ai ona inivesi mai nisi Kamupani i totonu o le tatou atunu’u ma fa’aleleia atili ai galuega ma le tamaoaiga o tagata lautele o le atunu’u.”

O Mary Sestric o le Star Kist Co. sa ia fa’ailoa mai, “O le matou lagolagosua ua mae’a ona fa’amautuina i lea fo’i taumafaiga, ua toetoe atoa le 50 tausaga o le Kamupani talu ona tulaueleele ma galulue i Amerika Samoa, o matou lava ua tatau ona mua’i iloa ala e afaina ma ala e fa’aleleia atili ai le tamaoaiga tausi o le atunu’u lautele.”

MAFAI ONA FAAAOGA E LE ATUNUU LE FALE TELE MO ‘AIGA

Ua faamaonia mai e le Ofisa o Mataupu Tau Samoa le mafai lea ona faaaoga e le atunuu, aiga, faalapotopotoga ma soo se tasi lava le fale tele a le malo i Utulei mo soo se faagaioiga e pei o ‘aiga ma faatasiga e aonoa ma se totogi, sei vagana ai le totogiina o se vaega tupe i le Ofisa o Paka ma Malae taalo mo le faaaogaina o le eletise.

Na faamaonia mai e le Sui Failautusi o le Ofisa o Mataupu Tau Samoa ia Tuiagamoa Tavai i le Samoa News e faapea, o lenei fuafuaga o ni isi ia o taumafaiga a le alii kovana ia Lolo Matalasi Moliga, ina ia mafai e le atunuu ona faaaoga mea totino a le malo e fesoasoani ai i aiga.

“Pau le fautuaga i le atunuu, e le faatagaina le faaaogaina o le ava malosi i nofoaga nei,” o le saunoaga lea a Tuiagamoa.

O le isi fuafuaga faaauau a le malo o lo o faaaoga ai le fale tele i Utulei i le taimi nei, o le faaaoga lea e fai ai ‘ava o feiloaiga a ta’ita’i o le malo i aso Faraile faaiu o masina ta’itasi, ina ia maua ai le avanoa e feiloa’i ma talanoa faatasi ai taitai o le atunuu, aemaise ai o le faalauiloaina o auala e faatinoina ai gaioiga o le aganuu i fanau aoga.