E $150,000 le tupe lea ua faatulaga e le faamasinoga e totogi ona faatoa mafai lea ona tatala i tua se ali’i talavou lea ua taofia i le toese i Tafuna ona o tu’uaiga i lona osofaia o ni faleoloa se fitu, tasi le falesa ma fale o ni aiga se tolu i le va o Ianuari ma Aperia 2013.

O le Aso Lulu na te’a nei na tula’i ai Joseph Iakopo i luma o le Faamasinoga Faaitumalo ae ua toe tolopo lana mataupu i le vaiaso fou.

O faleoloa e fa na osofaia e lenei alii, e aofia ai le Ocean Store i Nu’uuli lea na osofaia ia Ianuari 30, 2013, o le Canton Mart i Lepuapua ma le Janice Gold Spot i Leone lea na logoina ai le ofisa a leoleo i le po o Fepuari 3, 2013 ma le Vaiala Mart i Pavaiai lea na logoina ai le ofisa a leoleo i le vaveao lava lea e tasi.

E 34 moliaga ua tuuaia ai e le malo le alii o Jose e aofia ai moliaga mamafa e 12 o le talepe fale i le tulaga muamua; e lua moliaga o le taumafai e talepe se fale; tasi le moliaga o le faaoolima i le tulaga muamua; iva moliaga o le gaoi; ma moliaga mama e 12 o le fa’aleaga meatotino i le tulaga lua.

Sa faamatala e le pule o le Ocean Store e faapea na ia lagona se pa’o tele i luma o le faleoloa, ma e alu atu e siaki, sa ia vaaia ai vae o se tagata o loo tautau mai luga o le fa’alo o le faleoloa.

O le aso 2 o Me na suesueina ai e leoleo ia Joseph ma sa ia faailoa i leoleo, ua leva ona fia mau se avanoa latou te talanoa ai ma leoleo, sei faailoa atu ai faleoloa ma fale o aiga sa ia osofaiga, ma atonu o le taimi lava na te faailoa atu ai i leoleo nei mea leaga sa ia faia, o le taimi fo’i lea o le a to’a ai lona mafaufau.

O le faleoloa o Canton Mart na mafai ona faate’i le gaioiga a lenei alii, ina ua pisa ta’ifau a le aiga i le toulu o timuga i lea po ma sa vaaia ai e le pule o le faleoloa se tagata o savali agai i tua o le faleoloa, ae e le’i umi ae ona faalogoina se pao tele mai i tua o le faleoloa.  Na taumafai le pule o le faleoloa e siaki ia masini pu’eata sa i tua o le faleoloa, ae siaki atu ua ese le itu ua faasaga i ai le mea pu’eata, ae ua pe uma moli i autafa o le faleoloa.

Na faamaonia foi e Joseph i leoleo ana gaioiga na faia i le osofaiga o lenei faleoloa lea na toe vave sola ese ina ua ia faalogoina ni tagata ua pisa atu.

Ae o le po lava lea e tasi na osofaia ai Canton Mart na toe maua ai foi e le ofisa a leoleo i Leone se vala’au mai i le pule o le faleoloa a le Janice Gold Spot ona o seisi ua osofaia lona faleoloa, lea na fa’ato’a ia iloa ina ua usu atu e tatala le faleoloa i le 5 i le taeao.

Ina ua siaki e le pule o lea faleoloa ia masini pu’eata o le faleoloa, na iloa ai, na ui atu le tagata ma sana moli uila, i tua o le faleoloa, i le itu o i ai le pusa aisa.

Na faamaonia foi e lenei alii i leoleo lona agai sa’o i le itu sa i ai masini tupe a le faleoloa, ae peitai, e leai se tupe sa iai.  E pe a ma le $300 le tau aofa’i o mea na faaleagaina e Joseph i totonu o le Janice Gold Spot.

Ae i le faleoloa mulimuli, le Vaiala Mart, sa faailoa ai e tagata faigaluega o le faleoloa i Pavaiai, i leoleo e faapea, sa le’i gata ina osofa’ia e lenei alii ia le faleoloa, ae sa ia faaoolima foi i le pule o le faleoloa.

Na faamatala e Joseph i leoleo e faapea, na ia ui mai i luga  o apa o le faleoloa ma sa ia agai sa’o foi i le masini tupe ae peitai sa leai foi se tupe na maua, o lea na ia ave ai se pepa sikaleti.

O lona ui atu agai i tua i le umukuka na ia u’uina mai ai se tamai naifi  ma ia agai atu i seisi potu o le fale, ma fetaui ai ma le tamaloa Asia o moe, ae o le pa’o o le alii gaoi na te’i ane ai le tamaloa Asia ma e’e.  Na ki iai e Joseph i mata o le tamaloa Asia ia lana moli uila ma musumusu i ai e aua le pisa ma ia fesiligia le tamaloa Asia p o fea o iai tupe.  Na tali le tamaloa Asia o la e i totonu o le potu o le pule.

Na taua e Iakopo, e fetaui lava lona oso mai i fafo ae la fetaui ma le pule o le faleoloa ua oo atu, ona tago lea o le pule u’u le atigi pusa ma togi ai o ia, peitai sa alo ma tui le lima o le pule i le naifi, sosoo ai lona kiki o le manava o le tamaloa a’o ta’atia i lalo, ma ia sola ese mai.

Na taua e le pule o le faleoloa i leoleo e faapea, e leai se mea na faaleagaina o lona faleoloa, sei vagana ai le katuni sikaleti e $30 le tau na gaoi e le ua molia