FUAFUA EFKS FAATU KAMUPANI NONO TUPE, FAASOLO ATU AI I SE FALETUPE

Ua faamaonia e le Ekalesia Faapotopotoga Kerisiano I Samoa lana fuafuaga e faatuina sa latou kamupani nono tupe, ma le faamoemoe e faatuina se faletupe I se taimi o le lumanai.

Na faaalia, ua leva ona soalaupuleina lea mataupu I Fonotele a le ekalesia I tausaga ua mavae, ae o le vaiaso nei na faalauiloa aloaia ai e le Failautusi Aoao o le ekalesia, le susuga Rev. Dr. Iutisone Salevao lea mataupu I le au tusitala. Fai mai a ia, sa pasia muamua lea fuafuaga e le komiti a le Au Toeaina I le Fonotele o le 2010. Peitai sa talia ia faaiuga o se suesuega (feasibility study) sa faatinoina pe alagatatau ona faatuina lea ituaiga atinae.

O le Fonotele la a le ekalesia I le masina na sei mavae atu nei na faamautuina ai lea mataupu ma ua tasi ai nei ina ia faatuina muamua se kamupani nono tupe, ona faatoa faatuina mulimuli ane ai lea o se faletupe. “O se atinae alu mamao ma o lo o matou fuafua e pe a ma le fa tausaga faatoa faatuina se faletupe,” o le saunoaga lea a le failautusi aoao.

LE FIAFIA TAMAITI AVELE I LE LE SUEINA O LE LATOU SUEGA

Ua lipotia mai le le fiafia o tama ma teine o le Vasega 10 Light (Year 10 Light) I le Kolisi o Avele ona ua le mafai ona sue le latou mataupu o le Design Technology I suega o le afa o le tausaga. Ua mafua lea tulaga ona e lei faia se latou vasega se tasi o lea mataupu talu ona amata mai le tausaga aoga o le 2013.

Na faamalamalama mai e le alii pule o le aoga, le susuga Luafalealo Mikaele Tofete e faapea, o le mafuaga o lea faaletonu, ona o le le lava o faiaoga. Fai mai a ia, o le mataupu lenei o Design Technology o se mataupu fou ma na amata aoaoina I tamaiti o le Vasega 9 I le tausaga na tea nei.

O ia tamaiti ua vasega 10 I le taimi nei. Na saunoa Luafalealo, o le faiaoga sa ia amata aoaoina lea mataupu I le tausaga ua mavae, o se faiaoga matematika ma e le mafai ona ia tauaveina uma ia mataupu e lua. Na ia faaalia, ua uma ona ave le latou talosaga mo se faiaoga e aoaoina le Design Technology I le Ofisa o Aoga ma o lo o latou faatalitali pea I se tali mai le ofisa.

FESOASOANI LE ACC I SE ALII NA TAIA E SE TAAVALE AO GALUE I SE PAMU KESI

Ua fesoasoani atu le Ofisa o Taui mo Faalavelave Faafuasei po o le Accident Compensation Corporation (ACC) I se alii talavou na aafia I se faalavelave tau taavale ao galue o ia I lana galuega I le pamu kesi I Leifiifi.

O le alii o Avii Sauaso o Moataa na lavea ina ua tifa I tua o le auala se taavale sa malaga mai le falemai agai I Apia, so’a le masini pamu kesi ma omia ai lea alii I le va o taavale sa tutu I le pamu I lena taimi. Na tuga manua I ona vae ma na iu ina tipi mutu ai se tasi o ona vae I lalo ifo o lona tuli. Na faaalia e le pule o le ACC, le susuga Malaeulu Lose e faapea, ua atoa nei le tolu vaiaso o maua e lea alii le fesoasoani tupe mai lona ofisa e ala lea I le maua o le 70% o lona totogi I vaiaso taitasi.

Na saunoa Malaeulu, o le a faaauau pea lea fesoasoani seiloga e maua e lona ofisa se lipoti mai se fomai e faamaonia ai ua lelei atoatoa manuaga o lea alii, ma e le toe moomia se isi togafitiga.

TOLOPO PEA LE FAUSIA O LE MAKETI FOU I FUGALEI

O lo o tolopoina lava I le taimi nei le fausia o le maketi fou I Fugalei. Na faamaonia mai e le pule o le Ofisa o Taui mo Faalavelave Faafuasei (ACC) lea e pulea le maketi e faapea, o lo o talia pea se faaiuga mai le kapeneta I se aso e amata faagasolo ai lea galuega.

Na faamaonia foi e le susuga Malaeulu Lose le maea ona tuuina atu o tauofoga mo le faatinoina o lea galuega I le komiti o tauofoga. Peitai na te lei faalauiloaina mai pe fia ni kamupani o lo o tauofo mo lea galuega. E pei ona lipotia muamua I a tatou tala, ua tele faitioga ma tusitusiga ua faia I lenei mataupu ona o le faagaioiga o tauofoga ma le suiga o le ata o le maketi.

O le ata sa I ai muamua o lea galuega e fogafale lua le fale, ae peitai ua suia nei I le fogafale tasi. E pei ona silafia, na amata mai feteenaiga I le va o le malo ma le au fai pisinisi ma le au fai faatoaga sa faaaogaina le maketi I Fugalei ina ua tapunia, lea na iu ai I se solo tetee agai atu I le maota fono I Mulinuu.

TETEE LE PULE O LE PULEGA O LE TINEI MU I MOLIAGA O LE FAAOOLIMA

O le amataga o le vaiaso nei na tulai ai I le Faamasinoga Faaitumalo ia le alii sa avea ma pule o le Pulega o le Tinei Mu ma Tautua mo Faalavelave Faafuasei, le susuga Seve Robert Tony Hill, ma ia teena ai moliaga faasaga ia te ia.

O lo o molia Seve I le moliaga e tasi o le faaoolima ma le moliaga e tasi o le faaoolima mataga. Na faaalia e lana loia, le susuga Fepuleai Ameperosa Roma e faapea, o lo o tetee Seve I ona moliaga ma sa ia talosagaina le vave faia o se iloiloga o lea mataupu.

O lo o tuuaia lea alii I lona faia o ni uiga mataga I se tamaitai e faigaluega I lona ofisa. O lo o talia pea le aso e toe tulai ai o ia I luma o le Faamasinoga.

Saunia Lilomaiava Andrew Fa’asau, Naenae Productions