O le vaega o A’oa’oga mo Faifa’ato’aga a le Land Grant a le ASCC na latou galulue fa’atasi e fa’atautaia le latou aso fa’apitoa, e fa’ataua ai i le fanau talavou  e silia ma le 250 na lesitalaina o latou suafa, e fia auai ma a’oa’oina lelei i ala e tapena ai lou saogalemu a’ia’i, a’o faia galuega i fa’ato’aga ma totonu fo’i o latou aiga i taimi uma.

O lea fa’atasiga tele sa faia i le Faleta’alo ole Kolisi Tu’ufa’atasi, ae o isi vasega uma sa fa’atautaia i nofoaga o lo’o totoina ai fa’ato’aga a le Land Grant - Agriculture Extension Services, fa’apea fo’i ma le lotoa o tausia ai manutuaolo.

“Ina ia tima’ia lava le fanau a’o fa’ato’a amata tu’ufesili o latou mafaufau i nisi o gaoioiga e va’aia e i latou e faia e tagata matutua o latou aiga, ae maise i taimi uma e faia ai galuega mamafa i le fa’amamaina o latou tafafale ma tuamaota, po’o fa’ato’aga fo’i, e ao loa ona fa’apopoto i latou, ia mautinoa ua iloa ona tausia lelei lo latou saogalemu a’o fa’atino ni tiute fa’apena, ae maise lava pe afai e fa’aaogaina meafaigaluega mamafa ma vaila’au o’ona.” O se fa’amatalaga lea a le susuga Tunaimati’a Albert Peters.

O se manulauti fo’i lea na susu atu ma se tasi o fofoga fa’apitoa o le polokalama fa’asolo, Chritianera Tuitele o le ASEPA. “ Ia mautinoa, ua saogalemu lelei olaga o le fanau i totonu o aiga, ae maise ia mataituina fo’i lo latou soifua maloloina i taimi uma!”

Ina ia mautinoa ua ausia lea tulaga, ua fautuaina ai e Tuitele le fanau, “Ia saogalemu ma mata’alia i taimi uma i tatou le fanau.”

Mai lea to’atele o le fanau talavou e afua mai le 5 tausaga se’ia o’o i le 16, sa vaevaeina i latou i vasega e 5 ina ia fa’afaigofie ona fa’agasolo ai a’oa’oga i vaega ta’itasi ua fa’atulaga ai lea aso taua.

O vasega ta’itasi e aofia ai: Boating & Safety a le Matagaluega o Leoleo & Matagaluega o Faigafaiva; Vaega a le EMS; Vaega a Vaila’au O’ona mo le tineia o Manu ma La’au fa’alafua i le Land Grant; Vaega o Lafumanu le tausiga, fagaina ma le Saogalemu e ao ina mataituina lava; Le vaega o Gaosiga o Mea’ai ma Fa’amalositino e mautinoa ai le saogalemu ma le Soifua Maloloina lelei o fanau i totonu o Aiga.

Peita’i, o le vasega muamua lava e na’o le fanau e 5-7 tausaga le matutua, sa faia le latou vasega e le vaega a le 4H ma o su’igaula, valiga ata, ta’aloga ma latou galuega alofilima fa’apena sa fa’atumu ai lo latou aso lea!

O le tama’ita’i o Amio Mavaega Luvu sa fai ma fofoga fa’afeiloa’i o le Auofisa lea ma o ia fo’i o le ta’ita’i o le Polokalama atoa na fa’atino i le aso ananafi 13 Iuni, 2013. O ia fo’i sa toe tolaulauina mai suafa o le fanau ina ia taua’aoina o latou fa’ailoga o tusi pasi matagofie mo i latou uma lava sa fa’asolo i nei vasega taua.

“O le mea sili lava ua ou iloa nei, e te le so’ona fa’aaogaina so’o se vaila’au pe a e le iloa po’o le a tonu lea vaila’au, e tatau ona e alu e ‘ave i lou matua ma fesili i ai po’o le a lea vaila’au, ae o le a sona aoga. A fa’asa e ou matua ona e tago i se fagu vaila’au e te le’i iloa ona faitau fa’apapalagi lona aoga, aua le tago i ai, usita’i e fa’asaoina ai lou ola!” O se tala lea a le ali’i talavou o Willie Faiai, na maua fo’i lona tusi pasi.

“O lea e fa’asa mai na ta’alo ta ita i pelu ma mea faigaluega e ma’ama’ai, aua o isi taimi e manatu a ita e pei lava pelu na o pelu ia e fa’aaoga mai e tama o ata tifaga! O pelu na e faia ai fe’au o lo’o ma’ai tele e i’u ina lavea, ma afaina ai matua ona ua e tago fua i le naifi o ta’atia, ae tatau ona e alu e teu lelei i le mea e te va’aia e masani ona teu ai e lou tina ma lou tama naifi.” O se tala lea a Zynbad Einstein.

Mai le sai pua’a sa fa’alogoina ai e le fanau le manogi le lelei, “O le manogi lea e tate fa’alogo lava i ai mai sai pua’a, ma ua fa’ailoa mai, e tatau ona fufulu lelei lima ma fa’amama lota tino pe a uma ona e alu e fafaga pua’a a lou aiga. E tele na’ua siama e mau mai lou tino pe a e alu i le lo’ilo’i. E tatau fo’i ona faia le ofu pa’u e puipuia ai lou tino atoa, pe afai e te alu e fufulu le sai pua’a i le masini. E le gata i lena, ae faia ma le mata tioata solo atoa e tali ai ou foliga uma, ina ne’i pisia mai ou fofoga i le suavai leaga a’o e fufuluina le sao pua’a.” O se fa’amatalaga lea a se tasi o ali’i talavou sa auai i lea a’oa’oga lelei.

I lea aso atoa, ua to’atele le fanau ua latou iloa lelei, e le tatau ona fa’atamala i le taulimaina o vaila’au eseese e o’o lava i vaila’au o lo’o faia ai tagamea a lo latou aiga, ma isi mea uma i totonu o le umukuka a lona aiga.