TALIA MA LE FIAFIA SUIGA I LE LBJ

Ua fa’aalia e ni isi o le atunuu lo latou agaga faafetai i suiga fou ua tula’i mai i le vaega e aumai ai fualaau ma vailaau (pharmacy) i le falema’i i le LBJ.  E pei ona ta’ua e le tama matua ia Iosua Amituana’i ma si ona faletua o Lesina, “O se suiga e le gata e lelei mo matou nei le au matutua ae faapena fo’i i le pulega a le falema’i, ina ia faafaigofie ai a latou galuega”.  Na fa’aalia e Amituana’i, o le a taofia lo la toe tau o mai i le falemai e faatali le taimi e piki ai a la fualaau.

Na faaalia foi e James Mareko mai i Pava’ia’i e faapea, o aso uma lava e alu ai i le falema’i e faatumu lana fagu fualaau, e le gata e alu i le pasi ae o le tau faatali ai i le fale talavai mo ana fagu fualaau, peitai o le suiga ua faia o se suiga lelei ma talafeagai.

O lenei suiga fou ua aofia ai le fa’aaogaina o telefoni ma imeli (email) e fesootai ai le Fale Talavai mo le toe faatumuina o fagu fualaau, ma o se tasi o mafuaaga autu ua faia ai lea suiga, ina ia taofia ai le tumutumu atu o le atunuu i le fale talavai.

Na taua e le pule o le Fale Talavai ia Evelyn Ah Hing-Faaiuaso i le Samoa News e faapea, talu lava ona tatala le auaunaga fou lea, ua toatele le atunuu ua telefoni atu ma imeli atu mo le faatumuina o a latou fagu fualaau.

Na faamanino e Faaiuaso e faapea, afai o se fagu fualaau na faatonu i le Aso Faraile, o lona uiga, e tatau ona piki i le Aso Gafua o le vaiaso e sosoo ai.

O le telefoni e fesootai atu ai pe afai e manaomia le toe faatumu o lau fagu fualaau o le 633-3098 poo le 633 3099, ona oomi lea o le laina faaopoopo (extension) o le 555, ae mo i latou e fia faia se avanoa e vaai ai le foma’i, ua fautuaina le faafesoota’i o le numera 633-1222 ona oomi lea o le laina faaopoopo o le 532.

Mo i latou e faaaogaina le imeli, o le imeli a le falema’i e fesootai i ai o le rx.refill@lbj.as.

I tausaga ua mavae, na faaaoga ai e ni isi o le atunuu luga o le polokalame a le alii kovana ua mavae atu ia Togiola Tulafono e faaleo ai a latou faasea faasaga i le falema’i ona o lenei mataupu.

Na taua e Lokeni Lemuelu mai Tafuna e faapea, o ni isi o taimi e alu ai e piki mai ana fualaau pe toe faatumu foi lana fagu fualaau, na te vaaia ai le faatumulia o luma o le fale talavai a le falema’i ae o le suiga ua faia nei ua fesoasoani tele lea mo ia le tagata ma’i, ma taofia ai le ono tula’i mai o se faalavelave i lona soifua maloloina pe afai e umi o faatali mo ana fualaau.

Saunoa le Taitaifono o le Komiti Faafoe a le LBJ ia Tofoitaufa Sandra King Young e faapea, o le manulauti a le pulega ma le komiti faafoe a le falema’i, e le gata ia tautua le atunuu i soo se taimi, a ia mautinoa fo’i o lo o talia fiafia e le atunuu tautua eseese o lo o ofoina atu e le falema’i.

TAUVAGA AUTALAVOU FA’AFALEFA - MATAGALUEGA SISDAC-AS

Ua mae’a le tauvaga fa’afalefa a Autalavou a le Matagaluega Amerika Samoa a le Ekalesia Aso Fitu Samoa Tuto’atasi sa faia mo le lua aso o le fa’ai’uga o le vaiaso na te’a nei.

O lenei tauvaga sa fa’atautaia i ona itu e lua, le fa’aleagaga ma ta’aloga mo autalavou. O Autalavou mai ekalesia e fa, Malaeimi, Leone, Nuuuli ma Newland, sa iloga ona pupulu le tauvaga aua e le’i fa’avaivai se autalavou i a latou fa’atinoga togia.

I le fa’aleagaga, sa fa’atautaia ai pese fa’aleagaga, tala fa’atino pupu’u, pese fa’aleagaga faitaga, o le Lauga a sui talavou ma le toniga ia laugatasia ai le autalavou i taimi uma e o’o lava i ta’aloga lea na fa’atautaia i le aso Sa.

I le aotelega o togi uma lava na maua i tauvaga fa’aleagaga ma ta’aloga sa manumalo ai a’ia’i ai Newland Center, tulaga lua Nuuuli ae tulaga tolu ai Leone, ma le tulaga fa o Malaeimi.

O sui totino o le Komiti sa fa’amasinoina lenei tauvaga fa’afalefa a lea Ekalesia e aofia ai Faife’au mai Leone Ioane Tyrell, Pr. Puni Alefaio le ta’ita’i matagaluega AS, ma le Ta’ita’i Toeaina o le Matagaluega Peniamina Siatunu’u.

TELE POLOKALAMA MO FANAU I TU’UAGA O A’OGA

Ua silia ma le 50 fanau aoga ua mae’a ona fa’auluina i se polokalama a le Land Grant mo tuuaga o aoga.  Ma o nei polokalama e faamasani ma fa’amalamalama ai fanau a’oga i galuega ma tomai e mafai ona a’otauina ai i latou i totonu o le polokalama eseese i le Land Grant.

O nei polokalama e amata i le 7:30 i le taeao ae faamae’aina i le 12 i le aoauli.  O se mea taua aua e fa’ailoa ai ia i latou le ituaiga a’oa’oga fa’afaifa’ato’aga, o le tausiga o la’au e aoga mo vai e tapui ai le soifua maloloina o tagata lautele, e ala i Vai Samoa.

Ua fa’ailoa mai e Amio Mavaega - Luvu, “O lo’o vala’aulia fo’i nisi fanau, ae ua mae’a fa’amuta fo’i le lesitala, ae le mafai lava ona tu’ua ai le talia latou, pe afai ae ulufale mai se tamaititi i lea aso e fia auai.”

O le a tatalaina fo’i le polokalama a le 4H ia Iulai, 2013 ma e tatau ona e fesiligia lea vaega a le Land Grant ina ia fa’atumu fo’i se avanoa o lou alo.

E le gata i lea, ae ua i ai fo’i a’oga komipiuta ma faitau tusi ua fa’atautaia i le faletusi o le tatou Malo i Utulei, Feleti Barstow Foundation Library. Ua fa’ailoa mai e na’o le $5. le lesitala, ae avatu le pepa fanau o lou alo e fa’amaonia ai lona igoa ma lona tausaga.

Aua le fa’atamala i tatou matua i nei avanoa lelei, ia tatou tinou e ave nai fanau e a’otauina mai i nisi fo’i tomai eseese i nei a’oa’oga fa’alaua’itele e faia e nei vaega o le tatou malo.