Ads by Google Ads by Google

Tala otooto o Fa’amasinoga

FALEPUIPUI SE TAMAITAI NA GALUE I LE GHC REID

 

E 20 masina  ua faasala ai e le Faamasinoga ia le tamaitai o Fuamoli Vaisagote i le falepuipui, o se tasi lea o tuutuuga o lona nofovaavaaia mo le lima tausaga, ina ua ta’usala o ia i moliaga o le taupulepule e faatino se solitulafono o le ave faagaoi o ni meatotino sa tuuina atu i lalo o lana vaavaaiga.

 

O Fuamoli na galue i le kamupani a le GHC Reid ma na ulua’i tuuaia o ia i le moliaga pito sili ona mamafa o lona ave faagaoi o ni tupe sa tuuina atu i lalo o lana vaavaaiga, ao avea o ia ma kesia (cashier) i le kamupani i le 2012 ina ua ia le avea le taga sa i ai le $24,972.58 a le kamupani e teu i le faletupe, ae ua ia teuina i totonu o le sefe a le kamupani ae e maua ifo, ua to’esea le $4,850.10 mai totonu o le taga tupe.

 

Na faatoese Fuamoli i le pule o le kamupani ma fai i ai, o le $3,000 o le tupe ua leiloa na ia tuuina i lana uo e faigaluega i le vaega o le Procurement a le ASPA.

 

A’o le’i tuuina atu le faasalaga a le faamasinoga faasaga ia Fuamoli, sa ia ulua’i faatoese i le faamasinoga ma le malo e tusa ai o lana solitulafono, ae le gata i lea o le kamupani a le G.H.C Reid i lona faatamala e faataunuu ona tiute sa tuuina atu, atoa ai ma lona aveesea o le faatuatuaga sa latou tuuina atu ia te ia i le vaaiga ma le tausia lelei o tupe a le kamupani.

 

Na ia talosagaina le faamasinoga mo se avanoa e toe fo’i atu ai i lona aiga e saili sana galuega, e tausi ai lana fanau e to’atolu o lo o i le fale. Sa ia taua e faapea, ua ia aoaoina se lesona taua ao nofo ai i le falepuipui mo le silia i le 4 masina, ma ua ia lagona le tiga o le nofo ese mai lana fanau.

 

Na faapea foi ona faaooina atu se talosaga a le tua’a a Fuamoli i le faamasinoga, mo se avanoa e saili ai e lona afafine se galuega e totogi ai tupe ua ia ave’esea mai le kamupani.

 

Na saunoa le alii faamasino sili ia Michael Kruse e faapea, o se tasi lenei o fesili o lo o tuu fesili ai pea le faamasinoga i le tele o taimi e alia’e mai ai mataupu faapenei e aafia ai tina talavou toe atamamai, pe aisea latou te faia ai lenei solitulafono.

 

O ni isi o tuutuuga o le nofovaavaaia o Fuamoli e aofia ai lona totogia o le salatupe e $2,000 ma le $4,648.79 i le kamupani.

 

Afai ae maea ona tuli e Fuamoli masina e 6 o lona faasalaga i le toese i Tafuna, o le a mafai ona ia talosaga i le faamasinoga mo se avanoa e tatala ai o ia i tua.

 

TALIA E LE FAAMASINOGA LE TALOSAGA A FETA’I AULEAFE

 

O le faasalaga e 12 masina lea ua poloaina e le Faamasinoga Maualuga mo le alii o Feta’i Auleafe, o se faamaoniga lea o le talia e le faamasinoga o lana talosaga mo se avanoa e toe fo’i ai e tausi lona toalua ma si ona afafine.

 

E lima tausaga e tatau ona loka ai Feta’i i le toese i Tafuna, ina ua ta’usala o ia e le faamasinoga i le moliaga o lona umia faasolitulafono o ni vaega o le pauta faasaina o le aisa, peitai ua manatu le faamasinoga o le a faamalumalu lea faasalaga, ae ua lava na o le 12 masina e loka ai o ia i le toese, o se tasi lea o tuutuuga o lona nofovaavaaia mo tausaga e lima.

 

O tuuaiga faasaga ia Feta’i na alia’e mai ina ua maua e leoleo sa latou inugapia sa faia ma ni tamaitai se toalua talavou i le tausaga na te’a nei. Na maua foi i le tino o Auleafe se tama’i taga pepa iila o lo o i ai vaega o le pauta faasaina o le aisa, ma molia ai loa o ia i le tulafono.

 

O Auleafe o se tagatanuu mai Samoa na ulufale mai i le teritori i le 2002 ma amata galue ai o se alii kapeteni i se tasi o vaa fagota, atoa ai ma se inisinia taavale, ae o le tausaga e 2012 na maea ai le aoga o lona ID ae peitai ua poloaina o ia e le faamasinoga ina ia toe faalelei ona pepa nofomau ae le’i atoa le 12 masina lea o le a loka ai.  A leai, o le a toe foi i Samoa ma nofo ai mo le lima tausaga.

 

E le gata na faatoese Feta’i i le faamasinoga ae sa ia talosagaina foi se avanoa mo ia e toe foi atu ai e tausi lona aiga. Na taua e lona toalua i luma o le faamasinoga e faapea, o lenei alii o se tama e loto alofa toe galue malosi.

 

Ua faatonuina e le faamasinoga ia Feta’i ina ia aua nei ona toe tagofia ni fualaau faasaina i le lima tausaga lea o le a nofovaavaaia ai.