O le faalauiloaina i tina ma ulugalii o auala e saili ai tupe mo le aiga, atoa ai ma auala e faasao ma faaaoga tatau ai tupe, o le autu lea o se Aoaoga faapitoa o lo o faatautaia e le Matagaluega o Tupulaga Talavou, Tina ma Tama’ita’i mo aso e lua, lea o lo o faailoa ai e Matua o Faiva ua i ai le tomai faapitoa i mataupu faapenei i le silia i le to’a 50.

O le itula e 9:00 i le taeao ananafi na tatala aloaia ai lenei Aoaoga i le nofoaga tuai sa i ai le Ofisa o Palota a le malo i Utulei, ma faamae’a ai i le itula e 12:00 i le aoauli, ma le faamoemoe e toe faaauau i le taeao nei.

O Matua o Faiva o lo o gafa ma le faatautaiga o lenei aoaoga e pei ona faailoa mai e le Faatonusili o le Matagaluega ia Pa’u Roy Ausage e aofia ai le tama’ita’i foma’i ia Dr. Faofua Faatoafe, o le ulua’i faiaoga fo’i lea na amataina le aoaoga ananafi; o le faletua ia Ramona Toeaina; atoa ai ma le Sui Faatonusili o le matagaluega ia Tapumanaia Galu Satele Jr.

O le Matua o Faiva faapitoa mai le Iunivesite a Hawaii o le a maua le avanoa e talanoa ai i auala e faatumauina ai le olaga mama ma le fiafia i totonu o aiga, o le a tapena i ai le tama’ita’i foma’i ia Dr. Nafanua Savusa Aivao Patu Braginsky.

Na taua e Pa’u i le Samoa News e faapea, o le aoga lenei e faapitoa lava mo tina aua o i latou ia o lo o tele ina faasoasoaina tamaoaiga i totonu o aiga, peitai o se fiafiaga tele i le matagaluega ina ua maua ai fo’i ma le avanoa e faatasi atu ai ma tama faapea ai fanau talavou.

“O le autu o le isi lenei polokalame a le matagaluega e pei ona faatinoina i le taeao nei (taeao ananafi), o le tuuina atu lea o aoaoga i tina atoa ai tama ma fanau i auala e saili mai ai tupe mo le aiga, atoa ai fo’i ma auala e faasao ma faaaoga tatau ai tupe, ina ia manuia ma tumau ai pea le fiafia i totonu o le aiga,” o le saunoaga lea a le alii faatonu.

Na taua e Pa’u e faapea, o le 90% o faafitauli o lo o maitauina o lo o mafua ai vevesi i le va o ulugalii i totonu o aiga, e mafua mai lava i le ‘tupe’, e le gata e le o lelei ona faasoasoa ae o ni isi fo’i taimi e le o lava le tupe o lo o maua e le aiga.

I ulua’i folasaga a le tama’ita’i foma’i ia Dr. Faatoafe ananafi na ia taua ai e faapea, e tasi lava le auala e mafai ai ona maua tupe mo se aiga o le galulue.

“O le taimi nei i le lalolagi e aofia ai ma Samoa nei, a leai se tupe e le mafai ona faia fefaatauaiga, peitai i aso ua mavae i Samoa, sa mafai foi ona faaaoga oloa, faatoaga poo lafu manu fo’i e faia ai fefaatauaiga i le va o oloa, ma o ni isi nei o auala sa mafai ona manuia ai aiga Samoa i aso ua mavae,” o le saunoaga lea a Dr. Faatoafe.

I totonu o Amerika i ni suesuega sa faia ai e pei ona saunoa Dr. Faatoafe, o le 90% o ulugalii tete’a e mafua mai ona o le tupe, e le gata ua le lava le tupe, ua ova le tupe maua, ua sese le auala e faaaoga ai, ua nana tupe ae ua pepelo ai foi le ulugalii ona o tupe.

“O le taua o le tupe i lou aiga, e mafai ona atina’e ma manuia ai le aiga i soo se tulaga, ae afai loa e sese ona saili pe faaaoga fo’i, ona afua mai ai loa lea iina faafitauli e pei ona maitauina i le tele o ni isi o aiga i le taimi nei,” o le saunoaga lea a Dr. Faatoafe.

Na taua e le tina ia Panina Misa o Aua sa auai i le aoaoga lona fiafia tele, ina ua mafai ona maua lenei avanoa e faatasi atu ai i lenei aoaoga, e fesoasoani ai i lona mafaufau i auala e faasoasoa ai tupe a lo la aiga.

“E i ai lava fo’i isi taimi ma te vevesi ai ma lo’u to’alua ona o le faaaogaina o tupe, o ni isi taimi ua soona faaaoga pe faaaoga fo’i i mea e le o mana’omia i totonu o le aiga, ae o le taua o lenei aoaoga, o le a mafai ai ona maua ni isi auala e fesoasoani ai ia te a’u i le faasoasoaina o tupe i lo ma aiga,” o le saunoaga lea a Misa i le Samoa News.

Ae na taua e le tina talavou ia Agnes Finau o Fagaalu e faapea, o lo o i ai lona faamoemoe e fia faavaeina sana tama’i pisinisi e faaaoga i ai lona toma’i ua maua i le su’isu’i ma le kuka, ina ia maua ai se isi alagatupe e fesoasoani ai i le galuega a lona toalua aua le tausiga o le la fanau.