Vaega: 75

Taeao manuia i le mamalu o le atunu’u, ae maise o le au fai tau, fa’amalo le soifua, fa’amalo fo’i le onosa’i i feau ma galuega o lo’o feagai ai i lenei aso. ia fa’amuamua pea le Atua i mea uma tatou faia, ona taunu’u ai lea i le manuia a tatou fuafuaga uma, ae alo maia, o le a toe fa’aauau atu la tatou tala e pei ona masani ai.

Na muta mai la tatou tala, ina ua fai nei le ma talatalanoaga ma si o’u tama i totonu o le fale mata’aga tele lava i totonu o le a’ai i Peretania, ma o lea fo’i fa’atoa ou iloaina lenei mea, ma e lagona ai le loto tele aua ua ou mautinoa le mana’oga o si o’u tama, ina ia ou sauna lelei i so’o se itu e fa’afoe mea uma mo matou.

Ae lilo i manatu, o lo’o i ai se avega mamafa lava o lo’o o’u tauaveina, o le ma va lea ma lo’u tina o Makerita fa’apea ma lo’u tuagane o Peteru, ma e ui lava i nei mea uma ua maua, ae o lo’o i ai lava tulaga le manuia o lo’o tula’i mai ai.

E moni lava le upu, o a mea e tele o le lalolagi nei e te maua, ae a leai so’u alofa, e leai se aoga o mea uma, afai fo’i ua e maua le tamaoaiga ma tupe e tele, ae aunoa oe ma se alofa, o le a le alofaina mai fo’i oe e isi tagata, ae maise ai o le Atua.

Ua fa’amamulu ‘ese nei a’u e lo’u tama i lea taimi ae ua tilotilo sa’o mai ia te a’u, “Averia, aisea ua e fai mai ai ia te a’u fa’apea, ae o lo’u loto atoa o oe, o lea ua ma’ea lelei au a’oa’oga sa ou tatalo i le Atua ina ia fa’amanuia ia te oe, ma ia taunu’u lou fa’amoemoe, o lea ua taunu’u, ae aisea ua e mana’o ai ia fa’amae’a a’oga a ioane.?”

“Dad, va’ai oe, afai ae lelei atoatoa a’oa’oga a Ioane, o le tasi lea o auala e silisili ona lelei, e fa’amautu atili ai pisinisi ma kamupani o lo’o e tigaina e taumafai. O le isi itu, afai o lea ua ou va’ai atu nei i le tulaga o lo’o i ai lo’u tina o Makerita ma lo’u tuagane o Peteru, o lona uiga, e sau le aso, e fa’asaga tau mai ai ia te a’u, a’o si o’u tuagane o Ioane, a lea ua e va’ai ma e molimau,  e le tutusa alofa, a’o le alofa o si  o’u tuagane la’ititi ia te a’u, ua ou mautino lava, e le mafai ona alu ‘ese ma a’u.”

“Averia, afai o le mea lea e te mana’o i ai, ia o le a fai fo’i, ae e sili pe a ta talanoa fa’atasi ia Ioane po’o le a le mea e mana’o ia e fai,  ae a tonu o le a malie mai e fai le mea lea ua o ta manana’o e fai.”

Na ou toe a’apa atu nei ua fusi mai si o’u tama i lea taimi ua lagona le fiafia o lo’u loto ma ua mapu fo’i lo’u mafaufau, ona o le a va’aia ataata o ta’uleleia i mea uma ua amata nei ona ou manatu e fai ina ia ou fesoasoani atu ai i si o’u tama.

Ua fa’ailoa mai nei e lo’u tama ia te a’u le tele o isi mea o lo’o ia faia, o nei mea uma, sa fa’atula’i mai e ona matua mo ia. Ua vaevae uma e lo’u tama mea uma, ina ia ‘aua ai nei i au se pule a Makerita i le tele o isi mea, lea ua aofia ai nei ma le fale mata’aga lenei o lo’o ma i ai.

Ua matala lo’u mafaufau i lea taimi, ina ia mafai ai ona teu mau i lo’u loto mea uma nei ua talanoa mai ai si o’u tama ia te a’u. Na ou fa’apea ifo nei, amuia a’u, e i ai se tama e alofa fa’amaoni, amuia a’u, o lo’o i ai se tama, ua ia saunia mea uma mo a’u. Ae paga lava lea, o lo’o i ai lava le mea o lo’o misi, o le alofa lea fa’aletina, aua ua ou talitonu, afai e i ai uma alofa nei e lua e fusia ai le ola tuputupu a’e o le tamaititi, o le a ola a’e fo’i i se olaga sologa lelei ona itu uma.

Na ou a’apa atu nei ua fusi mai si o’u tama i lea taimi, “Dad, out e alofa ia te oe.”

Na ou va’ai ua ea a’e nei i luga ma tilotilo mai ia te a’u, “Averia, si o’u afafine pele, ou te alofa tele ia te oe.”

E faia pea