LE FIAFIA FAAMASINO VUI CLARENCE NELSON I LE FAIFAIAGA O LEOLEO

Na matua faaleoina lava e le afioga Faamasino Vui Clarence Nelson o le Faamasinoga Maualuga lona le fiafia I le faatinoga o galuega a leoleo o lo o galulue I le Ofisa o Faamasinoga, ona o le tele o mataupu e toe tolopo mo nai Itula po o ni aso foi, ona o le faifaiaga o leoleo I le auina mai o pagota po o I latou o lo o taofia, mo taimi faatulagaina e tatau ona tutulai ai I luma o le Faamasinoga.

O lona le fiafia tele ua tautino ai e Faamasino Vui le le toe taliaina e le Ofisa o Faamasinoga lea tulaga le manuia ua aliae mai, o le faifaiaga o leoleo ma o le a le toe faatali foi le Faamasinoga I lea faifaiaga.

 O lea mataupu ua taloina ai e Faamasino Vui se feiloaiga ma le komesina o leoleo ina ia saili ai ni auala e foia ai lea faafitauli. Fai mai a ia, o le tele o mataupu ua toe tolopo mo nai Itula, ao nisi o mataupu ua tolopo mo aso ona o le tuai ona oo mai o I latou o lo o molia I le fale faamasino ma ua alagatatau lava ona fai loa I ai se faatatau.

MOLIA SE TAGATA FAIGALUEGA A LE MALO I LE FUALAAU FAASAINA O LE “AISA”

Na tulai I luma o le Faamasinoga Maualuga se alii e faigaluega I le Vaega Fa’aasu (Quarantine Division) o le Pulega Uafu ma le Taulaga, I tuuaiga o lona umia o le fualaau faasaina o le aisa. O lo o tetee le alii o Junior Patau I ia tuuaiga ma na tulai o ia I luma o Faamasino Pierre Slicer I le aso Lua na sei mavae atu nei lea na amata ai lona faamasinoga.

Na faaalia I faamaumauga a le Faamasinoga e faapea, o le aso 15 o Tesema o le tausaga na tea nei sa alu atu ai le ua molia I le malae vaalele I Faleolo e aumai se atopau sa auina mai fafo. Ae lei tuuina mai I tua lea atopau, sa suesueina muamua e sui o le Ofisa o Tiute o Taualeo’o Aifiti ma Ietitaia Iosia. Na molimau ia alii I le Faamasinoga e faapea, na maua e Iosia ia le fualaau faasaina o le aisa ina ua ia sueina le atopau.

Na faaalia foi I le molimau a Iosia e faapea, sa ioe le ua molia e faapea, o ia e ana ia fualaau faasaina. O lo o faagasolo pea lea faamasinoga.

TUALA OLI AH HIM: “E LEAI SE FAALETONU O LE ATINAE TAU TURISI I SAMOA”

Ua faaalia e le peresetene o le faalapotopotoga o le au fai faletalimalo o le atunuu, le susuga Tuala Oli Ah Him, le leai o se faaletonu o tulai mai I le atinae o tagata tafafao maimoa mai I Samoa, e pei ona agiga I faamatalaga ua alia’e mai, ma o lo o ia talia le taimi e siitia atili ai pea le fuainumera o tagata e asiasi mai I Samoa I le agai atu I luma.

Na saunoa Tuala, ua nao se vaega itiiti o sui e toa 98 o le asosi o lo o agai mai ai ia finagalo faaalia, ma e le tatau ona avea ma mataupu tuga tele. Ua faaalia foi e se tasi o tagata tomai faapitoa I lea mataupu e faapea, o lo o tulaga faaletonu le atinae tau turisi I le atunuu, ma e mafai e Samoa ona faaaoga le talimalo moni o aiga e uunaia ai lea atinae, atoa ai ma le tutufaatasi o itutino uma e faatosina mai tagata mai fafo.

O lenei lava mataupu ua maea ona tali I ai le minisita o turisi, le afioga I le palemia, le susuga Tuilaepa Sailele Malielegaoi, ma ia teena ai le tulai mai o se faafitauli I le atinae o turisi I le atunuu. O le vaiaso ua faailoa e le afioga Tuala, e faia ai se feiloaiga a sui uma o le asosi ma ana paaga uma, e soalaupule lea mataupu.

FUAFUA LE FAATUINA O SE AOGA MO AVE VAALELE I FALEOLO

Ua faailoa mai e le alii pule o le kamupani vaalele o le Samoa Air, le susuga Chris Langton, lona faamoemoe ina ia tatala mo le uluai taimi I Samoa se aoga mo ave vaalele I totonu o le atunuu.

Na faaalia e Langton, o le fuafuaga o lo o I ai nei, o le faatuina lea o lea atinae taua I le malae vaalele faavaomalo a le atunuu I Faleolo, I se tasi o fale taalaelae sa faaaoga e malu ai vaalele lea o lo o I ai se fale inisinia a lana kamupani vaalele. O le susuga Chris Langton sa avea ma ave vaalele a le kamupani vaalele o le Polenisia I tausaga ua mavae ma na ia faaalia, sa I ai ni potu aoga mo ave vaalele I lea lava nofoaga I aso ua alu. Fai mai a ia, e amata loa lea aoga ma siitia ai le tomai ma le silafia o ave vaalele I le maualuga o laisene ave vaalele I totonu lava o le atunuu, ma ia faauu ma le tomai faalauteleina I lea foi matata.

O le taimi nei, o ave vaalele uma I totonu o Samoa o lo o aotauina I aoga ave vaalele I totonu o Niu Sila.

SAUNI LE MANU SAMOA E ILOILO MA LE AU MALOSI A ITALIA

Ua faailoa mai le au a le Manu Samoa ua filifilia mo le taaloga ma le au malosi a Italia I le faaiuga o le vaiaso nei.

Na faaalia, ua maea ona Iloilo lelei e le susuga I le faiaoga, le susuga Stephen Betham le maualuga o le tulaga ua I ai le taaalo a le au a Italia, aemaise o lea faatoa uma atu le taamilosaga o le Six Nations lea sa latou tauva ai ma Egelani, Sikotilani, Uelese, Aialani ma Farani. Ua lipotia mai e faapea, e tasi le suiga I le au a le Manu Samoa mai le au sa taaalo I le faaiuga o le vaiaso na tea nei, lea ua sui tulaga ai le susuga Sakaria Taulafo ia Logovii Mulipola I le tulaga o le prop.

O le au la lenei: Sakaria Taulafo (1), Wayne Ole Avei(2), Cencus Johnston (3), Teofilo Paulo (4), Daniel Leo (5), Ofisa Treviranus (6), Jack Lam (7), Taiasina Tufua (8), Jeremy Su’a (9), Tusiata Pisi (10), Alesana Tuilagi (11), Johnny Leota (12), Paul Williams (13), Alapati Leiua (14), James Sooialo (15). Faaleoleo: Tii Paulo, Logovii Mulipola, James Johnston, Kane Thompson, Junior Poluleuligaga, Brandon Vaaulu, Seilala Maposua, Piula Faasalele. O le vaveao foi o le aso Sa a sau nei o le a faia ai lea taaloga.

Saunia: Lilomaiava Andrew Fa’asau, Naenae Productions