NOFOVAAVAAIA VAIMALU LAMETA MO LE 2 TAUSAGA

E lua tausaga lea o le a nofovaavaaia ai le alii talavou mai Pago Pago, o Vaimalu Lameta, ina ua ta’usala e le Faamasinoga Maualuga o ia i le solitulafono o le faaoolima i le tulaga tolu, ina ua faamaonia lona faaoolima ia Michael Saofaga.

Na faatoese Vaimalu i luma o le faamasinoga i lona aiga, nuu ma le ekalesia ma sa ia talosagaina se avanoa se’i toe faaleleia ai lona olaga ma na ia folafola ai, o lana toe tula’i lea i luma o se faamasinoga.

Ae peitai, na fesiligia le alii o Vaimalu e le faamasino sili ia Michael Kruse ina ua faamaonia sa nofovaavaaia foi i seisi solitulafono i le 2012, “O le a la le isi avanoa lea e te talosaga mai ai o lea fo’i sa tuu atu e le faamasinoga le avanoa muamua mo oe i le 2012?”

Na tali Vaimalu, “O se avanoa se tasi mo a’u ou te toe fo’i ai i lo’u aiga ona ua ou lagona lo’u salamo.”

“Ae o le a se mea sa e lagonaina i le 2012 ina ua e maua le avanoa mai le faamasinoga,” o le isi fesili a Kruse ae na toe tali Vaimalu, “Ou te le’i lagonaina se mea.”

Na toe fesili le alii faamasino ia Lameta i le mafuaaga o le faalavelave na tali Vaimalu, o ia na valaau i le alii na aafia e alu atu la te talanoa, peita’i sa ese tala a lea alii na tali atu ai lea na mafua ai ona la fufusu, peitai na te’i ina ua o atu leoleo ma loka mai o ia ona o le tagi na faaulu e le aiga a lea alii na la vevesi.

E ui o le faalua ai lea ona tula’i Vaimalu i luma o le faamasinoga, ae na talia e le alii faamasino fautuaga a loia atoa ai ma le faatoesega ma faamalumalu ai loa le tuuina atu o se faasalaga ae o le a nofovaavaaia o ia i lalo o poloaiga a le faamasinoga, e aofia ai le faasa ona ia toe tagofia le ava malosi, faasa ona ia toe soli se tulafono, a ia auai i ni aoaoga e fesoasoani ai i le tulaga o le ita ma le tagofia o le ava malosi, ua faasa fo’i ona toe latalata i le nofoaga o lo o i ai le falevaa i Pago Pago, lea na tula’i mai ai le faalavelave e pei ona molia ai o ia.

Ua poloaina foi Vaimalu ina ia saili sana galuega ae e le’i atoa le 60, a leai, o le a ia faatinoina loa ni galuega mo le atunuu lautele mo le umi e 300 itula.

BOGDAW STUART TUILETUFUGA

O le Aso Faraile o le vaiaso nei lea ua faatulaga e lau ai le faasalaga a le alii o Bogdaw Stuart Tuiletufuga i luma o le Faamasinoga Maualuga, ina ua talia lana tali ioe i le solitulafono o le faaoolima i le tulaga tolu e pei ona toe teuteu e le malo.

O Tuiletufuga na ulua’i tuuaia e le malo i moliaga mamafa e lua o le faaoolima i le tulaga lua, ae i lalo o le maliliega na latou sainia ma le malo, sa ia tali ioe ai i le solitulafono o le faaoolima i le tulaga tolu ae solofua e le faamasinoga le isi moliaga mamafa e tasi o lo o totoe ai i le pepa o tagi sa faaulu e le malo.

I le tali ioe ai o Tuiletufuga i le solitulafono e pei ona tausala ai o ia e le faamasinoga, sa ia tautino ai e faapea, i se taimi o le po o le aso 20 Ianuari 2013 i le maea ai o se latou inugapia sa faia, na ia togiina ai se moli uila i le faitoto’a o lona fale, ma alu atu ai le moli uila ma lavea ai le tama’ita’i na aafia i lenei mataupu.

Na taua e le ua molia i luma o le faamasinoga, e le’i mafaufau e faaoo ni manu’a i le tama’ita’i na aafia, ae na te’i ina ua ia togiina atu le moli uila ae ona vaaia ai le tama’ita’i na aafia o lo o tuu mai i totonu o le latou fale, ma alu atu ai loa le moli uila ma lavea ai.

O lo o tumau pea tuutuuga o lo o tatala ai Tuiletufuga i tua e faatali ai le aso Faraile nei lea ua faatulaga e lau ai lana faasalaga.

O le alii loia ia Douglas Fiaui o lo o tula’i mo Tuiletufuga ae o Julie Pasquale o lo o tula’i mo le itu a le malo i lenei mataupu.