Ads by Google Ads by Google

Fa'aaoga Tagata Faigaluega NEG sailia tagata VA

O lo ua i ai se avanoa lelei e toe fa'aaogaina ai i latou uma sa galulue i le Polokalama a le NEG, ina ia latou toe talosaga ane i avanoa e fa'afaigaluega ai i latou e toe sailia tagata VA ma latou tagata tausi e pei o latou ava ma fanau.

 

O lenei toe taumafaiga e fa'afaigaluega nei sui uma sa auai i le NEG, sa tu'ufa'atasia ai gaoioiga a le Ofisa o le VA ma le Ofisa o Tagata Faigaluega a le tatou Malo DHR i le polokalama a le WIA, ma Ofisa o Mataupu Tau Samoa.

 

"O le matou toe taumafaiga lenei ina ia maua a'ia'i le faitau aofa'i o i latou e agava'a i penefiti a le VA, aua o le numera lea e sili ona mo'omia e fa'amau mai, e talosaga ai nisi fo'i polokalama mo alagatupe e toe fa'aaoga e toe fa'aleleia ai le tautuaina o VA uma ma latou tagata tausi i Amerika Samoa." O se tala lea a Laupola e tusa o lenei fo'i avanoa ua maua.

 

O le to'a 500 o tagata sa maua avanoa e faigaluega ai i le NEG na toe potopoto ane uma i le Samoana Gymnasium e toe talosaga mo se avanoa e faigaluega ai. O avanoa nei e mafai ona talosaga i ai i latou e afua mai ia Iuni 10 se'ia o'o ia Iuni 28, 2013.

 

O le latou galuega patino, "Ia maua uma mai Tagata VA ma latou tagata tausi!" Ua fa'ailoa mai e Tuimavave Laupola, "O le faitau aofa'i o sui VA ma latou tagata tausi, o le a tu'ufa'atasia lelei, ma o le a aoga tele mo le talosagaina o nisi alagatupe e fa'aleleia atili ai le tautuaina o tatou sui VA po'o fitafita tuai a le tatou Malo ma le Malo tele."

 

Ona o tagata sa faigaluega i le NEG e matele ina alaala tumau i latou i nu'u i tua o le tatou malo, o lea ua latou silafia le to'atele o tagata VA ma e fo'i o lo'o latou fa'aaogaina penefiti po'o alamanuia mai le VA ae ua maliliu o latou sui sa avea ma fitafita a le malo tele. Ona o lea, ua talosagaina ai i latou e faia lea galuega lelei.

 

E ese mai le fa'afaigaluegaina o nei sui sa i le NEG, ae ua mae'a soalaupule fo'i lea Ofisa a le WIA ma le vasega o pulenu'u i afio'aga ta'itasi ina ia fa'autagia le talafa'auto atu o nei sui uma e taumafai ona aoina ma tu'ufa'atasia mai o tagata Fitafita Tuai ma o latou aiga o tausi.

 

I le mamalu o fitafita tuai uma o lo'o soifua mai, alofagia, ia fa'autagia lenei aotelega o se faitau aofa'i o i latou, ia mafai ona maua nisi alamanuia aoga mo i latou, ae maise o latou aiga tausi, ma le malo fo'i, i le lumana'i.

 

Ua faailoa mai a mae'a ona tu'ufa'atasia mai e sui faigaluega nei a latou lisi o suafa, o le a tu'ufa'atasia fo'i ma isi lisi mai le Ofisa o le PX ma le Potu Talavai VA i Tafuna, ina ia mautinoa ua maua uma i latou o fa'aaogaina alamanuia a le VA.

 

O le taimi atofa mo lenei tu'ufa'atasiga o e uma o lo'o talia e le VA, e ao ina mafai ona maua tonu i le fa'ai'uga o le masina o Iuni, 2013.

 

"Ole taimi lava e maua ai lenei tu'ufa'atasiga, o le a fa'aaogaina loa e le Ofisa o le VA mo a latou fuafuaga nei ua mae'a fa'atulaga ae o lo'o tatalia le faitau aofai o VA i Amerika Samoa." O se tala lea a le Fa'atonu o le Va, Taua'a Sam Vaouli.

 

O le totogi ua fa'autagia e maua e nei sui uma o le NEG a'o latou faigaluega mo lea fa'amoemoe aoga, e ta'i $5. i le itula.

 

fa'aliliu: Leua Aiono Frost