Version:1.0 StartHTML:0000000212 EndHTML:0000016335 StartFragment:0000002668 EndFragment:0000016299 SourceURL:file://localhost/Users/pattypage/Desktop/06_13_13%20LE%20LALI/5,%20%2006_13%20AF%20starkist.rtf

Ua talosagaina e le pulega a le kamupani i’a a le StarKist Co, le Fa’amasinoga Feterale i Oakland, Kalefonia, ina ia ave le iloiloina o le mataupu savili lea ua faia faasaga i le kamupani e fofogaina i le faamasinoga feterale i Pennsylvania i Sisifo, peita’i na tete’e le ali’i o Patrick Hendricks e ana le tagi i lea talosaga, ona o lona mana’o e faia pea le faamasinoga i Kalefonia.

O le aso 18 o Iuni 2013 lea ua faatulaga e fofogaina ai i luma o le faamasinoga feterale ulua’i faafinauga o lenei mataupu.

O le tagi faasaga i le StarKist Co, na faila eHendricks, o se tagatanuu mai Kalefonia i Matu i le amataga o le tausaga nei, ma ia tuuaia ai le StarKist i lo latou faatamala i faamatalaga o lo o faalauiloa ai ana oloa, “negligent misrepresentation”, le faamaoni i faamatalaga o lo o tuuina atu i le atunuu, “unjust enrichment”, atoa ai ma le faia o faamaumauga tau faasese “fraud”, ma o ia amioga ua soli ai tulafono a le setete o Kalefonia i tulaga o fefaatauaiga o oloa i le va o tagata faatau ma pisinisi.

O lo o tuuaia e Hendricks le StarKist Co, i lo latou faapipii i tua o le ata tuna o lo o latou faatauina le mamafa o le tuna o lo o i totonu, peitai afai e fua le tuna o lo o i totonu o le apa, e le taitai atoa le mamafa o lo o faalauiloa i tua o le pepa o lo o i le tino o le apa tuna.

Na taua e le StarKist i lana talosaga sa tuuina atu i luma o le faamasinoga feterale e faapea, o tuuaiga faasaga i le kamupani o lo o faavae i luga o ni suega sa faia i se Fale e faia ai suesuega (laboratory) e le o faailoaina lona igoa, i lalo o le fautuaga a le loia o lo o tula’i mo le alii o lo o tagi.

Fai mai le StarKist, o a latou molimau e faatatau i tuuaiga ua faia faasaga i le kamupani o le a mafai ai ona faailoa le moni o a latou faamaumauga.

Ua faailoa e le StarKist le sauni uma o ana molimau o lo o i le nofoaga autu a le kamupani i Pittsburgh mo le tuuina atu o molimau faasaga i lenei mataupu, ma e ui e na o le toatasi le latou molimau o lo o nofo i Kalefonia, ae ua sauni lea molimau e agai atu i Pittsburgh e sauni ai mo le taimi o le faamasinoga.

Ae na taua e Hendricks i lana faafinauga e faapea, i se suesuega sa faia i se Fale suesue i Kalefonia o lo o taua ai tulaga nei, o lo o faalauiloa e le StarKist lo latou faatauina atu o le apata tuna e 5 aunese (ounce) le mamafa, peitai i suesuega sa faia na maua ai e 17.3% e laititi ai le mamafa o le tuna o lo o i totonu o le apa mai le mamafa o lo o faalauiloa e le kamupani.

Na taua foi e Hendricks e faapea, talu ai o lo o olegia e le StarKist tagata faatau i totonu o Kalefonia i le na laititi lea o le tuna o lo o i totonu o le apa mai le mamafa o lo o latou taua e tatau ona i ai, ua ia failaina ai lenei tagi i le faamasinoga faasaga i lalo o tulafono a le setete o Kalefonia, e fai ai o ia ma sui o le miliona ma miliona o tagata Kalefonia o lo o faatauina le apa tuna a le StarKist.

Fai mai Hendricks, o se tasi o itu ua faatamala ai le StarKist, latou te le’i manatu e saili se isi faamasinoga feterale e iloiloina ai lenei mataupu i le taimi muamua ae ua faia lava i Oakland i Kalefonia, ae o Kalefonia lea o lo o faalauiloa, tufatufa ma toe faatau ai la latou apa tuna.

O lo o taua foi e Hendricks i lana talosaga e faapea, ua finau le StarKist fai mai e leai se aoga ma se taua o lana faamatalaga lea ua tuuina atu e tusa ai o lenei mataupu, aua e sili atu ai le taua o molimau a ana tagata faigaluega ia ua sauni e molimau mo lenei mataupu.

Ona o tulaga uma e pei ona taua, na talosagaina ai loa e Hendicks le faamasinoga feterale i Oakland ina ia teena le talosaga a le StarKist e ave le mataupu e fofogaina i Pittsburgh, ae faaauau pea le iloiloina o le mataupu i Oakland i Kalefonia.

fa’aliliu Ausage Fausia