Vaega: 74

Malo le soifua, malo fo’i le onosa’i i faiva ma tiute o lo’o feagai ai ma le mamalu o le atunu’u. E i ai pea le fa’amoemoe maualuga, o lo’o fa’apena ona o tatou maua fa’atasi le manuia mai le Atua, e ala i Ana fa’amanuiaga o lo’o o tatou maua pea i lea aso ma lea aso o le soifuaga.

E ao ai ona o tatou si’i le vi’iga ma le fa’afetai i le Atua Soifua, ona o Lona alofa lea o lo’o tatou maua ai pea le ola ma le filemu i aso uma, ae alo maia, o le a toe fa’aauau atu la tatou tala fa’asolo e  pei ona masani ai. Na muta mai la tatou tala ina ua maua nei le avanoa matagofie ma te fetufa’ai ai ma lo’u tama, ma o le ‘auga o lenei fetufa’aiga, o le fa’amatala mai lea o le aiga o lo’u tina, lea ua naunau lava lo’u loto i lo’u fia feiloa’i i ai.

“Averia, o lou tina, o lana galuega ina ua toe fo’i i Amerika, ua ia pulea se tasi o falema’i tele lava i totonu o Amerika, o lea falema’i, o lo’o i ai tagata matutua, o tama ma tina ae fa’apea fo’i nai fanau o lo’o fia maua le fesoasoani i so’o se itu. O totonu fo’i o le falema’i tele lea, o lo’o i ai le nofoaga ua patino tonu lava mo nai tagata ua fa’aletonu le tino ma le mafaufau i ma’i. O lou tina, o ia  o lo’o pulea le falema’i tele lea i totonu o Amerika, o le falema’i fo’i lea, ua tu’u i ai e lona tama, ona o lona aiga e onaina le falema’i tele lea.”

Ua atili ai ona fa’alaula solo o’u taliga i lea taimi, aua o lea ua amata ona manino mai le mata o le vai i le mea sa ou le iloaina.

“Averia, o le tuagane o lou tina, na au i le tofi Peresitene o le Malo o Amerika, ma o le fa’ai’u o lou tina o Keneti, o le isi ona tuagane na avea ma Loia Sili a le Malo o Amerika, peita’i, sa i ai mea na tutupu ai, ma o se mea ua sili ona mata’utia pe a e fa’alogo i ai, ae ui lava i lea, o lena ua ou ta’u atu ia te oe ma ou fa’aataata atu ia te oe lo’u afafine le aiga o lou tina o lo’o i Amerika.

“Averia, e sau se aso, a’o se taimi e te lua feiloa’i ai ma lou tina, ae o lena fo’i taimi, o le a matala ai le faitoto’a mo oe, e te filifili ai pe e te mana’o ta te mafuta pea pe e te mana’o e te lua mafuta ma lou tina.”

Na ou va’aia i lea taimi foliga fa’anoanoa o si o’u tama, ma ua le mautonu ai nei lo’u mafaufau po’o le a le mea o le a tupu nei ia te a’u, ona o lea ua ou fa’alogologo atu, o lona uiga e filifili a’u, pe ou te nofo pea ma lo’u tama i Peretania, pe ou te alu ma te nonofo ma lo’u tina i Amerika. Na ou tu a’e nei i luga ma ou savali atu i le isi itu o le potu ma ou tilotilo atu i fafo i le matagofie o mea uma, a’o o’u mafaufauga i lea taimi, e foliga mai ua naumati lo’u fa’ameomoe i mea uma ma ua leai fo’i se vai fofo e mafai ona fa’aleleiina mea nei o le a tutupu mai i totonu o lo matou ‘aiga, ae maise ai o le ma va ma si o’u tama e pele i lo’u loto.

Na fai si umi o lo’u tilotio pea i fafo, ae i totonu o lo’u loto ua lagona lava le vaivai i lea taimi, e ui fo’i i so’u manatu ua ou fia va’ai i si o’u tina moni na ou iloa ai le lalolagi, a’o le mamafa o lo’u loto, ona o le a avea lea ma ala o le a motusia ai le ma mafutaga ma si o’u tama.

Na ou liliu mai nei ma ou iloa mai ai le punou ifo o si o’u tama ma ona loimata, ma na ou savali ane nei ua fusi mai ia, “Dad, ‘aua e te popole ia te a’u, e faia e le Atua le aso ma taimi e fa’atino ai mea uma, ma afai lava o le finagalo o le Atua e ta te mafuta pea, ia o lena lava, ae afai o le finagalo o le Atua ou te alu e sa’ili si o’u tina, ia o lena lava, ae ‘aua e te popole I se mea e tasi, e sau lava aso ma ona ‘ai.”

Na ou lagona i lea taimi le opo mau o a’u e lo’u tama i lea taimi, ma na ou lagona ai le mafanafana o le alofa fa’aletama, ae paga lava lea, ua ou misia lava le mafanafana o le alofa fa’aletina. Na ou taumafai nei ina ia tu’u ‘ese atu o’u mafaufauga ia mo lenei taimi, ae ia ou talanoa pea i lo’u tama e tusa ai ma le mea o lo’o mana’o i ai ou te faia.

“Dad, ua ou iloa le mea o lo’o e mana’o i ai, o lo’u nofo lea e va’ai uma pisinisi ae maise fo’i o lenei fale mata’aga tele, ma o lea ua ou iloa fo’i lenei mea o lo’o e tauaveina, e le o se mea faigofie nei mea, ae ‘aua e te popole i se mea, pau lo’u mana’oga lea o lo’o i ai nei, Dad, ia ave Ioane e fa’auma lelei ana a’oga, ona faigofie ai lea ia te a’u, ona fai se auala e silisili ona lelei, e fa’afoe ai mea uma o lo tatou aiga.”

E faia pea