O le Aso Gafua na te’a nei na tu’umalo ai i le maota gasegase o le LBJ i Fagaalu, le ali’i Senatoa mai le itumalo o le Maoputasi, le afioga i le Tapunuu ia Fa’agata Mano III, i le 61 tausaga o lona soifua, ona o se gasegase faafuase’i, e pei ona sa faamaonia mai e se tasi o ona alo tamaitai.

Na galue Faagata i le Fale Telefoni a Amerika Samoa mo le lima tausaga, ina ua faauu mai i le aoga maualuga a Samoana, sosoo ai ma le kamupani i’a a le COS Samoa Packing i le lata i le 20 tausaga, lea na malolo litaea mai ai.

Sa galue fo’i o ia e avea ma Leoleopo mo le Fono Faitulafono, a’o le’i faapaleina o ia i le suafa Fa’agata i le tausaga e 2008.

Na taua e le afioga i le alii faipule ia Maugaoali’i Leapai Tusipa Anoa’i lona faanoanoatele ina ua ia maua le tala faavauvau e faatatau i le tuumalo o le alii Senatoa.

“A ou mafaufau atu i le ma mafutaga i totonu o le matou aiga aemaise ai le ma galulue faatasi ai i totonu o le Fono Faitulafono, ona ou misia ai lea o le afioga Fa’agata ona o le tele o galuega lelei mo le itumalo ma le afioaga sa ma galulue faatasi mai ai i le nofoaiga lenei a le Fono, a’o lenei ua alu ae le’i mae’a ni isi o ma galuega,” o le saunoaga lea a Maugaoali’i.

O ni isi o galuega na taua e Maugaoali’i sa la galulue faatasi ai ma Fa’agata, o le fausia o se malae taalo mo tupulaga talavou a le afioaga i tafatafa o le Tedi of Samoa; fausia o se pa e si’o ai le Malaeoletalu i Fagatogo, ina ia taofi ai le o atu o ta’avale ma paka ai i luga o le mutia; tulaga o le lapisi lafoa’i ma le faaleleia o alavai, aemaise ai le taofia o le tatalaina o le maketi i Fagatogo mo faatauga i Aso Sa.

Na saunoa Maugaoalii, o le vaiaso nei na faailoa mai ai e le pule o le maketi ia te ia, le talia o le talosaga sa la tuuina atu ma Fa’agata, ina ia taofia le toe tatalaina o le maketi i aso Sa i le aufai faatoaga.

Na taua fo’i e Maugaoali’i e faapea, o le avea ai o Fa’agata ma Sa’o o le aiga aemaise ai lona tauaveina o le tofi Senatoa, o ia o se tagata agamalu, loto maualalo toe loto alofa, ma o ona uiga tausaafia i le la mafutaga o le a faigata ai ia te ia ona faagalo le afioga i le Tapunuu, ona o ia o se uo mamae ia te ia.

O le masina o Tesema 2012 na tasi ai Fagatogo, Fagaalu, Gataivai ma Utulei e avea Fa’agata ma o latou sui i le maota maualuga a le senate, ma faatauto ai loa o ia i le tofi Senatoa i le aso 3 Ianuari 2013 faatasi ai ma isi Senatoa ma Faipule o le Fono Faitulafono.

O le afioga i le alii Senatoa ia Fa’agata sa avea ma Taitaifono o le Komiti o Fesootaiga ma Faiga Faiva a le Senate, faapea ai ma isi komiti sa avea ai o ia ma totino e pei o le Komiti o Mataupu Tau Samoa; Mataupu o Fela’uaiga, Uafu ma Malaevaalele, atoa ai ma le Komiti o le Sailiga o Alamanuia ma le Atina’e o le Tamaoaiga o le malo.

O le taeao ananafi na galulue ai Teioutaifeau Lomu Mosese ma le aumaga mo le tu’iina o launiu i totonu o le Fagaloa, amata mai i Fagaalu e oo mai i Fagatogo, o ni isi ia o tu ma aga e faailoa ai le faaaloalo pe afai e tuumalo se ali’i o se afioaga i Samoa.

O lo o soifua mai pea i le taimi nei le faletua ia Akenese, o ona alo e to’avalu atoa ai ma fanau a lana fanau e to’a 15.